پالاتا سپيكەرى ەرلان قوشانوۆتىڭ توراعالىعىمەن ءماجىلىس بيۋروسى ءوتىپ, وندا الداعى جالپى وتىرىستىڭ كۇن ءتارتىبى ناقتىلاندى.
دەپۋتاتتاردىڭ تالقىلاۋىنا «اكۆاوسىرۋ تۋرالى» ۇكىمەت ازىرلەگەن زاڭ جوباسى مەن وعان ىلەسپە تۇزەتۋلەردى ءبىرىنشى وقىلىمدا قاراۋ ۇسىنىلادى. زاڭ جوباسى اكۆاوسىرۋدى دامىتۋ سالاسىنداعى قاتىناستاردى رەتتەيتىن قۇقىقتىق تەتىكتەردى, ينۆەستيتسيا تارتۋعا جانە ەكونوميكانىڭ وسى سەكتورىنا شاعىن جانە ورتا بيزنەستى تارتۋعا ىقپال ەتۋ ماقساتىمەن ازىرلەنگەن. اتاپ ايتقاندا, سۋ قويمالارىن كونكۋرستىق نەگىزدە جانە كونكۋرستىق راسىمدەرسىز بەرۋ ءتارتىبى بەلگىلەنەدى. سونىمەن قاتار جەڭىلدەتىلگەن نەسيەلەندىرۋگە, ەڭبەك ونىمدىلىگىن ارتتىرۋدى عىلىمي قولداۋعا جانە ىنتالاندىرۋعا قوسىمشا مەملەكەتتىك قولداۋ شارالارى مەن باسقا دا بىرقاتار وزگەرىس ەنگىزىلەدى.
اقپارات, قوعامدىق دامۋ, مادەنيەت جانە مۇراعات ءىسى سالالارىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن جويۋ ماسەلەلەرى بويىنشا زاڭ جوباسى ەكىنشى وقىلىمدا قارالادى.
كۇن تارتىبىندە بىرقاتار حالىقارالىق قۇجاتتى راتيفيكاتسيالاۋ تۋرالى زاڭ جوبالارى دا بار. بۇل – ساحارانىڭ وڭتۇستىگىنە قاراي افريكا ەلدەرىنە جانە يراكقا شەكتەۋلى جانە بىرتىندەپ تاراتۋدى جۇزەگە اسىرۋعا مۇمكىندىك بەرەتىن ەۋروپا قايتا قۇرۋ جانە دامۋ بانكىن قۇرۋ تۋرالى كەلىسىم, ادەتتەگى وپەراتسيالارعا جارعىلىق كاپيتالدىق شەكتەۋدى جويۋ ماقساتىمەن ەۋروپا قايتا قۇرۋ جانە دامۋ بانكىن قۇرۋ تۋرالى كەلىسىم, سونداي-اق مەملەكەتتىك (مۋنيتسيپالدىق) ساتىپ الۋدى جۇزەگە اسىرۋ كەزىندە بانك كەپىلدىكتەرىن ءوزارا تانۋ تۋرالى كەلىسىم.
سونداي-اق ءماجىلىس كوميتەتتەرى ورىس ءتىلى جونىندەگى حالىقارالىق ۇيىم قۇرۋ تۋرالى راتيفيكاتسيالىق شارتتى جانە تەرروريزمدى قارجىلاندىرۋعا قارسى ءىس-قيمىل جونىندەگى ەۋرازيالىق توپتىڭ قىزمەتىنە قاتىستى جاڭا زاڭ جوباسىن جۇمىسقا قابىلدايدى.