مەملەكەت باسشىسىنىڭ تاپسىرماسىمەن جۇزەگە اسىپ جاتقان «اۋىل اماناتى» باعدارلاماسىنىڭ ارالىق ناتيجەلەرىن قورىتىندىلاپ, الداعى ۋاقىتتا اتقارىلار جۇمىستاردى پىسىقتاۋ ماقساتىندا قىزىلوردادا «اۋىل اماناتى» باعدارلاماسىن جۇزەگە اسىرۋ جونىندەگى رەسپۋبليكالىق سەمينار جۇمىسىن باستادى.
باسقوسۋعا بارلىق وبلىس اكىمدەرىنىڭ ورىنباسارلارى, الەۋمەتتىك كاسىپكەرلىك كورپوراتسيالاردىڭ وكىلدەرى, كاسىپكەرلەر قاتىسىپ جاتىر. سەميناردىڭ اشىلۋ سالتاناتىندا ءسوز العان پرەمەر-ءمينيستردىڭ ورىنباسارى تامارا دۇيسەنوۆا ەڭ الدىمەن, باعدارلاما ارقىلى 16 مىڭ شاعىن نەسيە بەرىلىپ, 17 مىڭنان اسا جاڭا جۇمىس ورنى قۇرىلعانىن اتاپ ءوتتى.
ۆيتسە-پرەمەر باعدارلامانى جەتىلدىرۋ ماقساتىندا «Amanat» پارتياسىمەن بىرلەسە, بىرقاتار جۇمىس اتقارىلعانىن ايتتى. ءار وبلىستىڭ, اۋداننىڭ جانە اۋىلدىڭ ەرەكشەلىگى ەسكەرىلە وتىرىپ, بەيىمدىلىگى ناقتىلاندى. سونداي-اق وتىنىمدەر قابىلداۋدىڭ اقپاراتتىق جۇيەسى ىسكە قوسىلدى.
ت.دۇيسەنوۆا نەسيە العان ازاماتتاردىڭ وندىرگەن ونىمدەرىن وتكىزۋ جولدارىن رەتتەۋ قاجەتتىگىنە دە باسا ءمان بەردى. ەندى اكىمدەر تەك نەسيەنى بەرىپ قانا قويماي, ءار جوبانى اياعىنا نىق تۇرعانعا دەيىن سۇيەمەلدەۋى قاجەت ەكەنى ايتىلدى.
بۇگىندە بۇل باعىتتا وڭ ناتيجە بەرىپ جاتقان تاجىريبەلەر بار. تامارا دۇيسەنوۆانىڭ ايماقتارعا جاساعان جۇمىس ساپارلارى اياسىندا 4 وبلىستىڭ (باتىس قازاقستان, شىعىس قازاقستان, قاراعاندى, ماڭعىستاۋ) اكىمدىكتەرى وڭىردەگى ءىرى كاسىپورىندارمەن جەرگىلىكتى ءونىم وندىرۋشىلەردى قولداۋ جونىندەگى مەموراندۋمعا قول قويعان. ونىڭ اياسىندا جۇمىستار باستالىپ كەتتى. مەكتەپ وقۋشىلارىن تاماقپەن قامتۋ جۇمىسى دا شارۋالاردىڭ ونىمدەرىن وتكىزۋگە مۇمكىندىك تۋعىزىپ وتىر. ارينە, ءونىم ساپاسىنىڭ تالاپقا ساي كەلۋى مىندەتتى.
باستى ماقسات – شارۋالار ونىمدەرىن تۇراقتى وتكىزۋ جولدارىن ءتۇزۋ ارقىلى تابىسىن كوبەيتۋگە جول اشۋ. ۆيتسە-پرەمەر بۇل مىندەتتى ىسكە اسىرۋ ءۇشىن جاۋاپكەرشىلىك اۋىلدىق وكرۋگتەردىڭ, اۋداندار مەن وبلىستاردىڭ اكىمدەرىنە جۇكتەلەتىنىن اتاپ ءوتتى.
«كەلەسى جىلعا اۋىل شارۋاشىلىعى مينيسترلىگى 50 ملرد تەڭگە بولسە, 2026 جىلى دا وسىنشا قارجى قاراستىرىلادى. وعان نەسيەلەردەن قايتارىلعان قاراجات قوسىلادى. ايماقتارعا بۇل قارجى بىرنەشە تالاپقا قاراي بەرىلەدى. ۇسىنىلاتىن جوبالاردا ءوندىرىس پەن ءونىم وتكىزۋدىڭ ناقتى سحەماسى بولۋى قاجەت. نەسيە بەرۋ, قايتارۋ جانە ونى الۋشىلاردى ەسەپكە الاتىن اقپاراتتىق جۇيە ورناتىلۋعا ءتيىس. بولىنگەن قاراجاتتىڭ 20% اۋىل شارۋاشىلىعى تەحنيكاسىنىڭ ليزينگىنە, تاعى 20% قايتا وڭدەۋگە, 60% باسقا دا باعىتتارعا قاراستىرۋعا رۇقسات بەرىلمەك», دەدى ت.دۇيسەنوۆا.