ەسىك قالاسىنىڭ شەتىندەگى ساياجاي بالالارى ەندى الىستاعى مەكتەپتەرگە تاسىمالدانىپ, اۋرە-سارساڭعا تۇسپەيدى. كۇنى كەشە ەڭبەكشىقازاق اۋدانى راحات اۋىلدىق وكرۋگىنە قاراستى ورىكتى اۋلىنان جالپى اۋماعى 2 گەكتار جەرگە ورنالاسقان ءۇش قاباتتى, تيپتىك جوبالىق قۋاتتىلىعى 1500 ورىندىق جاڭا مەكتەپ قولدانىسقا بەرىلدى. بۇل بيىلعى وقۋ جىلىندا ينۆەستورلار تاراپىنان سالىنعان وبلىستاعى ءۇشىنشى مەكتەپ ەكەنىن ەسكە سالۋ ارتىق ەتپەس. وسى كۇنى وبلىستا 447 مەكتەپ جۇمىس ىستەپ, وندا 340 مىڭنان استام وقۋشى ءبىلىم الىپ وتىر.
«Kapital Construction» كومپانياسى تاراپىنان سالىنعان «Altyn adam» يننوۆاتسيالىق مەكتەبىنىڭ اشىلۋ سالتاناتىنا ساياجاي تۇرعىندارى مەن ۇستازدار, جاڭا مەكتەپ تابالدىرىعىن اتتاعان وقۋشىلار قۋانا قاتىستى.
«وڭىردەگى ءۇش اۋىسىمدى مەكتەپ پروبلەماسىن شەشۋدە جەكە ينۆەستورلار ازاماتتىق تانىتىپ, بالالارعا جاڭا ءبىلىم ورداسىن سالىپ بەرىپ وتىر. «Kapital Construction» كومپانياسى بيىل جىل باسىندا ىلە اۋدانىنىڭ اششىبۇلاق اۋىلدىق وكرۋگىنە قاراستى اقجول ساياجاي اۋماعىنان ءدال وسىنداي ءزاۋلىم دە جايلى 1500 ورىندىق مەكتەپ سالىپ, جەرلەستەرىمىزدى قۋانىشقا بولەگەن ەدى. سول ارقىلى ءۇش اۋىسىمدى مەكتەپ ماسەلەسى شەشىلگەن. ەندى, مىنە, جاڭا مەكتەپكە ءۇش اۋىسىمدا وقىتاتىن №1 راحات ورتا مەكتەبىنىڭ بالالارى اۋىسىپ, اتالعان ءبىلىم ورداسىنداعى جۇكتەمەنى ازايتاتىن بولادى», دەگەن الماتى وبلىستىق ءبىلىم باسقارماسى باسشىسىنىڭ ورىنباسارى گۇلسارا تاستاندىقىزى جاڭا مەكتەپ جاڭا مۇمكىندىكتەرگە جول اشىپ, بالالاردىڭ ءبىلىم كوكجيەگى كەڭەيۋىنە تىلەكتەستىگىن ءبىلدىردى.
جيىندا «Kapital Construction» جاۋاپكەرشىلىگى شەكتەۋلى سەرىكتەستىگىنىڭ ديرەكتورى, مەكتەپ قۇرىلتايشىسى رينات تورەنياز مەكتەپ قۇرىلىسىنا اتسالىسقان ەڭبەك ۇجىمىنا العىسىن بىلدىرە كەلىپ, جاڭا مەكتەپتە وقيتىن وقۋشىلارعا ساتتىلىك تىلەدى. سونداي-اق «Altyn adam» يننوۆاتسيالىق مەكتەبىنىڭ ديرەكتورى بوتاكوز بورىبايقىزىنا مەكتەپ كىلتىن تابىس ەتتى.
«مەكتەبىمىز – قۇندىلىقتارعا نەگىزدەلگەن يننوۆاتسيالىق تاجىريبە ەنگىزۋ ارقىلى, الەمدىك باسەكەگە قابىلەتتى تۇلعا قالىپتاستىراتىن ءبىلىم بەرۋ ورتاسىن قۇرۋدى كوزدەيدى. مەكتەپتە ءبىلىم الۋ تەگىن. ساباقتان تىس ۋاقىتتا شاحمات, توعىزقۇمالاق, بوكس, قازاقشا كۇرەس سىندى سپورت تۇرلەرىمەن قوسا, قىش, ءمۇسىن ونەرىن مەڭگەرتۋ ۇيىرمەلەرى تەگىن جۇرگىزىلەتىن بولادى. مەكتەپ تولىعىمەن ماتەريالدىق بازامەن جابدىقتالىپ, ءبىلىم الۋشىلار ءۇشىن بارلىق جاعداي جاسالعان. مەكتەپتە روبوتتەحنيكا, ستەم لابوراتوريالار, وليمپياداعا دايىندىق توپتارى, «IELTS», «SAT» دايىندىق كۋرستارى, پروبلەماعا باعىتتالعان وقۋ جۇيەسى قاراستىرىلعان. سونىمەن قاتار باستاۋىش سىنىپ وقۋشىلارى مەن الەۋمەتتىك جاعدايى تومەن وتباسىلاردىڭ بالالارى تەگىن تاماقتاناتىن بولادى», دەدى مەكتەپ ديرەكتورى ب.شارىبەك.
ەڭسەلى مەكتەپتە II توقساندى 800-دەن استام وقۋشى باستاپ كەتتى. ءبىر اۋىسىمدا 1500 بالا وقۋعا مۇمكىندىگى بار يننوۆاتسيالىق مەكتەپكە ءالى دە بالا قابىلداۋ جۇمىستارى جالعاسىپ جاتىر.
الماتى وبلىسى