قارا ولەڭنىڭ قايماعىن قالقىپ, قورجىنىن توعايتقان اقىن, اۋدارماشى, «دارىن» مەملەكەتتىك جاستار سىيلىعىنىڭ لاۋرەاتى اقسۇڭقار اقىنبابانىڭ قازاقستان جازۋشىلار وداعىنىڭ 90 جىلدىعى قارساڭىندا مادەنيەت جانە اقپارات مينيسترلىگىنىڭ قولداۋىمەن «التاي – الاتاۋ اراسى» اتتى اۆتورلىق ءان-جىر شىعارماشىلىق كەشى ءوتتى. اۆتوردىڭ «مەن – التايدان ۇشقان اقسۇڭقار», «جانارتاۋ» جىر جيناقتارى, «جارىلىس» اتتى اۋدارما كىتابى جارىق كورگەن. الماتىنىڭ تورىندەگى كەشكە قازاقستان جازۋشىلار وداعى مەن دۇنيەجۇزى قازاقتارى قاۋىمداستىعى قولداۋ كورسەتتى.
قۇرمانعازى اتىنداعى ۇلتتىق حالىق اسپاپتار وركەسترىنىڭ كونتسەرت زالىندا وتكەن كەش شىمىلدىعىن ايگىلى قۇرمانعازى اتىنداعى وركەستر اشتى. رۋحتى جىر مەن جۇرەك تەربەر اندەردى ارقاۋ ەتكەن كەشتىڭ اشىلۋىندا اقىنعا مادەنيەت جانە اقپارات ۆيتسە-ءمينيسترى قانات ىسقاقوۆتىڭ, قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆتىڭ قۇتتىقتاۋ حاتتارى تابىس ەتىلدى. وندا اقسۇڭقار اقىنبابانىڭ قازاق رۋحانياتىنا قوسقان قۋاتتى جىرلارى وقىرمان جۇرەگىنەن ورىن الىپ قانا قويماي, جاس ۇرپاقتى رۋحاني بايلىققا جەتەلەيتىنى جازىلعان. قاسيەتتى اتاجۇرتقا كەلگەننەن بەرى ەلگە دەگەن ماحابباتى, ۇلتقا دەگەن قۇرمەتى ولەڭدەرىنىڭ نەگىزگى مازمۇنىنا اينالعانى اتالدى.
اقىن شىعارماشىلىق كەشىن «رۋح ماڭگى!» دەگەن ولەڭىمەن, سازگەر بەيبىت ورال ۇلى ءانىن جازعان ءوزىنىڭ ورىنداۋىنداعى «مەن ورالدىم» انىمەن باستادى.
«اقسۇڭقار اقىنبابا – ادەبيەتكە 90-جىلداردىڭ باسىندا كەلگەن بۋىن وكىلى. اقىن قىزداردىڭ اراسىندا ولەڭدەرىندە دە, مىنەزىندە دە اسقاق رۋح انداعايلاپ تۇراتىن ءبىر اقىن بولسا, ول – اقسۇڭقار اقىنبابا. اقسۇڭقاردى ءبىز 2000 جىلدىڭ باسىندا ءانشى رەتىندە مويىندادىق. كاسىبي انشىدەن كەم تۇسپەيدى. بۇل – ەكىنشى قىرى. ال ءۇشىنشى قىرىنا كەلسەك, جۋرناليستيكاداعى اتقارعان شارۋاسى از ەمەس. ول گازەتتە, سونداي-اق قازاق راديوسىندا ءونىمدى جۇمىس ىستەدى. ءبىرتالاي باعدارلامانىڭ اۆتورى اتاندى. مىسالى, كەزىندە «ۇيقىم كەلمەيدى» دەگەن باعدارلاماسىن قالىڭ جۇرتشىلىق ۇيىپ تىڭدايتىن. اقسۇڭقاردىڭ بەرگەنىنەن بەرەرى الدا دەگەن ۇمىتتەمىز» دەيدى اقىن, «ۇركەر» جۋرنالىنىڭ باس رەداكتورى جاراس سارسەك.
ونەر كوگىندە جۇلدىزى جارىق قارىنداسىنا قولداۋ بىلدىرە كەلگەن اعاسى شاشۋ ۇسەن ۇلى اقسۇڭقار موڭعوليانىڭ بايانولگەي ايماعىندا ورتا مەكتەپتى ءبىتىرىپ, اتاجۇرتتا جوعارى ءبىلىم العان تالانت يەسى ەكەندىگىن, اتا-اناسى دا ۇستازدىق ەتكەن, وتە ءبىلىمدى, دارىندى ادامدار بولعانىن ايرىقشا اتادى. «تاۋەلسىزدىك كەزەڭىندەگى قازاق پوەزياسىنا ەڭبەك ەتىپ جۇرگەنىمە شيرەك عاسىردان اسادى ەكەن. ال اتاجۇرتىما كەلگەنىمە 30 جىل تولىپتى. مەكتەپ بىتىرگەن جىلى كەلگەنمىن. سودان بەرگى ۋاقىتتا ادەبيەتكە, ونەرگە قوسقان ۇلەسىمدى, شىعارماشىلىقتاعى جاۋھارلارىمدى جيناقتاي كەلە, «التاي – الاتاۋ اراسى» دەگەن جەكە ءان-جىر شىعارماشىلىق كەشىمدى وتكىزۋدى ءجون كوردىم. ءان-جىر كەشىم دەۋىمنىڭ سەبەبى, ولەڭىم مەن ءانىمدى قاتار الىپ كەلە جاتپاسام دا, بويىما اقىندىق پەن انشىلىك قاتار قونعان ونەر. سول سەبەپتى, دومبىرام مەن قالامىم – قوس قاناتىم ىسپەتتى», دەيدى كوپتەگەن جىر ءمۇشايرانىڭ جۇلدەگەرى اقسۇڭقار اقىنبابا.
شىعارماشىلىق كەش اتى ايتىپ تۇرعانداي, اقىننىڭ وتىز جىلدا جيناقتالعان شىعارماشىلىعى, ياعني پوەزيا مەن ءان الەمىن شەبەر ۇيلەستىرگەن, جىرلارىمەن دە, اۋەلەتە سالعان تاماشا اندەرىمەن دە كورەرمەن كوڭىلىن رۋحاني سەرپىلتىپ, بايىتا تۇسكەنى انىق.
كەشتە اقىن پوەزياسىنان قويىلعان «ازاتتىق رۋحى», «التاي جىرى», «رومانس» قاتارلى پوەتيكالىق قويىلىمدار كورسەتىلىپ, تانىمال جاس انشىلەردىڭ ورىنداۋىندا «ماڭگىلىك ەل» ء(انى ب.ورال ۇلى), «تۇركىستانىم-تۇرانىم» ء(انى ا.ءساندىباي ۇلى) اندەرىنىڭ تۇساۋى كەسىلدى.