وسى جىلدىڭ 11 ايىندا الماتى وبلىسىندا 23 مىڭعا جۋىق بالا ومىرگە كەلگەن. ولاردىڭ 204-ءى ەگىزدەر بولسا, 1 ۇشەم بار. سونىڭ ىشىندە وبلىس ورتالىعى قوناەۆ قالاسىندا 1000-نان استام نارەستە دۇنيە ەسىگىن اشقان.
ەمدەۋ مەكەمەسىنىڭ پەرزەنتحانا بولىمشەسىندە بۇگىنگى ۋاقىت تالابىنا ساي كوپتەگەن جاڭاشىلدىق ورىن الدى. باستىسى, بوسانۋ بولمەلەرى جەكە جوسپارلانىپ, ولار ساپالى تۇردە بارلىق قاجەتتى قۇرال-جابدىقتارمەن قامتاماسىز ەتىلدى. بوسانۋ بولمەلەرىنە ىڭعايلى ترانسفورمەر توسەكتەر قويىلىپ, كارديومونيتور, بالانىڭ كيىمىن اۋىستىرعاندا جىلىتىلاتىن ۇستەلدەر, وپەراتسيالىق شامدار, ەلەكتروندى تارازىلار, باسقا دا كەرەك-جاراقپەن جابدىقتالۋى ەرەكشە نازار اۋدارتادى. سونىمەن قاتار تەك ءبىر رەتتىك جيىنتىقتار, كاتەتەرلەر, ينفۋزيالىق جۇيەلەر قولدانىلادى. پەرزەنتحانا مەن گينەكولوگيالىق بولىمشەلەردىڭ مەديتسينالىق قۇرال-جابدىقتارمەن قامتىلۋى بۇگىندە 100 پايىزدى قۇراپ وتىر.
قوناەۆ قالالىق كوپسالالى اۋرۋحاناسىنىڭ پەرزەنتحاناسىندا ايەلدەر بوساناتىن بولمەلەردىڭ وتە ىڭعايلى ءارى قولايلى ەتىپ جاسالعانىنا جۋىردا بوسانعان جاس انا ريزاشىلىعىن ءبىلدىردى. ونىڭ سوزىنشە, ايەل تولعاتقاندا ءوزىن ىڭعايلى سەزىنىپ, پالاتادا ەركىن قوزعالىستا بولادى. ءتىپتى سۇيىكتى اۋەنىن تىڭداي الاتىنى ايەلدەردىڭ تولعاعىن جەڭىلدەتىپ, قورقىنىشىن سەيىلتۋگە سەپتەسەدى. سونىمەن قاتار جەكە كيىمدەرى مەن گيگيەنالىق قۇرالدارىن پايدالانۋعا مۇمكىندىك بار.
ء«بىزدىڭ پەرزەنتحانانىڭ دارىگەرلەرى تابيعي بوسانۋدى قولدايدى. سوندىقتان دارىگەر تەك بوسانۋ كەزەڭىن باقىلايدى, ارالاسادى, تەك قاتاڭ مەديتسينالىق سەبەپتەرمەن ءدارى-دارمەكتەردى قولدانادى. بوسانۋ كەزىندەگى كەز كەلگەن مانيپۋلياتسيالار مەديتسينالىق ارالاسۋ قاجەتتىلىگىن ەگجەي-تەگجەيلى ءتۇسىندىرىپ, بوسانعان ايەلدىڭ كەلىسىمىن العاننان كەيىن عانا جۇزەگە اسىرىلادى. بولىمشەدە دەنى ساۋ جۇكتى ايەلدەرگە عانا ەمەس, سونىمەن قاتار تاۋەكەل توبىنا جاتاتىن ناۋقاستارعا, پەريناتالدىق پروبلەمالارى بار ايەلدەرگە دە جوعارى بىلىكتى مەديتسينالىق كومەك كورسەتىلەدى. سونداي-اق كەسار تىلىگىنەن كەيىن جاتىرىندا تىرتىعى بار ايەلدەردى دە تابيعي جولمەن بوساندىرۋ تاجىريبەسى جۇزەگە اسىرىپ جاتىر. كەشەندى باعالاۋدان كەيىن انامنەز دەرەكتەرى, الدىڭعى وپەراتسيا كورسەتكىشتەرىن ەگجەي-تەگجەيلى قاراستىرامىز. تابيعي جولمەن ايەلدىڭ ءوزى بوسانۋى مۇمكىندىگىن انىقتايمىز. بارلىق مەديتسينالىق ءىس-شارالاردى تەك تاجىريبەلى اكۋشەر-گينەكولوگتەر جۇرگىزەدى, اۋرۋحانا ديرەكتورى, جوعارى ساناتتى اكۋشەر-گينەكولوگ ايمان عالىمجانقىزى جەكە باقىلاۋىندا ۇستايدى», دەيدى ايەلدەر كەڭەسىنىڭ اكۋشەر-گينەكولوگ دارىگەرى نازگۇل ەلەۋسىزوۆا.
الماتى وبلىسى