كوكشەتاۋ قالاسىنىڭ تۇرعىنى سوت ارقىلى الاياقتارعا اۋدارعان 1 ميلليون تەڭگەسىن قايتارىپ الدى, دەپ حابارلايدى Egemen.kz.
سوت ماتەريالدارىنا سايكەس, وتكەن جىلدىڭ ءساۋىر ايىندا جابىرلەنۋشىنىڭ تەلەفونىنا بەلگىسىز نومىردەن قوڭىراۋ تۇسكەن. قوڭىراۋ شالعان ادام ءوزىن بانك قىزمەتكەرى رەتىندە تانىستىرىپ, جابىرلەنۋشىنىڭ اتىنا 1 ميلليون تەڭگە كولەمىندە نەسيە راسىمدەلىپ جاتقانىن حابارلاعان.
«الاياقتار ماسەلەنى «شەشۋ» ءۇشىن ونى بانكتىڭ «قاۋىپسىزدىك قىزمەتىمەن» بايلانىستىرعان. ولار جابىرلەنۋشىگە باسقا بانكتەن كارتا اشىپ, ونلاين نەسيە راسىمدەۋدى ۇسىنعان. سودان كەيىن اقشانى بانككە قايتارۋ ءۇشىن بەلگىلى ءبىر شوتقا اۋدارۋدى تالاپ ەتكەن», دەپ جازىلعان ىستە.
اقمولا وبلىستىق سوتىنىڭ ءباسپاسوز قىزمەتىنىڭ حابارلاۋىنشا, زاڭ بويىنشا, تۇلعا باسقا ادامنىڭ مۇلكىن زاڭسىز ساقتاسا, ول ونى قايتارۋعا مىندەتتى. بۇل ازاماتتىق كودەكستىڭ 953-بابىنىڭ 1-بولىمىنە سايكەس كەلەدى.
«سوت شەشىمىمەن جابىرلەنۋشىنىڭ تالاپ-ارىزى قاناعاتتاندىرىلىپ, الاياقتىق ارقىلى الىنعان 1 ميلليون تەڭگە جانە مەملەكەتتىك باج سالىعىنىڭ شىعىندارى جاۋاپكەردەن ءوندىرىلدى», دەپ جازىلعان حابارلامادا.
قازىرگى تاڭدا سوت شەشىمى زاڭدى كۇشىنە ەنگەن جوق.