تاۋەلسىزدىك كۇنىنە وراي قاراساي اۋدانىنىڭ «Gúlnar Baq» دەمالىس بازاسىنداعى يپپودرومدا ۇلتتىق ات سپورتى تۇرلەرىنەن جاستار اراسىنداعى وبلىس بىرىنشىلىگى اياقتالدى.
ءدۇبىرلى جارىس ۇلتتىق ات سپورتىنىڭ كوكپار, اۋدارىسپاق, جامبى اتۋ, تەڭگە ءىلۋ سىندى ءتورت ءتۇرى بويىنشا ۇيىمداستىرىلدى. بايراقتى باسەكەگە وبلىستىڭ بارلىق اۋدان مەن قوناەۆ قالاسىنان 160-تان اسا جاس سپورتشى قاتىستى. كوكپاردا 7 كوماندا باق سىنادى.
اۋدارىسپاقتا سپورتشىلار 52-90 كگ ارالىعىنداعى 8 سالماق دارەجەسىندە سىنعا ءتۇستى. جامبى اتۋ قازاق, كورەي ستيلدەرى بويىنشا ءوتتى. تەڭگە ىلۋدە قاتىسۋشىلار «بەس بەلەس», «قوس قۇلاش», «جەتى قۇت» اتتى ءۇش ستيلدە باسەكەگە ءتۇستى.
چەمپيوناتتىڭ نەگىزگى ماقساتى – ۇلتتىق ات سپورتى تۇرلەرىن ناسيحاتتاپ, جاستاردىڭ شەبەرلىگىن ارتتىرۋ, ۇلتتىق ات سپورتى تۇرلەرىنەن وبلىس قۇراماسىنا ىرىكتەۋ وتكىزۋ. سالتاناتتى اشىلۋ راسىمىندە مارتەبەلى مەيماندار مەن الماتى وبلىسىنىڭ دەنە شىنىقتىرۋ جانە سپورت باسقارماسىنىڭ وكىلدەرى ءسوز سويلەپ, جارىستىڭ ايماقتاعى ات سپورتىنىڭ دامۋى مەن جەتىلۋىنە جاڭا سەرپىن بەرەتىنىنە توقتالدى.
«مەن بالا كەزىمنەن ات سپورتىمەن اينالىسامىن. بۇگىنگى جارىستا رايىمبەك اۋدانىنىڭ نامىسىن قورعايمىن. بيىل شىمكەنتتە وتكەن رەسپۋبليكا چەمپيوناتىندا الماتى وبلىسى قۇراماسىنىڭ ساپىندا ونەر كورسەتىپ, 3-ورىنعا يە بولدىق. كوماندامىز وتە ۇيىمشىل, فۋتبولداعىداي ارەكەت ەتەمىز – ءبىر ويىنشى سەركەنى كوتەرەدى, ەكىنشىسى ونى قارسىلاستاردان قورعايدى, ال ءۇشىنشىسى قارسى شابۋىلداپ, جول اشادى. بۇل – ءبىزدىڭ تاكتيكامىز», – دەيدى رايىمبەك اۋدانىنىڭ كوكپارشىسى بەرەكە قاسىماقىن.
ءۇش كۇندىك سايىستىڭ قورىتىندىسىندا قاراساي اۋدانىنىڭ وكىلدەرى كوكپار ءتۋرنيرىنىڭ جەڭىمپازى اتاندى. 2-ورىندى رايىمبەك اۋدانىنىڭ, 3-ورىندى كەگەن اۋدانىنىڭ كومانداسى ەنشىلەدى.
اۋدارىسپاق سايىسىندا رايىمبەك اۋدانىنىڭ سپورتشىلارى قايرات ءابدۋسابىر, سۇلتانبەك سارسەنباي, الماس توكەن ۇلى, ادىلەت وبىلجان, تالعار اۋدانىنىڭ وكىلدەرى نۇرشات ارانعازيەۆ, سانجار ءسابيت, كەگەن اۋدانىنان ءالي ەرمۇحامەت, ۇيعىر اۋدانىنان ءاليحان ماقسات ۇلى ۇزدىك ناتيجە كورسەتتى.
جامبى اتۋدان (ات ۇستىنەن ساداق اتۋ) الماتى وبلىسىندا جاسوسپىرىمدەر مەن قىزدار بىردەي ونەر كورسەتەدى. ولار بيىلعى رەسپۋبليكالىق جارىستاردا كوش باستادى. چەمپيوناتتىڭ ۇزدىگى بولىپ ماديار ءشارىپباي (كەگەن) تانىلدى.
تەڭگە ءىلۋ سايىسىنىڭ دامۋىنا ەڭبەكشىقازاق, قاراساي, كەگەن اۋداندارىنىڭ قوسقان ۇلەسى زور. بيىلعى جەڭىمپاز اتاعىن ەڭبەكشىقازاق اۋدانىنان ەرسىن ءنۇرالي يەلەندى.
جالپىكوماندالىق ەسەپتە 1-ورىن رايىمبەك اۋدانى, 2-ورىن كەگەن اۋدانى, 3-ورىن ۇيعىر اۋدانىنا بۇيىردى. جەڭىمپازدار مەن جۇلدەگەرلەرگە كۋبوكتەر, مەدالدار, ديپلومدار, اقشالاي سىيلىقتار تابىستالدى. جۇلدە قورى 2 600 000 تەڭگەنى قۇرادى.
الماتى وبلىسى