2024 جىلدىڭ 10 ايىندا 550 مىڭنان استام وتانداسىمىز قورداعى كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» كق كومەگىن الدى. جىلدىڭ اياعىنا دەيىن بۇل ساندى 700 مىڭ ادامعا جەتكىزۋ كوزدەلىپ وتىر.
اتالعان بەلەس وتكەن جىلعا قاراعاندا 40 پايىزعا جوعارى بولماق. سايكەسىنشە, ەل تۇرعىندارىنا قولۇشىن سوزۋعا سەپتىگىن تيگىزەتىن الەۋمەتتىك جوبالاردىڭ قاتارى بىلتىردان كەلە جاتقانداردى قوسقاندا, بۇگىندە 49 پايىزدى ەڭسەردى.
پرەزيدەنت الەۋمەتتىك ءالسىز توپتاعى ازاماتتارعا قولداۋ كورسەتۋگە ەرەكشە ءمان بەرىپ وتىر. مەملەكەت ساياساتىندا ادامداردىڭ مۇڭ-مۇقتاجىنا جەدەل نازار اۋدارۋ, مۇمكىندىگى شەكتەۋلى جاندارعا كومەكتەسۋ نەگىزگى باسىمدىقتار سانالادى. ينكليۋزيا, ياعني تەڭ قوعامدى دامىتۋ, مەديتسينا مەن ءبىلىم, مادەنيەت پەن سپورت, ونىڭ ىشىندە اۋىلدىق جەرلەردى دامىتۋ, كرەاتيۆتى يندۋستريا, توتەنشە جاعداي كەزىندەگى جاردەم سىندى باعىتتاردىڭ باسىن قوسقان كەشەندى قاعيدانى «سامۇرىق-قازىنا» كومپانيالار توبى دا بەرىك ۇستانىپ وتىر.
جالپى, ەلىمىزدەگى ءىرى جۇمىس بەرۋشى سانالاتىن قوردىڭ قايىرىمدىلىق وپەراتورى ارقىلى وڭىرلەردە قازىرگى كەزدە 43 وڭالتۋ ورتالىعى مەن 90-عا جۋىق بەيىمدەلگەن سپورت سەكتسياسى, 30 سپورت كەشەنى مەن الاڭى جۇمىس ىستەپ تۇر.