ءماجىلىس سپيكەرى ەرلان قوشانوۆتىڭ توراعالىعىمەن بيۋرو ءوتىپ, الداعى جالپى وتىرىستىڭ كۇن ءتارتىبى ناقتىلاندى.
ءبىرىنشى وقىلىمدا دەپۋتاتتارعا اقپارات, قوعامدىق دامۋ, مادەنيەت جانە ارحيۆ ءىسى سالالارىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا زاڭنامالىق تۇزەتۋلەر مەن دەنە شىنىقتىرۋ جانە سپورت تۋرالى زاڭ جوباسىن قاراۋ ۇسىنىلادى.
زاڭ جوباسىندا پرەزيدەنتتىڭ «ادىلەتتى قازاقستاننىڭ ەكونوميكالىق باعدارى» اتتى حالىققا جولداۋىن ىسكە اسىرۋ اياسىندا ازىرلەنگەن «كەلەشەك» بىرىڭعاي ەرىكتى جيناقتاۋ جۇيەسىنىڭ قىزمەتىن قۇقىقتىق رەتتەۋدى كوزدەيتىن نورمالار قاراستىرىلعان. بۇل باعدارلاما مەملەكەتتىك ءبىلىم بەرۋ جيناقتاۋ جۇيەسىنىڭ قولدانىستاعى الاڭىندا جۇزەگە اسىرىلىپ, اتا-انالار مەن مەملەكەتتىڭ بىرلەسكەن كۇشىمەن بالالاردىڭ ءبىلىم الۋ مۇمكىندىكتەرىن ارتتىرۋعا مۇمكىندىك بەرەدى.
دەپۋتاتتار دەنە شىنىقتىرۋ جانە سپورت ماسەلەلەرى بويىنشا دا كەيبىر نورمالاردى جەتىلدىردى. ءتيىستى زاڭ جوباسى سپورتتىڭ باسىم تۇرلەرىن انىقتاۋ جانە ولاردى قارجىلاندىرۋ, سپورت تۇرلەرىن رانجيرلەۋ جۇيەسىن الىپ تاستاۋ, سونداي-اق مەملەكەت پەن دەنە شىنىقتىرۋ جانە سپورت سۋبەكتىلەرى اراسىنداعى ءوزارا ارەكەتتەستىكتى كۇشەيتۋگە باعىتتالعان.
سونىمەن قاتار ءماجىلىس جاڭا زاڭ جوبالارىن جۇمىسقا الادى. ولاردىڭ ىشىندە كرەاتيۆتى يندۋستريالاردى قولداۋ جانە دامىتۋ, مۇراعات ءىسى ماسەلەلەرى بويىنشا زاڭنامالىق جاڭالىقتار, سونداي-اق بىرقاتار حالىقارالىق كەلىسىمدى راتيفيكاتسيالاۋ بار.