زارەچنىي كەنتىندەگى ىشكى ىستەر مينيسترلىگى قىلمىستىق-اتقارۋ جۇيەسى كوميتەتىنىڭ «№57 مەكەمەسى» رمم-ءنىڭ ونەركاسىپتىك ايماعىندا جيھاز وندىرەتىن زاۋىتتىڭ ىسكە قوسىلۋىنا وبلىس اكىمدىگى مەن پروكۋراتۋرا قولداۋ بىلدىرگەن. بۇدان بىلاي جازاسىن وتەۋشىلەردىڭ جاڭا زاۋىتتا ەڭبەك ەتۋىنە مۇمكىندىك تۋدى.
زاۋىتتىڭ ءونىم ءوندىرۋ قۋاتى ايىنا 6 000 دانا دايىن جيھاز جاساۋ. ونىمدەرى ەلىمىزدىڭ بارلىق ايماعىنا ساتىلىمعا شىعارىلادى. نارىققا «Beren» برەندىمەن تارالاتىن وتاندىق جيھازدىڭ جوعارى ساپاعا يە بولارىنا ەش كۇمان جوق. زاۋىتتىڭ ىسكە قوسىلۋىنا «NAT Invest» جشس تاراپىنان 250 ملن تەڭگە جەكە ينۆەستيتسيا تارتىلعان. سونداي-اق ءوندىرىس ورنى قىتايدان الىنعان ەڭ سوڭعى ۇلگىدەگى ونەركاسىپتىك جابدىقتارمەن جابدىقتالعان. زاۋىتتا ەڭبەك ەتەتىن جۇمىسشىلارعا بارلىق جاعداي جاسالعان. مۇندا ەندى تۇراقتى تۇردە 30 جازاسىن وتەۋشى ەڭبەك ەتىپ, الەۋمەتتىك قولداۋلارعا يە بولماق.
زاۋىتتىڭ اشىلۋ سالتاناتىندا الماتى جانە جەتىسۋ وبلىستارى بويىنشا قىلمىستىق-اتقارۋ جۇيەسى دەپارتامەنتى باستىعىنىڭ ورىنباسارى م.سابىروۆ, «Amanat» پارتياسى وبلىستىق فيليالىنىڭ اتقارۋشى حاتشىسى ە.جاقىپوۆ, الماتى وبلىسى بويىنشا مەكەمەلەردە قىلمىستىق جازالاردىڭ ورىندالۋىن قاداعالاۋ جانە زاڭدىلىعى جونىندەگى مامانداندىرىلعان پروكۋرورىنىڭ وكىلى د.بالعابەك ءسوز سويلەپ, جازاسىن وتەپ جۇرگەندەردى ەڭبەككە تارتۋ, ولاردىڭ بولاشاقتاعى ومىرىنە وڭ اسەرىن تيگىزەتىنىن العا تارتتى. «جازاسىن وتەۋشىلەردىڭ ەڭبەككە ارالاسۋى – ۋاقىتتارىن ءتيىمدى وتكىزۋمەن قاتار, جيھاز جاساۋداعى شەبەرلىكتەرىن شىڭداپ, كاسىپتى يگەرۋىنە سەپتىگىن تيگىزەتىن بولادى.
تۇزەۋ مەكەمەسىندەگى مامانداردىڭ سوزىنشە, وندا 33 جەكە كاسىپورىن جۇمىس ىستەيدى. اتالعان كاسىپورىنداردا 600-گە تاياۋ جازاسىن وتەپ جاتقان ازامات ەڭبەك ەتەدى. ولارعا 85 مىڭ تەڭگە كولەمىندە جالاقى بەرىلەدى. قاتاڭ كۇزەتىلەتىن ايماقتا ورنالاسقان عيماراتتار تەگىن بەرىلىپ, ارزان جۇمىس كۇشىمەن قامتىلادى. سوندىقتان تۇرمەدە وندىرىستىك نىسان اشۋ كاسىپكەرلەر ءۇشىن ءتيىمدى ەكەندىگى تىلگە تيەك بولدى. جازاسىن وتەۋشىلەر تاپقان تابىسى ەسەبىنەن مەملەكەت نەمەسە جەكە تۇلعالار الدىنداعى قارىزىن قايتارادى. مۇنداي مۇمكىندىك ولاردىڭ جازاسىن جەڭىلدەتۋمەن قاتار, بوستاندىققا شىعۋ مەرزىمىن جاقىنداتا تۇسەدى.
الماتى وبلىسى