جاقىندا استاناداعى «اريزونا» بيليارد كلۋبىندا مەملەكەت جانە قوعام قايراتكەرى بەردىبەك ساپارباەۆتى ەسكە الۋعا ارنالعان بيليارد ويىنىنان تۋرنير ۇيىمداستىرىلدى.
تانىمال تۇلعانى كورىپ-بىلگەن جانە جاقىن ارالاسقان ازاماتتاردىڭ تىكەلەي قولداۋىمەن باستالعان وسىنداي بيليارد سايىسى بيىل ەكىنشى رەت وتكىزىلىپ وتىرعانىن اتاپ ايتۋ كەرەك. بيليارد سايىسى باستالماس بۇرىن وتكەن جىلى ومىردەن وزعان بەردىبەك ساپارباەۆتىڭ ارۋاعىنا ارنالىپ قۇران وقىلدى, وعان قايراتكەردىڭ ۇرپاعى جانسۇلتان بەردىبەك ۇلى قاتىستى.
بيىلعى بيليارد سايىسىنا الماتى, قىزىلوردا مەن تۇركىستاننان دا ارنايى قوناقتار كەلىپ قاتىسىپ, ءوز شەبەرلىكتەرىن كورسەتە الدى. ۇيىمداستىرۋ كوميتەتىنىڭ اتىنان ءسوز العان جازۋشى-دراماتۋرگ جولتاي جۇمات ءوز سوزىندە «حالقىمىزدىڭ قايراتكەر ۇلدارىنىڭ ەسىمىن ەستەن شىعارماي, ەسكە الىپ وتىرۋ باعىتىنداعى بۇل يگى باستامانىڭ كەيىنگى جاس ۇرپاققا بەرەر ءتالىمى مول, سوندىقتان دا ءىس-شارانىڭ اياسىن بۇدان دا كەڭەيتە ءتۇسىپ, سپورت سايىسىن جىلما-جىل جالعاستىرىپ وتىرعان وتە ورىندى بولماق» دەپ اتاپ ءوتتى. قايراتكەر ازاماتتىڭ كوزىن كورگەن ەڭبەك ارداگەرلەرى اعابەك ءابدىورازوۆ, بايانباي ىسرايىلوۆ, تۇرسىنحان اقىلبەكوۆ, تاعى باسقالار ءوز ەستەلىكتەرىمەن ءبولىستى.
سايىس قورىتىندىسىندا جاقسى ويىن ۇلگىسىن كورسەتكەن نۇرجان ەسەن ۇلى ءبىرىنشى, قانات تۇرسىنباي ۇلى ەكىنشى, ال باقىتجان پارمەنوۆ ءۇشىنشى ورىنداردى يەلەنىپ, جەڭىمپازدارعا اقشالاي سىيلىقتار بەرىلىپ, جازۋشى جولتاي جۇمات-ءالماش ۇلىنىڭ وتكەن جىلى جارىق كورگەن «قاراتاۋ قاھارى» اتتى روماندار كىتابى تابىستالدى.
جاسۇلان جانداربەك
استانا