قاراشانىڭ باسىندا الماتى وبلىسىنىڭ ەڭبەكشىقازاق اۋدانى سوگەتى اۋىلدىق وكرۋگى اۋماعىندا ۆولفرامدى قايتا وڭدەيتىن ەلىمىزدەگى العاشقى زاۋىت ىسكە قوسىلدى. زاۋىتتىڭ ىسكە قوسىلۋى – تاۋ-كەن ءوندىرىسىنىڭ دامۋى جولىنداعى ۇلكەن قادام ءارى ەلىمىزدىڭ حالىقارالىق دەڭگەيدە باسەكەگە قابىلەتتىلىگىن ارتتىرۋداعى ايرىقشا باستاما. تاريحي وقيعا ەلىمىزدىڭ الەمدىك سيرەك مەتالدار نارىعىنداعى ورنىن نىعايتۋمەن قاتار, تابيعي رەسۋرستاردى ءتيىمدى پايدالانۋ مەن وڭدەۋدە جاڭا مۇمكىندىكتەرگە جول اشپاق.
جوبانى تولىقتاي گونكونگتە ورنالاسقان «Jiaxin International Resources Investment Ltd» كومپانياسى قارجىلاندىرعان. زاۋىت جىلىنا 3,3 ملن توننا كەن وڭدەيدى. جالپى قۇنى – 300 ملن دوللار.
ء«بارىڭىزدى ەكى مەملەكەت اراسىنداعى ىنتىماقتاستىق ناتيجەسىندە ىسكە اسىرىلىپ وتىرعان «ۆولفرام كەندەرىن ءوندىرۋ جانە قايتا وڭدەۋ زاۋىتىنىڭ» اشىلۋىمەن قۇتتىقتايمىن. جاڭا كاسىپورىننىڭ ىسكە قوسىلۋى – اۋدانىمىزدا جاڭا جۇمىس ورنى اشىلىپ, ەكونوميكا دامىپ, الەۋمەتتىك تۇراقتىلىق نىعايادى دەگەندى بىلدىرەدى. مەملەكەتتىڭ شەتەل ينۆەستورلارىن قولداۋى ناتيجەسىندە اۋدانىمىزعا 2024 جىلدىڭ 9 ايىندا 84 ملرد تەڭگە كولەمىندە (2023 جىلى 9 ايدا 62 ملرد تەڭگە تارتىلعان) ينۆەستيتسيا تارتىلدى. وتاندىق بيزنەستىڭ شەتەل ينۆەستورلارىنا سەنىمدى سەرىكتەس بولۋىنا بارلىق جاعداي جاسالىپ وتىر. كاسىپورىن ايماعىمىزدىڭ الەۋەتىن ارتتىرىپ, تۇرعىنداردىڭ ءال-اۋقاتىن جاقسارتۋعا ۇلكەن ۇلەس قوسادى دەپ سەنەمىن», دەدى اۋدان اكىمى تالعات بايەدىلوۆ.
بۇگىندە ەڭبەكشىقازاق اۋدانىندا بويىنشا شاعىن جانە ورتا كاسىپورىن سانى 26 مىڭ بىرلىكتى قۇراپ, 40 مىڭنان اسا ادامدى جۇمىسپەن قامتىدى. ونىڭ ىشىندە 106 بىرلىك ونەركاسىپ ورىنى جۇمىس جۇرگىزىپ, ونەركاسىپ كولەمى بيىلعى 9 ايدا 72 ملرد تەڭگەنى قۇرادى.
جاڭا زاۋىت حالىقارالىق ەكولوگيالىق جانە وندىرىستىك ستاندارتتاردى ەسكەرە وتىرىپ جۇمىس ىستەيدى. قازىرگى ۋاقىتتا زاۋىتتىڭ نەگىزگى نىساندارى – شلام ساقتاۋ ورىندارى مەن تاۋ-كەن بايىتۋ فابريكاسى 60 پايىزعا, سىرتقى سۋ تارتۋ جۇمىستارى 85 پايىزعا, سىرتقى ەلەكترمەن جابدىقتاۋ 100 پايىزعا جانە ىشكى ەلەكترمەن جابدىقتاۋ 90 پايىزعا اياقتالعان. بۇل كورسەتكىشتەر جوبانىڭ تەحنيكالىق جانە وندىرىستىك ۇدەرىسىنىڭ جوعارى ساپادا ىسكە اسىرىلىپ جاتقانىن دالەلدەيدى. تاريحي جوبانى «ارال كەگەن» جشس باسقارادى, ال ونىڭ اكتسيونەرلەرى حالىقارالىق حولدينگ «Jiaxin International Resources Investment Ltd.» قۇرامىنا كىرەدى, وعان «Jiangxi Copper Corporation», «China Railway Construction Company», «China Civil Engineering Construction Company» جانە «Ever Trillion International Singapore PTE LTD» كومپانيالارى قوسىلعان.
الداعى ۋاقىتتا ۆولفرام مولشەرىن 88,5 پايىزعا دەيىن جەتكىزۋ, جوعارى تازالىقتاعى ۆولفرام كاربيدىن شىعارۋ ماقساتىندا تەرەڭ قايتا وڭدەۋ كەشەنىن سالۋ جوسپارلانعان. بۇل كەزەڭگە ارنالعان ينۆەستيتسيا كولەمى – 150 ملن دوللار.
زاۋىتتىڭ اشىلۋى ەلىمىزدىڭ تاۋ-كەن ونەركاسىبىندە جاڭا كەزەڭدى باستايدى. قازىر الەمدە ۆولفرامعا سۇرانىس ارتقان سايىن, ونىڭ ءوندىرىلۋى مەن وڭدەلۋى دە ەرەكشە ماڭىزعا يە بولىپ تۇر. ءبىزدىڭ ەل بۇل جوبامەن تەك ءوزىنىڭ تابيعي رەسۋرستارىن ءتيىمدى پايدالانۋدى كوزدەپ قانا قويماي, الەمدىك نارىقتا جەتەكشى ورىنعا شىعۋدى دا جوسپارلايدى.
الماتى وبلىسى