الماتىنىڭ تاڭعاجايىپ تابيعاتى تۋريستەرگە تاپتىرماس قازىنا. اسىرەسە قىس ايلارىندا اق ۇلپا قارعا ورانعان اسقار الاتاۋ ءتىپتى اجارلانا تۇسەدى. تانىمال يتالياندىق «Condé Nast Traveller» جۋرنالى الماتى تۋرالى كەڭ كولەمدى ماتەريال جاريالاپ, اسەم شاھاردى شىعىس پەن باتىس توعىسقان, ءداستۇر مەن زاماناۋي ترەندتەر ۇيلەسىم تاپقان مەكەن دەپ سيپاتتادى.
الەمنىڭ ءار بۇرىشىنان تاۋ باۋرايىنداعى سۇلۋ قالانىڭ سىمباتىنا سۇيسىنە كەلەتىن تۋريستەر سانى جىل سايىن ارتىپ كەلەدى. جۋرنالعا جاريالانعان ليۋچيا گالليدىڭ ماقالاسى مەن دجاكومو برەتسەلدىڭ فوتوسۋرەتتەرى قالا-نى باي مادەنيەت, تابيعي سۇلۋلىق, زاماناۋي ديناميكا ۇيلەسكەن ەرەكشە ساياحات باعىتى رەتىندە پاش ەتكەن. اۆتور ماقالادا الماتى قالاسى مەن الماتى وبلىسىندا ورنالاسقان تۋريستىك ورىندارعا ەرەكشە توقتالىپ وتكەن. ىلە الاتاۋىنىڭ اسقاق تاۋلارى, التىنەمەل ۇلتتىق پاركىنىڭ ء«ان سالاتىن» قۇم توبەلەرى, سۋ استىنداعى ورمانىمەن ايگىلى قايىڭدى كولى, كولساي كولدەرى, بىرەگەي شارىن شاتقالى ساياحاتشىلار نازارىن اۋداراتىنى ايتىلعان. سونداي-اق تاريحى باي شاھاردىڭ ەسكى قالا ايماعىنا جاتاتىن پانفيلوۆ كوشەسى, كوك بازار, كوكتوبە سەكىلدى كورىكتى ورىندارى دا نازاردان تىس قالماعان.
«جۋرنال مەگاپوليستىڭ گاسترونوميالىق بايلىعىن دا ەرەكشە اتاپ وتەدى. ءداستۇرلى قازاق تاعامدارىنان باستاپ, جەرگىلىكتى اسحانانى نەونومادتىق ينتەرپرەتاتسيادا ۇسىناتىن زاماناۋي مەيرامحانالارعا دەيىن كورسەتىلگەن. الماتى – ماقالادا مايەكتى مادەني مۇراسىمەن, ءساندى ساۋلەتىمەن, ەرەكشە قوناقجايلىلىعىمەن شابىت ىزدەيتىن ءارى جاڭا باعىت اشۋدى جانى سۇيەتىن تۋريستەر ءۇشىن تارتىلىس ورتالىعى رەتىندە بەينەلەنگەن», دەيدى الماتى اكىمدىگىنىڭ ءباسپاسوز قىزمەتى.
الەمدەگى ساياحات جانە تۋريزم تۋرالى ەڭ ءىرى باسىلىمداردىڭ بىرىنە جاريالانعان اۋقىمدى ماقالا الماتىنىڭ ورتالىق ازياداعى ەڭ الەۋەتتى تۋريستىك باعىتتاردىڭ بىرىنە اينالىپ, تابيعي سۇلۋلىعى, مادەني ارالۋاندىعىمەن ساياحاتشىلاردى قىزىقتىرىپ كەلە جاتقانىن تاعى ءبىر دالەلدەيدى.
الماتىنىڭ تابيعي ەرەكشەلىكتەرىنەن بولەك, ەلىمىزدىڭ مادەني ورتالىعى ەكەنى دە ماتەريالدا كەڭىنەن قامتىلعان. وسى ورايدا ماجارستاننىڭ «كارچاگ كينچە» ونەر مۋزەيىندە حالقىمىزدىڭ باي مادەنيەتى مەن ۇلتتىق داستۇرلەرىنەن سىر شەرتەتىن اۋقىمدى كورمە ءوتىپ, ونى 12 مىڭنان استام شەتەلدىك تاماشالاعانىن ايتۋىمىز قاجەت. «قازاقستاننىڭ كوشپەلىلەرى: وتكەنى مەن بۇگىنى» دەپ اتالعان ونەر جارمەڭكەسى الماتى قالاسىنىڭ مۋزەيلەر بىرلەستىگى, الماتى قالاسى اكىمدىگى مەن قازاقستاننىڭ ماجارستانداعى ەلشىلىگىنىڭ قولداۋىمەن ۇيىمداستىرىلعان. ەكسپوزيتسياعا قازاق حالقىنىڭ باي تاريحي, مادەني مۇراسىن تانىتاتىن 200-دەن استام بىرەگەي ەكسپونات قويىلعان. كورمەگە كەلۋشىلەر نازارىنا ۇرپاقتار ساباقتاستىعىنىڭ سيمۆولىنا اينالعان اباي قۇنانباي ۇلىنىڭ دومبىراسى مەن باسقا دا تاريحي جادىگەرلەر ۇسىنىلعان.
«جوبا ۇلكەن قىزىعۋشىلىق تۋدىردى, بۇل ەلىمىز بەن ماجارستان اراسىنداعى مادەني الماسۋدىڭ ماڭىزدىلىعىن كورسەتەدى. بۇعان دەيىن وسىنداي كورمەلەر تۇركيا, وڭتۇستىك كورەيا, اۋستريا, يتاليا, چەحيادا وتكەن. ەندى سەربيادا « ۇلى دالانىڭ مادەني مۇراسى» اتتى كورمە اشىلادى. جالپى, قالا بيلىگى مادەنيەت سالاسىن دامىتۋعا ىقپال ەتەتىن ءتۇرلى تاعىلىمدىق ءىس-شارالارعا, ءبىلىم الۋعا باعىتتالعان, حالىقارالىق بايلانىستى نىعايتۋعا مۇمكىندىك جاسايتىن جوبالارعا ەرەكشە كوڭىل ءبولىپ وتىر. ايتالىق, مۋزەي قىزمەتكەرلەرى الەمنىڭ ۇزدىك مادەني ورتالىقتارىندا, سونىڭ ىشىندە ايگىلى لۋۆردا ءبىلىم الىپ قايتتى», دەيدى الماتى قالالىق مادەنيەت باسقارماسىنىڭ باسشىسى عاني مايلىباەۆ.
الماتى