مەملەكەت باسشىسى قاسىم-جومارت توقاەۆ سۋ قاۋىپسىزدىگىن نىعايتۋعا باعىتتالعان شارالاردى بىرلەسىپ قابىلداۋعا شاقىردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«بارشا ادامزات, اسىرەسە شالعايدا تىرشىلىك ەتىپ جاتقان تۇرعىندار مەن حالىقتاردىڭ وسال توبى سانيتارلىق تالاپتارعا ساي كەلەتىن تازا اۋىزسۋعا قول جەتكىزۋگە ءتيىس. بۇل – ولاردىڭ قۇقى. كليمات پەن سۋ ينفراقۇرىلىمىنا ارنالعان ماقساتتى ينۆەستيتسيالار سۋ كوزىمەن قامتاماسىز ەتىپ, ورنىقتى وسىمگە سەپتىگىن تيگىزەدى. وسى ارقىلى تۇتاس وڭىرلەر وركەندەيدى. قازاقستاننىڭ تازا اۋىزسۋعا جاپپاي قول جەتكىزۋدى كوزدەيتىن Freshwater Challenge جاھاندىق باستاماسىنا قوسىلۋى ەلىمىزدىڭ وسى ماقساتقا جەتۋگە بەيىل ەكەنىن راستايدى», دەدى پرەزيدەنت.
مەملەكەت باسشىسىنىڭ پىكىرىنشە, سۋ كوزدەرىن ونەركاسىپتىك, حيميالىق, اۋىلشارۋاشىلىق جانە تۇرمىستىق لاستانۋدان قورعاۋ ىسىندە تەحنولوگيالىق يننوۆاتسيالار مەن رەتتەۋ تەتىكتەرىن قولدانۋ قاجەت. سۋدان تارشىلىق كورمەۋدىڭ ماڭىزدى اسپەكتىلەرىنىڭ ءبىرى – سۋ قويمالارىنىڭ الەۋەتىن ارتتىرۋ, مۇزدىقتاردى ساقتاۋ, سۋارۋدىڭ يننوۆاتسيالىق جۇيەسىن ەنگىزۋ.
قاسىم-جومارت توقاەۆ مۇزدىقتاردى قورعاۋ مەن زەرتتەۋگە ارنالعان جاھاندىق ورتالىقتاردى بىرىكتىرەتىن سەرىكتەستىك قۇرۋدى ۇسىندى.
«مۇزدىقتار سۋ الماسۋ تسيكلىندە ايرىقشا ءرول اتقارادى. ولار دۇنيە جۇزىندەگى 2 ميللياردقا جۋىق ادامدى سۋمەن قامتاماسىز ەتەتىن وزەن-كولدەردى قورەكتەندىرەدى. سوندىقتان مۇزدىقتاردىڭ ەرۋىنە جول بەرمەي, تىرشىلىك نارىنە مۇقتاج وڭىرلەردەگى سۋ رەسۋرستارىن باسقارۋ ستراتەگياسىن قولداۋ ءۇشىن بىرلەسكەن زەرتتەۋ جۇمىستارىن جۇرگىزىپ, بىرىڭعاي سۋ ساياساتىن ازىرلەگەن ءجون», دەدى مەملەكەت باسشىسى.
قاسىم-جومارت توقاەۆ سۋعا بايلانىستى تۋىندايتىن تابيعات اپاتتارىنىڭ الدىن الۋ سۋ قاۋىپسىزدىگىنىڭ ماڭىزدى بولىگى سانالاتىنىنا نازار اۋداردى. جىل سايىن سۋ تاسقىنى مەن قۋاڭشىلىقتان الەمدە 1,5 ميللياردتان استام ادام زارداپ شەگەدى. اسىرەسە, بۇل شاعىن ارالدار مەن جاعالاۋدا تۇراتىن حالىقتىڭ ءالسىز توپتارىنا قاتتى اسەر ەتەدى. پرەزيدەنت ازاماتتاردى قورعاۋ جانە قاۋىپ-قاتەردى ازايتۋ ماقساتىندا ەرتە ساقتاندىرۋ جۇيەسىن جەتىلدىرۋ وتە وزەكتى دەپ سانايدى.