كەشە قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ يران يسلام رەسپۋبليكاسىنىڭ ەلىمىزدەگى توتەنشە جانە وكىلەتتى ەلشىسى گوربان سەيفيدى ونىڭ ءوتىنىشى بويىنشا قابىلدادى, دەپ حابارلادى وسى پالاتانىڭ ءباسپاسوز قىزمەتى.
تاراپتار قازاقستان مەن يران اراسىنداعى ىنتىماقتاستىق بايلانىس جاقسى دامىپ كەلە جاتقانىن اتاپ ءوتتى. ەكى ەل پرەزيدەنتتەرىنىڭ كەزدەسۋلەرى مەملەكەتتەردىڭ ساۋدا-ەكونوميكالىق بايلانىستارى دامۋىنا كەڭ جول اشاتىنىن مالىمدەدى. ايتالىق, جۋىردا ءتۇركيادا وتكەن اوسشك شەڭبەرىندە ەكى ەل باسشىلارى كەزدەستى. سول ءجۇزدەسۋدە دە كوپتەگەن ماڭىزدى ماسەلەلەر قاراستىرىلدى.
مىسالى, 2008 جىلى ەكى ەل اراسىنداعى ساۋدا اينالىمى 2 ملرد. اقش دوللارىنان اسقان بولسا, وتكەن جىلى بۇل كورسەتكىش الەمدىك قارجى داعدارىسىنىڭ اسەرىنەن ءسال تومەندەدى. دەگەنمەن, الداعى ۋاقىتتا وسى دەڭگەيدى قالىپقا كەلتىرىپ, ەكونوميكالىق ءارىپتەستىك بايلانىستىڭ بارلىق ءتۇرىن دامىتۋعا تولىق ءمۇمكىندىك بار ەكەنى اتاپ كورسەتىلدى. ۇكىمەتارالىق كوميسسيانىڭ جۇمىسىن جانداندىرۋ, پارلامەنتارالىق بايلانىستى ارتتىرۋ ءۇشىن زاڭ شىعارۋ ءىسىندەگى تاجىريبە الماسۋ جولدارىن قاراستىرۋ ماسەلەلەرى كوتەرىلدى.
يران ەلشىسى ءوز سوزىندە ءماجىلىس توراعاسىنا يران پارلامەنتى جەتەكشىسىنىڭ سالەمىن جانە تەھرانعا كەلۋگە شاقىرعانىن جەتكىزدى. بۇل شاقىرۋعا و.مۇحامەدجانوۆ ريزاشىلىعىن ءبىلدىردى.
تاراپتار قازاقستاننىڭ ەقىۇ-عا توراعالىق ەتۋىندەگى باستى ۇستانىمدارى, ءبىزدىڭ ەلدە قاراشا ايىندا ءوتۋى جوسپارلانعان ەقىۇ-نىڭ ءسامميتى تۋرالى پىكىر الماستى.
كەزدەسۋ سوڭىندا ءماجىلىس توراعاسى ەلشىنىڭ قازاقستانداعى مارتەبەلى قىزمەتىنە تابىس تىلەدى.