الماتى وبلىسىندا ءۇش بارىمتاشى ۇستالدى

جۋىردا جامبىل اۋدانىندا پوليتسيا قىزمەتكەرلەرى 12 باس جىلقىنى ۇرلاۋ تۋرالى رەزونانستىق ءىستى اشتى. وقيعا 8 قاراشادا اقدالا اۋىلىندا بولعان. شارۋا قوجالىعىنىڭ يەسى جالپى قۇنى 10,6 ملن تەڭگەنى قۇرايتىن 12 باس جىلقىنىڭ ۇرلانعانى تۋرالى ارىزدانعان. پوليتسيا قىلمىستىق ءىستى تىركەپ, دەرەۋ ىزدەۋگە كىرىستى.

«جەدەل-ىزدەستىرۋ ءىس-شارالارى بارىسىندا كۇدىكتى ۇستالدى. ول بۇرىن سوتتالعان جەرگىلىكتى تۇرعىن بولىپ شىقتى. جاۋاپ الۋ كەزىندە ول ءوزىنىڭ كىناسىن تولىق مويىندادى. ەر ادام ۋاقىتشا ۇستاۋ يزولياتورىنا قامالدى. قازىرگى ۋاقىتتا ونىڭ باسقا دا وسىنداي قىلمىستارعا قاتىسى بار-جوعى تەكسەرىلىپ جاتىر», دەپ حابارلايدى اۋداندىق پوليتسيا وكىلدەرى.

وسىعان ۇقساس مال ۇرلاۋ وقيعالارى ىلە جانە ەڭبەكشىقازاق اۋداندارىندا تىركەلدى, وندا بارىمتاشىلار ءبىر جىلقى مەن ءىرى قارا مالدى ۇرلاپ اكەتكەن. كريمينالدىق پوليتسيا قىزمەتكەرلەرىنىڭ ۇيلەسىمدى جۇمىسىنىڭ ارقاسىندا كۇدىكتىلەر ۇستالدى. قىلمىستىق ءىس قوزعالىپ, تەرگەۋ جۇرگىزىلىپ جاتىر.

پوليتسيا مال يەلەرىنە ساقتىق شارالارىن ۇستانۋ كەرەكتىگىن ەسكەرتەدى. مالدىڭ ۇرلانۋىنا كوبىنەسە يەلەرىنىڭ نەمقۇرايدى قاراۋى نەمەسە يەسىز قالدىرۋى سەبەپ كورىنەدى. ءتارتىپ ساقشىلارى ازاماتتاردى قاسكۇنەمدەردىڭ قۇربانى بولماس ءۇشىن مالدارىن قاراۋسىز قالدىرماۋعا شاقىرادى.

الماتى وبلىسى