اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ فيلولوگيا فاكۋلتەتىندە قىتاي ءتىلى جانە قىتايتانۋ كافەدراسىنىڭ سالتاناتتى اشىلۋ ءراسىمى ءوتتى.
اتالعان كافەدرانىڭ اشىلۋى تىلدىك, مادەني قۇزىرەتتىلىكتەردى جەتىلدىرۋ ارقىلى ەكى ەل اراسىنداعى بايلانىستى نىعايتۋ, قوسديپلومدىق ءبىلىم بەرۋ نەگىزىندە وقىتۋ, اكادەميالىق ۇتقىرلىق ماسەلەسىن جولعا قويۋ, قىتاي ۋنيۆەرسيتەتتەرىمەن, عىلىمي زەرتتەۋ ورتالىقتارىمەن ىنتىماقتاستىق ورناتۋ, جاھاندانۋ كەزەڭىندە ستۋدەنتتەردى ءتىل, ادەبيەت, اۋدارما, حالىقارالىق قاتىناستار, بيزنەس, ءبىلىم بەرۋ جانە عىلىم سالالارىندا جۇمىس ىستەۋ ءۇشىن قىتاي ءتىلى مەن مادەنيەتى, تاريحى بويىنشا تەرەڭ بىلىممەن قامتاماسىز ەتۋدى ماقسات ەتەدى.
قىتاي ءتىلى جانە قىتايتانۋ كافەدراسىنىڭ اشىلۋى اياسىندا «كاليگرافيانى وقىتۋدا تسيفرلىق تەحنولوگيانى قولدانۋ ەرەكشەلىگى» اتتى عىلىمي سەمينار ءوتتى. اتالعان سەميناردا تسزيانسي عىلىم-تەحنولوگيا پەداگوگيكالىق ۋنيۆەرسيتەتىنىڭ پروفەسسورلارى چەن سيۋپين مەن يۋ چاو عىلىمي بايانداما جاسادى.
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى بولات تىلەپ كافەدرانىڭ اشىلۋ سالتاناتىندا ۋنيۆەرسيتەتتىڭ ساپالى ءبىلىم بەرۋ جۇيەسىن ودان ءارى جەتىلدىرۋگە, ۇستازدارىمىزدىڭ كاسىبي وسۋىنە جانە ستۋدەنتتەردىڭ ءبىلىمى مەن شىعارماشىلىق الەۋەتىن حالىقارالىق دەڭگەيدە دامىتۋعا, ەكى ەل اراسىنداعى ءبىلىم-عىلىم سالاسىنداعى ىنتىماقتاستىقتى كەڭەيتۋگە ىقپال ەتۋ ماقساتىندا اشىلىپ وتىرعان قىتاي ءتىلى جانە قىتايتانۋ كافەدراسىنىڭ الداعى جۇمىسىنا ساتتىلىك تىلەيتىندىگىن اتاپ ءوتتى.
پرەزيدەنت قاسىم-جومارت توقاەۆ پەن قحر-دىڭ باسشىسى سي تسزينپينمەن استاناداعى وتكەن كەزدەسۋىندە: «قازاقستان مەن قىتاي اراسىنداعى قارىم-قاتىناستىڭ دەڭگەيى قاشاندا جوعارى, ەكى ەلدىڭ سەرىكتەستىگى بىرىككەن ۇلتتار ۇيىمى, شانحاي ىنتىماقتاستىق ۇيىمى, ازياداعى ءوزارا ءىس-قيمىل جانە سەنىم شارالارى جونىندەگى كەڭەس اياسىندا تابىستى دامىپ كەلە جاتىر», دەگەن ەدى. سونىڭ نەگىزىندە عىلىم جانە جوعارى ءبىلىم ءمينيسترى ساياسات نۇربەك: «ەلىمىزدە ۇلتتىق جوعارى وقۋ ورىندارىندا قىتاي ءتىلى كافەدراسى اشىلادى, قىتاي ءتىلى ەكىنشى شەت ءتىلى رەتىندە وقىتىلادى», دەپ مالىمدەگەن. وسى ماقساتتا ەكى ەلدىڭ ءتيىستى مينيسترلىكتەرى بىرقاتار كەلىسىمشارتقا قول قويعان بولاتىن. قىتاي ءتىلى جانە قىتايتانۋ كافەدراسى ەكى ەل باسشىلارىنىڭ ۋاعدالاسقان كەلىسىمدەرىنە وراي اباي ۋنيۆەرسيتەتىندە اتقارىلىپ وتىرعان ماڭىزدى ءىس-شارا ەكەنى ايقىن.
وسى رەتتە ستۋدەنتتەر قىتاي ءتىلىنىڭ نەگىزدەرىن عانا ەمەس, سونىمەن قاتار سول ەلدىڭ باي مادەنيەتىن, ءداستۇرىن, قۇندىلىقتارى مەن دۇنيەتانىمىن تەرەڭ مەڭگەرۋگە مۇمكىندىك الاتىندىعىن دا ايتا كەتكەنىمىز ءجون. ويتكەنى قىتاي ەلى – قايتالانباس جانە ەجەلگى كونە داستۇرلەرگە باي, كوپعاسىرلىق تاريحى, ەرەكشە فيلوسوفياسى جانە قارقىندى دامىپ كەلە جاتقان ەكونوميكاسى بار ەل. ال قىتاي ءتىلى – الەمدەگى ەڭ كونە ءارى زاماناۋي تىلدەردىڭ ءبىرى. بۇل ەلدىڭ مادەنيەتىن ءتىلى ارقىلى تانۋ, زەرتتەۋ الەمدى تەرەڭىرەك تۇسىنۋگە جانە ادامزات رۋحانياتىن بايىتۋعا مۇمكىندىك بەرەدى دەپ ويلايمىز.
اتالعان ءىس-شاراعا قحر-دىڭ الماتى قالاسىنداعى باس كونسۋلدىڭ اكادەميالىق ماسەلەلەر جونىندەگى ديرەكتورى حۋان سياومين, قحر-دىڭ تسزيانسي عىلىم-تەحنولوگيا پەداگوگيكالىق ۋنيۆەرسيتەتتەرىنىڭ باسشىلارى, عالىمدارى, قحر-دىڭ گۋاندۋن وندىرىستىك-تەحنيكالىق ۋنيۆەرسيتەتىنىڭ عالىمدارى, ءال-فارابي اتىنداعى قازۇۋ, ابىلاي حان اتىنداعى قازحقجاتۋ-دىڭ تانىمال عالىمدارى, اباي اتىنداعى قازۇپۋ وقىتۋشىلارى قاتىسىپ, ىزگى تىلەكتەرىن ءبىلدىردى.
قازىر فاكۋلتەتتە 300-دەن اسا ستۋدەنت قىتاي ءتىلى ماماندىعى بويىنشا ءبىلىم الىپ جاتىر. قىتاي ءتىلىن ۇيرەنۋگە دەگەن سۇرانىس جىلدان-جىلعا ءوسىپ كەلەدى. سول سۇرانىسقا بايلانىستى ۋنيۆەرسيتەتىمىزدە قىتاي ءتىلى جانە قىتايتانۋ كافەدراسى رەسمي تۇردە اشىلىپ, ءوز جۇمىسىن باستاماق. اتالعان كافەدرا بولاشاقتا قىتاي ءتىلىن مەڭگەرگەن, جوعارى بىلىكتى مامانداردى دايارلاۋ ىسىنە ۇلكەن ۇلەس قوسادى دەگەن سەنىمدەمىز.
الۋا تاڭجارىقوۆا,
اباي اتىنداعى قازۇپۋ فيلولوگيا فاكۋلتەتىنىڭ دەكانى