فرانتسيا پرەزيدەنتى ەممانيۋەل ماكروننىڭ شاقىرۋىمەن قازاقستان پرەزيدەنتى قاسىم-جومارت توقاەۆ فرانتسياعا مەملەكەتتىك ساپارمەن بارعانى بەلگىلى. ديپلوماتيالىق كەزدەسۋ اياسىندا مەملەكەتتەر باسشىلارى 2008 جىلى قابىلدانعان قازاقستان رەسپۋبليكاسى مەن فرانتسۋز رەسپۋبليكاسى اراسىنداعى ستراتەگيالىق ارىپتەستىك تۋرالى كەلىسىمگە سۇيەنە وتىرىپ, ەكى ەل اراسىنداعى سەنىمدى جانە تۇراقتى ديالوگتى نىعايتاتىن تەتىكتەردى جان-جاقتى تالقىلاعان ەدى, دەپ حابارلايدى Egemen.kz.
ساپار اياسىندا ق.توقاەۆ پەن ە.ماكرون ەكى مەملەكەتتىڭ اۋماقتىق تۇتاستىعىن قۇرمەتتەي وتىرىپ, 1991 جىلعى الماتى دەكلاراتسياسى نەگىزىندە وڭىردە بەرىك ءارى تۇراقتى بەيبىتشىلىك ورناتۋعا مۇمكىندىك بەرەتىن كەلىسىمگە قول قويۋدى جەدەلدەتۋگە تولىق قولداۋ ءبىلدىردى. سونداي-اق پرەزيدەنتتەر ترانسكاسپي حالىقارالىق كولىك باعىتىن دامىتۋ ءۇشىن وڭتۇستىك كاۆكازداعى تۇراقتىلىقتىڭ ماڭىزىن جەتكىزدى.
وسى ورايدا ساراپشى امانگەلدى قۇرمەت ۇلى كەلىسسوزدىڭ ازەربايجان حالقىنا وڭ ناتيجەسىن بەرە باستاعانىن ايتتى.
«قاسىم-جومارت توقاەۆتىڭ فرانتسياعا ساپارىنا بايلانىستى ازەربايجان مەدياسىندا قىزىق پىكىر ايتىلدى. ازەربايجان حالقى ق.توقاەۆ ديپلوماتياسىنىڭ ناتيجەسىندە ە. ماكروننىڭ وڭتۇستىك كاۆكازعا قاتىستى ۇستانىمى ءبىرشاما ادەكۆاتتى بولا باستاعانىن العا تارتادى. ايتپەسە فرانتسيا ازەربايجان-ارمەنيا ماسەلەسىندە باكۋ پوزيتسياسىن ۇدايى سىنايتىن. ەرەۆاندى تالاي جاقتاعان. ەندى وسى ريتوريكا وزگەرگەن كورىنەدى-مىس. شىنىمەن سولاي بولدى ما, جوق پا بىلمەيمىن, بىراق ازەربايجان باۋىرلار ق.توقاەۆ ساپارىنىڭ وزدەرى ءۇشىن پايدالى بولعانىن العا تارتا باستادى. قازاقستان ۋرانى فرانتسياعا تەك ازەربايجان جەرى ارقىلى جەتكىزىلۋى مۇمكىن ەكەنىن فرانتسۋزدارعا قازاقستان باسشىسى ءتۇسىندىردى دەگەندى ايتادى», دەيدى امانگەلدى قۇرمەت ۇلى.