قازاقستان پرەزيدەنتى قاسىم-جومارت توقاەۆ جىلىتۋ ماۋسىمىنا دايىن بولماۋىنا بايلانىستى قالا اكىمى قىزمەتىنەن بوساتىلعان سارانداعى جاعداي تۋرالى ايتتى, دەپ حابارلايدى Egemen.kz.
مەملەكەت باسشىسى جەرگىلىكتى بيلىكتىڭ قىس مەزگىلىنە ءتيىستى دەڭگەيدە دايىندالماعانىن اتاپ ءوتتى.
«جىلىتۋ ماۋسىمىن ءمىنسىز وتكىزۋ – وزەكتى ماسەلەلەردىڭ ءبىرى. بۇل مەنىڭ ەرەكشە باقىلاۋىمدا. ساران قالاسى اۋا-رايىنىڭ سۋىتۋىنا دايىن بولماي شىقتى. مۇنداعى ۇيلەر جاقىندا عانا جىلۋ جۇيەسىنە قوسىلعان ەدى. كەمشىلىككە جول بەرگەن جاۋاپتى تۇلعالار ءتيىستى جازاسىن الدى. بۇل بارلىق اكىمگە ساباق بولۋى كەرەك. جىلىتۋ ماۋسىمىنا دايىن بولماۋ باسشىلاردىڭ ءوز قىزمەتىنە ساي كەلمەيتىنىن كورسەتەدى», دەدى مەملەكەت باسشىسى.
ەستەرىڭىزگە سالا كەتەيىك, قازان ايىندا ساران قالاسىندا ورتالىق جىلۋ كوزى ىستەن شىققان ەدى. حالىقتىڭ جاپپاي شاعىمدارىنا بايلانىستى ەنەرگەتيكا ءمينيسترى الماسادام ساتقاليەۆ ايماققا باردى. سودان كەيىن جىلۋسىز قالعان 80-نەن استام تۇرعىن ءۇيدىڭ بارلىعى ەسكى مودۋلدىك قازاندىقتارعا قوسىلدى.