ۇكىمەت باسشىسى ولجاس بەكتەنوۆتىڭ توراعالىعىمەن اكتيۆتەردى قايتارۋ ماسەلەلەرى جونىندەگى كوميسسيانىڭ كەزەكتى وتىرىسى ءوتتى.
كوميسسيا «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ سۋبەكتىلەرىنىڭ جالپى سوماسى 525 ملرد تەڭگەدەن استام قاراجاتتى مەملەكەت پايداسىنا اۋدارۋ جانە الەۋمەتتىك جوبالاردى جۇزەگە اسىرۋ جونىندەگى كەلىسىمدەرىن ماقۇلدادى. قاراجاتتى ارناۋلى مەملەكەتتىك قورعا اۋدارۋمەن قاتار, زاڭ سۋبەكتىلەرى ەسەبىنەن كەلەسى وبەكتىلەردىڭ قۇرىلىسى ماقۇلداندى: ارقالىق قالاسىندا دارىندى سپورتشى بالالارعا ارنالعان 120 ورىندىق سپورتتىق كەشەن; استانادا تىرەك-قيمىل اپپاراتى بۇزىلعان بالالارعا ارنالعان وڭالتۋ ورتالىعى, الماتىدا ەرەكشە قاجەتتىلىگى بار ادامدارعا ارنالعان 400 ورىندىق جاتتىعۋ ورتالىعى.
«مەملەكەت باسشىسى اتاپ وتكەندەي, قايتارىلعان بارلىق قاراجات قازاقستاندىقتاردىڭ يگىلىگى ءۇشىن جۇمىس ىستەۋگە ءتيىس. وسى جىلدىڭ باسىنان باستاپ كوميسسيا قايتارىلعان اكتيۆتەر بويىنشا جالپى سوماسى 900 ملرد تەڭگەدەن استام كەلىسىمدەردى ماقۇلدادى. بۇل قاراجاتقا بىرقاتار الەۋمەتتىك ينفراقۇرىلىم وبەكتىلەرىنىڭ قۇرىلىسى باستالدى», دەپ اتاپ ءوتتى ولجاس بەكتەنوۆ.
بۇعان دەيىن پرەزيدەنت تاپسىرماسى بويىنشا ارناۋلى مەملەكەتتىك قوردان اقمولا وبلىسىنداعى زەرەندى اۋىلىندا سپورتتىق كەشەن جانە تۇركىستان وبلىسىنداعى تەمىرلان اۋىلىندا مۋزىكا مەكتەبىنىڭ قۇرىلىسىنا قاراجات ءبولىندى. كوميسسيا جۇمىسى جالعاسىپ جاتىر.