ماجارستانعا مەملەكەتتىك ساپارمەن كەلگەن پرەزيدەنت قاسىم-جومارت توقاەۆتى بۋداپەشت قالاسىنداعى كورول سارايىنىڭ ارىستاندار الاڭىندا رەسمي قارسى الۋ ءراسىمى ءوتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىن اسكەري وركەستردىڭ سۇيەمەلدەۋىمەن ماجارستان پرەمەر-ءمينيسترى ۆيكتور وربان قارسى الدى.
قۇرمەت قاراۋىلىنىڭ باستىعى راپورت بەرگەننەن سوڭ, ەكى ەلدىڭ مەملەكەتتىك ءانۇراندارى شىرقالدى. سودان كەيىن قۇرمەت قاراۋىلى مەن سالت اتتى گۆارديا سالتاناتپەن ساپ تۇزەپ ءوتتى. قاسىم-جومارت توقاەۆ پەن ۆيكتور وربان ءبىر-بىرىنە رەسمي دەلەگاتسيا مۇشەلەرىن تانىستىردى.