Astana IT University عيماراتىندا مەكتەپ وقۋشىلارى اراسىنداعى II «Chess Class» وليمپياداسى ءوتتى. ءتۋرنيردى Freedom Broker كومپانياسىنىڭ قولداۋىمەن قازاقستاننىڭ شاحمات فەدەراتسياسى (KazChess) جانە «Chess Legends LTD» جك وتكىزدى, دەپ حابارلايدى Egemen.kz.
ءتۋرنيردىڭ اشىلۋ سالتاناتىندا KazChess پەن Astana IT University اراسىندا ىنتىماقتاستىق تۋرالى مەموراندۋمعا قول قويىلدى. مەموراندۋم ناتيجەسىندە شاحماتتى دامىتۋعا جانە كەڭىنەن تاراتۋعا باعىتتالعان بىرلەسكەن ءىس-شارالار جۇزەگە اسىرىلماق.
بيىلعى جارىسقا 12 وڭىردەن كەلگەن 35 كوماندا, ونىڭ ىشىندە استانا قالاسىنان 19 كوماندا, بارلىعى 174 ويىنشى قاتىستى. ءتۋرنيردىڭ جۇلدە قورى - 3 ميلليون تەڭگە, سايىس شۆەيتساريالىق جۇيە بويىنشا 7 تۋر كەزەڭىمەن ءوتتى.
وسى وليمپيادادا ءار كوماندا – 4 مەكتەپ وقۋشىسى جانە 1 مۇعالىمنەن جاساقتالدى. جاس ساناتى ەسكەرىلىپ 17-گە, 14-كە, 12-گە دەيىنگىلەر بويىنشا تاقتالارعا ءبولىندى, ال 4-ءشى تاقتادا قىزدار وينادى. سونداي-اق مۇعالىمدەر 5-ءشى تاقتادا, رەيتينگ بويىنشا سايىستى.
7 تۋردىڭ قورىتىندىسىندا پاۆلودار قالاسىنداعى №29 مەكتەپتىڭ كومانداسى چەمپيون اتاندى. 2-ورىندى رەسپۋبليكالىق فيزيكا-ماتەماتيكا مەكتەبىنىڭ كومانداسى ولجالادى. 3-ورىن استاناداعى نازارباەۆ زياتكەرلىك مەكتەبىنىڭ قۇراماسىنا بۇيىردى. 4-ورىندى الماتىداعى سۇلەيمەن دەميرەل اتىنداعى مەكتەپ-ينتەرنات-كوللەدجىنىڭ شاحماتشىلارى, 5-ورىندى الماتى وبلىسىنا قاراستى تالعار قالاسىنداعى ا.بايتۇرسىن ۇلى اتىنداعى №7 مەكتەپ-ليتسەيدەن كەلگەن كوماندا يەلەندى. جۇلدە العان كوماندالار قوماقتى اقشالاي سىياقى الدى.
بيىل ەكىنشى مارتە ۇيىمداستىرىلعان «Chess Class» وليمپياداسى – ەلىمىزدىڭ ءبىلىم بەرۋ جۇيەسىندە شاحماتتى كەڭىنەن تاراتۋدىڭ اۋقىمدى باعدارلاماسىنىڭ ءبىرى. بۇگىندە فەدەراتسيا بەيىندىك ۆەدومستۆولارمەن جانە سەرىكتەستەرمەن ىنتىماقتاسا وتىرىپ, 550 مەكتەپتىڭ 1-سىنىپتارىنا ارناپ «شاحمات نەگىزدەرى» باعدارلاماسىن ەنگىزدى, 42 مەكتەپتە باعدارلامانى 2-سىنىپتارعا ەنگىزۋ قولعا الىندى.
ايتا كەتسەك, ارنايى ازىرلەنگەن باعدارلاما بويىنشا تەگىن وقىعان 700-دەن استام مۇعالىمدەرگە ونلاين كۋرستار جانە بىلىكتىلىكتى ارتتىرۋ كۋرستارى ۇيىمداستىرىلعان.
جوعارى وقۋ ورىندارىمەن بىرگە «شاحمات پەداگوگى» minor باعدارلاماسى ازىرلەنىپ, 2025-2026 وقۋ جىلىندا ىسكە قوسىلاتىنى جوسپارلانىپ جاتىر.
بىلتىر ەل ۇكىمەتى شاحماتتى دامىتۋدىڭ 2023-2027 جىلدارعا ارنالعان كەشەندى جوسپارىن بەكىتكەن ەدى. سوعان سايكەس KazChess مەكتەپتەردە شاحمات كابينەتتەرى جەلىسىن كەڭەيتۋدى, ستۋدەنتتەردىڭ جانە مەكتەپ وقۋشىلارىنىڭ شاحمات ليگالارىن دامىتۋدى, سونداي-اق مۇعالىمدەرگە ارنالعان ونلاين تۋرنير وتكىزبەك.