جاڭا اتاۋعا يە الاتاۋ قالاسىنىڭ ەڭبەك شاعىن اۋدانىندا «جايلى مەكتەپ» جوباسى اياسىندا سالىنعان ءۇش قاباتتى 600 ورىندىق جاڭا مەكتەپ قولدانىسقا بەرىلدى.
«وڭىردەگى ءبىلىم سالاسىنىڭ باستى ماسەلەسى – ءۇشاۋىسىمدى وقىتۋ مەن ورىن تاپشىلىعى ەكەنى بەلگىلى. سوندىقتان ماسەلەنى شەشۋ ماقساتىندا وسى جىلى وبلىستا «جايلى مەكتەپ» جوباسى اياسىندا 26, جەكە ينۆەستور ارقىلى 4 جانە جەرگىلىكتى بيۋدجەت ەسەبىنەن 2 مەكتەپ قولدانىسقا بەرۋ جوسپارلانعان. بولاشاق جاستارىمىزعا جاھاندانۋ كەزەڭىندە ساپالى ءبىلىم مەن سانالى تاربيە بەرۋ ماڭىزدى. ەندىگى كەزەكتە, وبلىسىمىزدىڭ دارىندى بالالار سانى بۇگىنگى جاڭا دا جايلى مەكتەپتە ءبىلىم الاتىن وقۋشىلارمەن تولىعاتىنىنا سەنىمدىمىن», دەدى مەكتەپتىڭ اشىلۋ سالتاناتىندا ءسوز العان الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىم.
سونداي-اق ول مەكتەپ قۇرىلىسىن ساپالى ءارى ۋاقتىلى اياقتاعان مەردىگەر كومپانيا باسشىلىعىنا وبلىس اكىمىنىڭ العىس حاتىن تابىستادى.
العاشقى قوڭىراۋدىڭ سىڭعىرى ەستىلىپ, ەسىگى اشىلعان ەڭسەلى مەكتەپتىڭ تابالدىرىعىن اتتاعان وقۋشىلار مەن ۇستازداردىڭ جۇزدەرىنەن قۋانىش لەبى ەستى. ەندى ولاردىڭ ساباق ۇلگەرىمىن جاقسارتىپ, جان-جاقتى دامۋىنا ەش كەدەرگى جوعى بەلگىلى.
سەبەبى زاماناۋي ۇلگىدە سالىنعان مەكتەپتە ساپالى ءبىلىم الۋ ءۇشىن بارلىق جاعداي قاراستىرىلعان. مەكتەپتە سوڭعى ۇلگىدە جابدىقتالعان كابينەتتەر, ەرەكشە ءبىلىم الۋشىلارعا ارنالعان ينكليۋزيۆتى ورتالىق, شەبەرحانا, كىتاپحانا, روبوتتەحنيكا, STEM جانە موديفيكاتسيالى كابينەتتەر, سپورت زالى, اسحانا, ءماجىلىس زالدارى بالالار يگىلىگىنە قىزمەت ەتەتىن بولادى.
الماتى وبلىسى