ۇلتتىق مۋزەي «جىبەك جولىنىڭ ورتاق مۇراسى» ۆيرتۋالدى كورمەسىندە ءوز كوللەكتسياسىنان ون ەكسپونات ۇسىندى. جوبانى يۋنەسكو-نىڭ الماتىداعى وڭىرلىك كەڭسەسى جۇزەگە اسىرىپ وتىر.
ۆيرتۋالدى كورمە Google Arts & Culture پلاتفورماسىندا جاريالانعان. بۇل – الەمدەگى سەرىكتەس مادەني ۇيىمداردىڭ ونەر تۋىندىلارى مەن مادەني ارتەفاكتىلەرىنىڭ جوعارى ساپاداعى سۋرەتتەرى مەن بەينەلەرى بار Google باسقاراتىن ونلاين پلاتفورما.
قازىرگى ۋاقىتتا سەرۆيس ۇجىمى كەمىندە 80 ەلدەگى 2 مىڭنان استام مادەني مەكەمەلەرمەن ىنتىماقتاستىق ورناتقان. قولدانۋشىلار پلاتفورمادان ونەر تۋىندىلارىنىڭ كوشىرمەلەرىن, ساۋلەت ەسكەرتكىشتەرى مەن يۋنەسكو-نىڭ بۇكىلالەمدىك مۇرا نىساندارى تۋرالى مالىمەتتەردى تابا الادى. سونداي-اق, سايتتا بۇكىل الەمدەگى مادەني مەكەمەلەردىڭ مۇراعاتتارىن كورۋگە مۇمكىندىك بەرەتىن تسيفرلىق كورمەلەر بار.
«جىبەك جولىنىڭ ورتاق مۇراسى» ۆيرتۋالدى كورمەسىنە يران, قازاقستان, قىرعىزستان, وزبەكستان, تاجىكستان مەن تۇرىكمەنستاننىڭ ۇلتتىق مۋزەيلەرىنەن جىبەك جولىنىڭ مادەني مۇراسىن سيپاتتايتىن 60 كورنەكتى مۋزەي جادىگەرى قويىلعان.
مارجان قۋاتقىزى,
جۋرناليست