جۋىردا سولتۇستىك قازاقستان ۋنيۆەرسيتەتىنىڭ ديالوگ الاڭىندا ەلىمىزدىڭ اگروسەكتورى ماسەلەلەرىن شەشۋدى تالقىلاعان عىلىمي-تەحنولوگيالىق سەسسيا (اگروحاكاتون) بولىپ ءوتتى. ونى عىلىم جانە جوعارى ءبىلىم مينيسترلىگى, «عىلىم قورى» اق جانە م.قوزىباەۆ ۋنيۆەرسيتەتى سولتۇستىك جانە ورتالىق قازاقستاننىڭ اگروونەركاسىپتىك كەشەنى كاسىپورىندارىن دامىتۋ جونىندەگى عىلىمي-تەحنولوگيالىق سەسسيا ۇيىمداستىردى.
بيىل جەتىنشى رەت ءوتىپ وتىرعان اگروحاكاتونعا ورتالىق جانە سولتۇستىك قازاقستان اگروونەركاسىپتىك كەشەنىنىڭ 2025–2027 جىلدارداعى عىلىمي-تەحنولوگيالىق دامۋ ماسەلەسى كۇن تارتىبىنە قويىلدى. شەتەلدەردەن ونىڭ جۇمىسىنا اقش, گەرمانيا, قحر عالىمدارى قاتىستى. عىلىم مەن ءوندىرىستىڭ بايلانىسىن ارتتىراتىن ماڭىزدى شارادا وبلىس اكىمى عاۋەز نۇرمۇحامبەتوۆ, اۋىل شارۋاشىلىعى ۆيتسە-ءمينيسترى ەربول تاسجۇرەكوۆ, «اتامەكەن اگرو» اق باسقارما توراعاسى كينتال يسلاموۆ, ت.ب. قاتىسىپ, ءسوز سويلەدى.
ءتارتىبى بويىنشا ۇزاققا سوزىلاتىن حاكاتوندا اگرارلىق سالانىڭ 65 عالىمى, شارۋاشىلىق باسشىلارى مەن ساراپشىلار قاۋىمداستىعىنان 15 ادام ءسوز الدى. «گەرمانيا قازاق-گەرمان اراسىنداعى حالىقارالىق اگرارلىق ساياسات ديالوگىن 2009 جىلدان بەرى قارجىلاندىرىپ كەلەدى. ونىڭ باستى ماقساتى – اگرارلىق سالاعا عىلىمي-تەحنولوگيالىق جەتىستىكتەردى ەنگىزۋ. سول ءۇشىن عىلىمي ورتالىقتارمەن, كونسۋلتاتسيالىق ورگاندارمەن, شارۋاشىلىقتارمەن تىعىز جۇمىس ىستەپ جاتىرمىز. سونىڭ ىشىندە م.قوزىباەۆ اتىنداعى سولتۇستىك قازاقستان ۋنيۆەرسيتەتىمەن دە تىعىز ىنتىماقتاستىقتامىز», دەدى گەرمانيا – قازاقستان اگرارلىق ساياسات ديالوگىنىڭ باسشىسى ولگا حانگەر.
اگروحاكاتونعا قاتىسقان عىلىم جانە جوعارى ءبىلىم ۆيتسە-ءمينيسترى دارحان احمەد-زاكي سوزىندە جوعارى عىلىمي-تەحنيكالىق كوميسسيادا پرەمەر-مينيستر و.بەكتەنوۆ عىلىمي-تەحنولوگيالىق سەسسيالار مەملەكەتتىك ماڭىزى بار ءبىرشاما ءتۇيىندى شەشۋگە قول جەتكىزۋ ءۇشىن ستراتەگيالىق قۇرال بولىپ تابىلاتىنىن ايتقانىن جەتكىزدى. «بىرىنشىدەن, ولار عىلىمي-تەحنيكالىق قىزمەتتى دامىتۋدىڭ باسىم باعىتتارىن قالىپتاستىرۋدىڭ جاڭا تەتىكتەرىن ازىرلەۋگە كومەكتەسەدى. ەكىنشىدەن, عىلىمي-تەحنولوگيالىق سەسسيالار, عالىمدار مەن وندىرۋشىلەر اراسىندا يننوۆاتسيالىق شەشىمدەردى جاساۋ ءۇشىن بىرلەسىپ جۇمىس ىستەيتىن الاڭ قۇرىپ, ەكونوميكانىڭ ناقتى سۇرانىستارى مەن قاجەتتىلىكتەرىن ءتيىمدى شەشۋگە مۇمكىندىك بەرەدى. ءوزارا ءىس-قيمىلدىڭ بۇل فورماتى عىلىم مەن بيزنەس اراسىنداعى كووپەراتسيانى جاقسارتىپ, جاڭا, ەكسپورتقا باعدارلانعان ءونىم ءوندىرۋ ءۇشىن كوممەرتسيالاندىرۋ جوبالارىن ىلگەرىلەتۋگە ىقپال ەتەتىنى ەرەكشە ماڭىزعا يە. بۇل ەل ەكونوميكاسىنىڭ حالىقارالىق ارەناداعى باسەكەگە قابىلەتتىلىگىن نىعايتۋ ءۇشىن قاجەت», دەدى د. احمەد-زاكي.
م.قوزىباەۆ ۋنيۆەرسيتەتىنىڭ باسقارما توراعاسى ەربول يساقاەۆ تا حاكاتونعا جوعارى باعا بەردى. ء«وڭىردىڭ سالالىق ەرەكشەلىكتەرىن ەسكەرسەك, بۇل – ءبىز ءۇشىن وتە ماڭىزدى وقيعا. قازىرگى تاڭدا اۋىل شارۋاشىلىعىندا جوعارى تەحنولوگيانى ەنگىزۋ قارقىندى دامىپ كەلەدى. ءوز تەحنولوگيالارىن, ونىمدىلىگىن جاقسارتىپ, شارۋاشىلىق جۇرگىزۋدىڭ ورگانيكالىق تاسىلدەرىن قالىپتاستىرعىسى كەلەتىن كوپتەگەن كاسىپورىن پايدا بولدى. عىلىمسىز جانە جاڭا سەرپىندى زەرتتەۋلەرسىز مۇنى جۇزەگە اسىرۋ مۇمكىن ەمەس ەكەنى ءمالىم. سوندىقتان بۇگىنگى مىندەت – اۋىل شارۋاشىلىعى ونىمدەرىن وندىرۋمەن تىكەلەي اينالىساتىن كاسىپورىنداردىڭ ماسەلەلەرىن انىقتاپ, عالىمدارمەن بىرلەسىپ شەشىمىن تابۋ», دەدى ول.
سونداي-اق ءىس-شارا اياسىندا قاتىسۋشىلار «زەنچەنكو ي ك», «AVAGRO» جانە «رادۋگا» جاۋاپكەرشىلىگى شەكتەۋلى سەرىكتەستىكتەرىندەگى ءسۇت زاۋىتىنىڭ وندىرىستىك الاڭىن ارالادى.
پەتروپاۆل