جەتىسۋدا بيىل 17 ءبىلىم مەكەمەسى اعىمداعى جوندەۋدەن ءوتتى. قوسىمشا 5 مەكتەپتىڭ قۇرىلىسى باستالىپ, بۇگىندە بىرتىندەپ وقۋشىلاردى قابىلداپ جاتىر. ەڭ باستىسى, سول نىسانداردىڭ ەكەۋى «جايلى مەكتەپ» ۇلتتىق جوباسى اياسىندا سالىنعان. كۇنى كەشە جاركەنتتىكتەر ءدال سونداي زاماناۋي ءبىلىم ورداسىنىڭ ەسىگىن اشىپ, كوپتەن كۇتكەن اتا-انالاردان ءسۇيىنشى سۇرادى. بۇل – وبلىستاعى شەكارالىق اۋدانى سانالاتىن پانفيلوۆتەگى 1200 ورىندى العاشقى جايلى مەكتەپ.
ءوڭىردى جاڭا مەكتەپپەن قامتۋ جۇمىسى قارقىندى ءجۇرىپ جاتىر. اسىرەسە اۋىلداردا ەسكى مەكتەپتەر كۇردەلى جوندەۋدەن ءوتىپ, جوندەۋگە كەلمەيتىن كەيبىر نىسانداردىڭ ورنىنا جاڭا ءبىلىم وردالارى بوي كوتەرۋدە. ءوڭىر اكىمىنىڭ ءباسپاسوز قىزمەتىنىڭ مالىمەتىنشە, بيىل وبلىستا بەس مەكتەپتىڭ قۇرىلىسى جۇرگەن. بۇعان دەيىن وسى وقۋ جىلىندا كوكسۋ اۋدانى قاراتال اۋلىندا 120 ورىندىق مەكتەپ ىسكە قوسىلعان بولسا, جىل سوڭىنا دەيىن اقسۋ اۋدانىنا قاراستى كوشكەنتال اۋلىندا 180 ورىندىق جاڭا مەكتەپ اشىلادى. ال قالعان 2 مەكتەپ, ياعني الاكول اۋدانى دوستىق اۋلىنداعى 600 ورىندىق, پانفيلوۆ اۋدانى تالدى اۋلىنداعى 300 ورىندىق مەكتەپتەر 2025 جىلعى جاڭا وقۋ جىلىندا ىسكە قوسىلادى دەپ جوسپارلانعان.
جاركەنتتەگى مەكتەپتىڭ اشىلۋ سالتاناتىنا وبلىس اكىمىنىڭ ورىنباسارى دياس ەسداۋلەتوۆ, ارداگەر ۇستازدار, مەكتەپ ۇجىمى, اتا-انالار مەن وقۋشىلار, اۋدان جۇرتشىلىعى قاتىستى.
«بۇل – پرەزيدەنت تاپسىرماسىمەن «جايلى مەكتەپ» ۇلتتىق جوباسى اياسىندا سالىنعان وبلىسىمىزداعى العاشقى ءبىلىم وشاعى. پانفيلوۆ اۋدانى – وبلىستاعى وقۋشى سانى كوپ ءوڭىردىڭ ءبىرى. جاڭادان پايدالانۋعا بەرىلىپ وتىرعان بۇل مەكتەپكە جاركەنت قالاسىنىڭ بالا سانى كوپ 9 مەكتەبىنەن 1100 جۋىق بالا قابىلدانىپ وتىر. وسىنداي زامانۋي مەكتەپتە بىلىممەن سۋسىندايتىن وقۋشىلار وبلىسىمىزدان توپ جارىپ شىعاتىنىنا سەنىمىم زور. مەكتەپ ۇستازدارىنا ەلىمىزدىڭ بولاشاق ءبىلىمدى, ەڭبەكقور پاتريوتتارىن تاربيەلەۋ جولىندا ساتتىلىك تىلەيمىن!», دەدى د.ەسداۋلەتوۆ.
مۇنان سوڭ مەكتەپتىڭ لەنتاسى قيىلىپ, جينالعان كوپشىلىك جاڭا عيماراتتىڭ ءىشىن ارالاپ كوردى.
جالپى, مەكتەپ زاماناۋي تالاپقا ساي جابدىقتالعان. مۇندا 64 كابينەت بولسا, ونىڭ 6-اۋى جاڭا موديفيكاتسيالىق كابينەت, سونىڭ ىشىندە حيميا, فيزيكا, بيولوگيا, روبوتتەحنيكا, Steam كابينەتتەرى, نانو تەحنولوگيا ت.ب. بار. بارلىق ءپان كابينەتتەرى قاجەتتى ادىستەمەلىك, تەحنيكالىق قۇرالدارمەن جابىقتالعان. سونىمەن قاتار اعاش, مەتالل, تىگىن جانە باسقا دا شەبەرحانالار قاراستىرىلعان. اكت زالى, 2 وقۋ زالى بار كىتاپحانا, 230 ورىندى اسحانا, 2 سپورت زالى, 1 بي زالى وقۋشىلاردىڭ يگىلىگىنە قىزمەت ەتەدى. وعان قوسا وقۋشىلاردىڭ وقۋ قۇرالدارىنا, كيىمگە ارنالعان جەكە شكافتار, سونداي-اق كىتاپ وقۋعا, بالالاردىڭ شىعارماشىلىق دامۋى مەن دەمالۋىنا كوۆوركينگ ايماقتار قاراستىرىلعان.
جاڭا دا جايلى مەكتەپتىڭ اشىلعانىنا اتا-انالار دا قۋانىشتى.
ء«بىزدىڭ جاركەنت قالاسىنا وسىنداي جايلى مەكتەپ سالىپ بەرگەندەرىڭىز ءۇشىن بارشا اتا-انانىڭ اتىنان العىس ايتامىز. مەنىڭ قىزىم قازىر 11-سىنىپتا وقيدى. بالالاردىڭ ۇبت-عا, ەمتيحاندارعا ساپالى دايىندالۋىنا مۇندا بارلىق مۇمكىندىك جاسالعان, وقۋ زالدارى بار كىتاپحاناسى, ماتەريالدىق بازاسى مىقتى ءپان كابينەتتەرى – ءبارى دە وقۋشىلاردىڭ ساپالى ءبىلىم الۋىنا ءوزىنىڭ ۇلكەن ىقپالىن تيگىزەدى دەپ ويلايمىن», دەيدى اتا-انالار كوميتەتىنىڭ توراعاسى ايدار بەكتەمىر ۇلى.
مەكتەپ ديرەكتورىنىڭ مىندەتىن اتقارۋشى ايگۇل دارۋباەۆانىڭ ايتۋىنشا, قازىرگى كەزدە مەكتەپتە 46 جيىنتىق كلاسس اشىلعان. جاركەنت قالاسىنداعى بالا سانى كوپ توعىز مەكتەپتەن سىنىپتار جەتەكشىلەرىمەن بىرگە اۋىسىپ كەلگەن. بۇگىنگى كۇنى پەداگوگتەر ءۇشىن 30 بوس ورىن, تەحنيكالىق قىزمەتكەرلەرگە 20 ورىنعا كونكۋرس جاريالانىپ, جۇمىسقا قابىلدانۋ ۇستىندە.
«مەكتەپتەگى فيزيكا, حيميا, بيولوگيا جانە روبوتتەحنيكا پاندەرى بويىنشا زاماناۋي كابينەتتەردە touch-ەكراندار ورناتىلىپ, مەكتەپتىڭ كەز كەلگەن جەرىنەن جىلدامدىعى جوعارى ينتەرنەتكە قوسىلۋ مۇمكىندىگى بەرىلەدى. ەرەكشە ءبىلىم الۋدى قاجەت ەتەتىن بالالارعا ءتيىستى جاعدايلار جاسالعان. باستاۋىش جانە جوعارى سىنىپ وقۋشىلارى مەكتەپتە بولەك بلوكتاردا وقيدى. عيماراتتا بالالار ءۇشىن بەينەباقىلاۋ, دىبىستىق حابارلاۋ جانە باسقا دا كۇشەيتىلگەن قاۋىپسىزدىك شارالارىنا ارنالعان جابدىقتار ورناتىلعان», دەيدى ا.دارۋباەۆا.
ايتا كەتەيىك, بۇگىندە وبلىستا مەكتەپكە دەيىنگى, ورتا, تەحنيكالىق جانە كاسىپتىك ءبىلىم بەرۋ سالاسىندا 21 مىڭنان اسا پەداگوگ جۇمىس ىستەيدى. سونىڭ ىشىندە اۋىلداردا 3600-دەن اسا جاس مامان قىزمەت ەتەدى, ونىڭ 107-ءى – بيىلعى وقۋ جىلىندا جۇمىسقا ورنالاسقان جاستار. اۋىلداعى جاس ۇستازداردى باسپانامەن قامتۋ ماسەلەسى وڭ شەشىمىن تاۋىپ كەلەدى. «ديپلوممەن – اۋىلعا!» باعدارلاماسى بويىنشا وبلىستا 1600-گە جۋىق پەداگوگكە تۇرعىن ءۇي ساتىپ الۋعا پايىزسىز نەسيە بەرىلسە, 2900-دەن استام مۇعالىمگە كوتەرمە جاردەماقى تولەندى. جايلى مەكتەپكە دە جاقسى ماماننىڭ كەلەرى داۋسىز. سول سەبەپتى وڭىردەگى كادر تاپشىلىعىن شەشۋ ءۇشىن ارنايى گرانتتار ءبولىنىپ جاتىر.
«ارينە, مامان تاپشىلىعى رەسپۋبليكا كولەمىندە اۋقىمدى ماسەلە. ءبىزدىڭ وڭىردە وبلىستا توقساننان استام مۇعالىم جەتىسپەيدى. ءار جىل سايىن جەرگىلىكتى بيۋدجەتتەن قاراجات ءبولىنىپ, گرانت تاعايىندالىپ, ونىڭ 40 پايىزىن پەداگوگيكالىق ماماندىقتارعا ءبولىپ وتىرمىز. سوعان قاراماستان, ماماندار تاپشىلىعى وزەكتى بولىپ وتىر. ونىڭ باستى سەبەبى: وسى سالادا وقىعان ءاربىر بەسىنشى تۇلەك ءوز ماماندىعى بويىنشا جۇمىس ىستەمەيدى نەمەسە تەك وبلىس ورتالىعىندا جۇمىس ىستەگىسى كەلەدى», دەيدى وبلىستىق ءبىلىم باسقاراماسىنىڭ باسشىسى مارات سۇلەيمەنوۆ.
كەلەر جىلى جەتىسۋ جەرىندە تاعى دا ونداعان مەكتەپتىڭ قۇرىلىسى باستالادى.