سەنات سپيكەرى ماۋلەن اشىمباەۆتىڭ توراعالىعىمەن بيۋرو ءوتتى. وندا دەپۋتاتتار 12 جەلتوقسانداعى سەنات وتىرىسىنىڭ كۇن ءتارتىبىن بەكىتتى. سونداي-اق ءىس-شارادا پالاتا كوميتەتتەرىنىڭ وسى اپتاداعى كوشپەلى وتىرىستارىندا قارالاتىن ماسەلەلەر تالقىلاندى.
الداعى بەيسەنبىدە سەناتورلار «قازاقستان رەسپۋبليكاسى مەن ازيا دامۋ بانكى اراسىنداعى قارىز تۋرالى كەلىسىمدى (جاي وپەراتسيالار) (فيسكالدىق باسقارۋ جانە قارجى سەكتورى رەفورمالارىنىڭ باعدارلاماسى – 1-كىشى باعدارلاما) راتيفيكاتسيالاۋ تۋرالى», «قازاقستان رەسپۋبليكاسى مەن ازيا ينفراقۇرىلىمدىق ينۆەستيتسيالار بانكى اراسىنداعى قارىز تۋرالى كەلىسىمدى (فيسكالدىق باسقارۋ جانە قارجى سەكتورى رەفورمالارىنىڭ باعدارلاماسى – 1-كىشى باعدارلاما) راتيفيكاتسيالاۋ تۋرالى» جانە «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى («ينكليۋزيۆتى جانە تۇراقتى ەكونوميكالىق ءوسۋ» اتتى دامۋ ساياساتىن قارجىلاندىرۋعا ارنالعان قارىز) راتيفيكاتسيالاۋ تۋرالى» زاڭداردى قارايدى.
سونداي-اق پالاتا وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك ءبىلىم بەرۋ جيناقتاۋ جۇيەسى, اقپارات, قوعامدىق دامۋ, مادەنيەت جانە ارحيۆ ءىسى سالالارىندا ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قارالادى. بۇل زاڭدا «كەلەشەك» بىرىڭعاي ەرىكتى جيناقتاۋشى جۇيەسىنىڭ قىزمەتىن قۇقىقتىق رەتتەۋ كوزدەلگەن. اتالعان جۇيەنى قۇرۋ جونىندە مەملەكەت باسشىسى ءوزىنىڭ «ادىلەتتى قازاقستاننىڭ ەكونوميكالىق باعدارى» اتتى جولداۋىندا ايتقان ەدى.
«كەلەشەك» باعدارلاماسى جوعارى ءبىلىم بەرۋدى, كوللەدجدە نەمەسە ماگيستراتۋرادا وقۋدى قوسا العاندا, ءبىلىم بەرۋ جيناقتارىن قالىپتاستىرۋعا ارنالعان. بۇل باستاما مەملەكەتتىڭ, اتا-انالاردىڭ جانە قارجى ينستيتۋتتارىنىڭ قاتىسۋىن كوزدەيدى.
سونىمەن قاتار بيۋرودا ماجىلىستەن كەلىپ تۇسكەن زاڭدار جۇمىس ءۇشىن سەناتتىڭ تۇراقتى كوميتەتتەرىنە ءبولىنىپ بەرىلدى.