اسپانتاۋ اياسىنداعى اۋداندىق مادەنيەت ۇيىندە «كەگەن» حالىق تەاترىنىڭ ارتىستەرى دراماتۋرگ بەكسۇلتان جاكەەۆتىڭ «تاعدىر» اتتى دراماسىن ساحنالادى. قوعامداعى ادامي قۇندىلىقتاردىڭ قۇلدىراپ كەتكەندىگىن بەينەلەيتىن سپەكتاكلدىڭ رەجيسسەرلەرى قازاقستاننىڭ ەڭبەك سىڭىرگەن قايراتكەرلەرى ومار قيقىم مەن بەكجان تۇرىس ەكەندىگىن ەستىگەن ەل قويىلىمدى تاماشالاۋعا تايلى-تۇياعىمەن جيىلىپ, ينە شانشار ورىن بولماۋى – اۋىل تەاترىنا سونى سەرپىن بەردى.
قارتايعان شاعىندا ءتورت قابىرعاعا تەلمىرىپ, قيالىنداعى بايبىشەسىمەن سىرلاسۋى ارقىلى جاس وسكىننىڭ جۇرەگىنە مەيىرىم مەن ادامگەرشىلىكتىڭ ءدانىن ەگىپ, ۇلتتىق ءتالىم-تاربيە ءسىڭىرۋدى ماقسات ەتكەن سپەكتاكلدىڭ كوركەمدىك مازمۇنىن اشۋعا تەاتر اكتەرلەرى از تەر توكپەگەن. قويىلىم كەيىپكەرلەرىن الماتى وبلىسىنىڭ قۇرمەتتى ازاماتى, قازاقستاننىڭ ەڭبەك سىڭىرگەن مادەنيەت قايراتكەرى ناعيما تالاسباەۆا, اۋداندىق مادەنيەت ءۇيىنىڭ رەجيسسەرى نۇرباقىت ارشىن جانە «كەگەن» حالىق تەاترىنىڭ ارتىستەرى اقمارال سۇلەيمەن, باحارگۇل ايتباەۆا, انارا مۇستافاەۆا, ايىم تىلەۋكەەۆا, نۇرىم بايبالا, كادىربەك سۇلەيمەن سىندى تالانتتى ارتىستەر سومداپ, شەبەرلىكتەرىنە ءتانتى ەتتى.
«جارتى عاسىردان اسقان «كەگەن» حالىق تەاترى زامان كوشىنەن قالماي, جاڭا بۋىننىڭ قالىپتاسۋىنا, ولاردىڭ قابىلەت-قارىمىنا قاراي قويىلىمدار قويۋدان جاڭىلعان ەمەس. سونىڭ ناتيجەسىندە جەتىستىكتەرىمىز دە كوپ. تالاي سىن-بەلەستەردەن وتتىك. تاعدىرى تالقىعا تۇسكەن قارتتاردىڭ ءومىرىن ارقاۋ ەتكەن «تاعدىر» قويىلىمىن ساحنالاۋدا ونەردىڭ قوس تارلانى ومار قيقىم مەن بەكجان تۇرىستىڭ اتسالىسۋى, شىن مانىندە, تەاترىمىزدىڭ مەرەيىن ءوسىرىپ, مارتەبەسىن بيىكتەتتى. بۇگىنگى ءومىردى بەينەلەيتىن سپەكتاكل انشلاگپەن ءوتتى», دەيدى قازاقستاننىڭ ەڭبەك سىڭىرگەن مادەنيەت قايراتكەرى, تەاتر رەجيسسەرى ناعيما تالاسباەۆا.
اۋداندىق مادەنيەت ۇيىندە ەكى كۇن ساحنالانعان سپەكتاكلدىڭ پرەمەراسى كورەرمەننىڭ قوشەمەتىنە بولەندى. قارتتاردىڭ ءومىرىن ارقاۋ ەتكەن قويىلىمدى ساحنالاعان تەاتر ونەرپازدارىنا اۋدان اكىمى ن.تەڭىزباەۆ جۇرتشىلىق اتىنان العىس ءبىلدىردى.
«قازاقتىڭ جۇرەگى – قالادا ەمەس, دالادا» دەيتىن ەدىڭىز. وزدەرىڭىز دە اۋىل تەاترىنان قانات قاقتىڭىزدار, سوندىقتان «كەگەن» حالىق تەاترىنا قولداۋ ءبىلدىرىپ, قويىلىمعا قولۇشىن بەرسەڭىزدەر» دەگەن اۋداندىق مادەنيەت ءۇيىنىڭ ديرەكتورى ەرنات ىسقاقتىڭ ءبىراۋىز ءسوزىن جەرگە تاستاماي, وسى ىسكە تاۋەكەل ەتتىك. ءتۇرلى تاعدىردى ارقاۋ ەتكەن سپەكتاكلدى ساحنالادىق. بىزبەن بىرگە جۇمىس ىستەگەن حالىق تەاترىنىڭ اكتەرلەرى دە شابىتتانىپ, اشىلا ونەر كورسەتتى. تەاتر – ءتالىم مەن تاعىلىمنىڭ قاينار كوزى. قازىرگى ۋاقىتتا رۋحاني ازعىندىق بەلەڭ الىپ, قازاقى قۇندىلىقتارىمىز قۇنسىزدانىپ جاتىر. ارزان كۇلكى, ويسىز ۇيقىنىڭ سالماعى باسىپ تۇرعانى اقيقات. جالپى, قازاق بولمىسىنىڭ قازىعى – تەكتىلىك دەسەك, بۇگىنگى بۋىن سودان الىستاپ, قاتىگەزدىك پەن يمانسىزدىققا بوي الدىرعان وعاش وقيعالار مەن قاۋىپتى قۇبىلىستار جيىلەپ كەتتى. سوندىقتان اۋىل مادەنيەتىن وركەندەتىپ, تەاتردىڭ مارتەبەسىن كوتەرۋگە, كورەرمەنگە وي سالارلىق كوركەم دۇنيەلەر ۇسىنۋدى ءوزىمىزدىڭ جاۋاپكەرشىلىگىمىزگە الدىق», دەيدى قويىلىمنىڭ باس كەيىپكەرىن سومداعان ونەر قايراتكەرى بەكجان تۇرىس.
كورەرمەننىڭ كوزايىمىنا اينالعان «كەگەن» حالىق تەاترى 1968 جىلى قۇرىلعان. قازىرگى تاڭدا 15 ادام تۇراقتى جۇمىس ىستەيدى. تەاتر ۇجىمى العاشقى جىلى م.اۋەزوۆتىڭ «قاراگوز», «ەڭلىك-كەبەك» درامالارىن ساحنالاپ «حالىق» تەاترى دەگەن قۇرمەتتى اتاقتى يەلەنگەن. تىنباي ەڭبەكتەنۋدىڭ ارقاسىندا بۇكىلوداقتىق ءى, ءىى, ءىىى فەستيۆالدار لاۋرەاتى اتانعان. التىن مەدالدار الىپ, اۆتوبۋس يەلەنگەندەرى دە تاريح بەتىندە.
«1988 جىلى پولشانىڭ زەلونوگور قالاسىندا وتكەن حالىقارالىق فولكلورلىق-ەتنوگرافيالىق انسامبلىنە تەاتر جانىنان قۇرىلعان «توعىزبۇلاق تولقىندارى» فولكلورلىق-ەتنوگرافيالىق ءانسامبلى قاتىسىپ, ءى دارەجەلى ديپلوممەن جانە «ۇلكەن التىن» مەدالىمەن ماراپاتتالدى. 2002 جىلى ءىلياس جانسۇگىروۆ اتىنداعى مادەنيەت سارايىندا وتكەن اۋدان كۇندەرىندە تەاتردىڭ «ايمان-شولپان» سپەكتاكلى جوعارى باعالانىپ, «پاز» اۆتوبۋسىن يەلەندىك. مۇنىڭ بارلىعىنا تەاتر ۇجىمى تاباندىلىعىنىڭ ارقاسىندا قول جەتكىزدىك. اراعا ەكى جىل سالىپ اكادەميالىق م.اۋەزوۆ اتىنداعى دراما تەاتردا مادەنيەت مينيسترلىگى ۇيىمداستىرعان رەسپۋبليكالىق حالىق تەاترلارى بايقاۋىندا م.شامقالوۆتىڭ «قايىن ەنە مەن كەلىن» اتتى كومەدياسىن قويدىق. سانامالار بولساق, جارتى عاسىردان اسقان ۋاقىت ارالىعىندا «كەگەن» حالىق تەاترى وسى ۋاقىتقا دەيىن ۇلكەندى-كىشىلى 50-گە جۋىق پەسا ساحنالاعان ەكەن», دەپ تەاتر تاريحىن تارقاتقان ناعيما تالاسباەۆا سوڭعى شيرەك عاسىردا دا جەمىستى ەڭبەك ەتكەندەرىن تىلگە تيەك ەتتى.
ەكى جىل بۇرىن الماتى وبلىستىق حالىق تەاترلار بايقاۋىندا باس جۇلدە يەلەنگەن «كەگەن» حالىق تەاترىنىڭ ارتىستەرى اۋداندا وتكەن بارلىق مادەني ءىس-شاراعا قاتىسىپ, ەل ىقىلاسىنا بولەنىپ جۇرگەنىن ايرىقشا اتاۋ ابزال.
الماتى وبلىسى