تۇركىستان قالاسىندا «سامۇرىق-قازىنانىڭ» قولداۋىمەن سپورت كەشەنىنىڭ قۇرىلىسى مارە سىزىعىن كەسۋگە جاقىن. وسىلايشا, تۇركىستان وبلىستىق سپورت مەكتەبى جاڭارىپ قانا قويماي, وعان وليمپيادا چەمپيونى, قازاق بوكسىنىڭ اڭىزى بەكزات ساتتارحانوۆتىڭ ەسىمى بەرىلمەك.
بارشا جەرگىلىكتى تۇرعىندار مەن سپورتشىلاردى قۋانتاتىن جاڭالىقتى «سامۇرىق-قازىنا» اق كومپانيالار توبى اتىنان «Samruk-Kazyna Trust» الەۋمەتتىك جوبالاردى دامىتۋ قورى مەن تۇركىستان وبلىسى اكىمدىگى بىرلەسە جۇزەگە اسىرىپ جاتىر. ناتيجەسىندە, ءدۇبىرلى دودالاردى وتكىزۋگە ارنالعان سپورت نىسانى 320 كورەرمەندى سىيدىرىپ, ۇلكەن زال مەن بىرنەشە جاتتىعۋ الاڭدارى اشىلماق. بۇعان دەيىن, اتالعان مەكەمەدە 1500-دەن اسا سپورتشى جاتتىعىپ, 75 باپكەر جۇمىس اتقارسا, ەندى ولاردىڭ قاتارى كوبەيە تۇسەتىنى كوزدەلەدى. سونىمەن قاتار سپورتتىق-مادەني شارالار سانىن ارتتىرىپ, جەتىستىكتەرگە ۇمتىلۋ رۋحىن شىڭدايتىن قۇرىلىس بارىسىندا دا, كەشەن پايدالانۋعا تابىستالعاندا دا قۇرىلاتىن جۇمىس ورىندارى ايماقتاعى جۇمىسسىزدىقتى قىسقارتپاق. قوردىڭ 500 ميلليون تەڭگە سوماسىنداعى كومەگى اياسىندا ارلەۋ مەن بوياۋ, ويۋ-ورنەك سالۋ, جىلۋ مەن جەلدەتۋ, سۋ مەن كارىز قۇرىلىمدارىن جۇرگىزۋ, ەلەكتر قۋاتىن تارتۋ, اۋماقتى كوگالداندىرۋ مەن اباتتاندىرۋ, تەحنولوگيالىق قۇرال-جابدىقپەن قامتاماسىز ەتۋ جاعدايى جاقساراتىنى كۇتىلۋدە. بۇدان تىس, ۇستەل تەننيسىن ويناۋ الاڭقايى قاراستىرىلعان.
ءابدىسالان نۇرماحانوۆ اتىنداعى وليمپيادا رەزەرۆىنىڭ مامانداندىرىلعان بالالار مەن جاسوسپىرىمدەر سپورت مەكتەبى 1999 جىلعى 24 جەلتوقساندا ىسكە قوسىلعان. بۇقارالىق سپورتتى دامىتۋدا, ياعني جاستاردى سالاماتتى ءومىر سالتىنا بەيىمدەۋ, سپورت پەن دەنە تاربيەسىنە باۋلۋدا جۇيەلى ءىس-قيمىلدار تىندىرىلعانمەن, ءوڭىر, ونىڭ ىشىندە كيەلى شاھاردىڭ تىنىسى كەڭەيىپ, جاڭا دا باتىل قادامداردىڭ قاجەتتىلىگى سەزىلگەن. توزعان عيماراتتى ءسۇرىپ, زامان تالابىنا ساي جاڭعىرتۋ, وزىق ينفراقۇرىلىمدى قالىپتاستىرۋ شەشىمى قابىلدانعان.
«مەكتەبىمىزدە 18 ءبولىم تۇراقتى جۇمىس ىستەپ تۇر. ولار – بوكس, دزيۋدو, تاەكۆوندو, ەركىن, گرەك-ريم مەن قازاق, سامبو, بەلبەۋ كۇرەستەرى, تەننيس, تاەكۆوندو ITF, پانكراتيون جانە ارالاس امبەباپ جەكپە-جەك جانە گرەپلينگ (AIGA نۇسقاسى), ۋشۋ كۋنگ-فۋ, دجيۋ دجيتسۋ, مۋايتاي, كيكبوكسينگ, پەنچاك سيلات, باتۋتتىق گيمناستيكا سىندى سپورت تۇرلەرى. 4 ەڭبەك سىڭىرگەن جاتتىقتىرۋشىمىز بار. حالىقارالىق دارەجەدەگى 4 سپورت شەبەرى بولسا, 110 سپورت شەبەرى وزگەلەرگە ۇلگى-ونەگە تانىتۋدا», دەپ اڭگىمەلەيدى تۇركىستان وبلىسى دەنە شىنىقتىرۋ جانە سپورت باسقارماسىنىڭ باسشىسى مىندەتىن اتقارۋشى الماس ناقىپبەكوۆ.
بيىل تۇركىستاندىق سپورتشىلار ەل چەمپيوناتتارىندا 35 التىن, 34 كۇمىس, 63 قولا مەدال ەنشىلەگەن. الەم كۋبوگىندە 1 قولا قورجىنعا تۇسسە, الەم چەمپيوناتىندا 2 جۇلدەگەر جەڭىس تۇعىرىنا كوتەرىلىپ, ازيا چەمپيوناتتارىندا 24 التىن, 5 كۇمىس, 2 قولا قانجىعانى مايلاعان.
«ۇلكەن سپورت كەشەنىنىڭ تۇساۋى كەسىلەتىن, حالىق يگىلىگىنە جارايتىن ۋاقىت جاقىنداپ قالدى. بۇل دا ءبىر بىتكەن, اۋىز تولتىرىپ ايتارلىقتاي جەمىستى ءىس بولاتانى انىق. بەكزات ساتتارحانوۆ اعامىزدىڭ ەسىمىن يەلەنەتىن نىساندا تالاي دارىندى سپورتشى جاتتىعىپ, بيىك بەلەستەردى باعىندىرادى, اتاقتى جەرلەسىمىزدىڭ داڭقتى جەڭىسىن قايتالايدى دەپ سەنەمىز. قازاق سپورتىنىڭ جانكۇيەرلەرىنە اتالعان وقيعا قۇتتى بولسىن دەگىم كەلەدى», دەپ ويىن ءبىلدىردى بوكستان الەم چەمپيونى, سپورت كلۋبىنىڭ ديرەكتورى قايرات ەراليەۆ.
ب.ساتتارحانوۆ داڭعىلىندا ورنالاسقان چەمپيوندار مەكتەبىنىڭ شاكىرتتەرى مەن تۇلەكتەرى رەتىندە دزيۋدوشىلار ديدار حامزا, 2028 جىلى اقش-تىڭ لوس-انجەلەس قالاسىندا وتەتىن وليمپياداعا باپتالىپ, ۇكىلەنىپ وتىرعان ايدار اراپوۆ, سامبودان قازاقستاننىڭ بىرنەشە دۇركىن چەمپيوندارى, الەمدىك جارىستاردىڭ جۇلدەگەرلەرى, بالۋان قىزدار ايجان جىلقىباەۆا مەن ۇلبوسىن ءادىلوۆا, ايەلدەر كۇرەسىنەن نيۋليفار رايموۆا مەن ءمادينا امان, باسقا دا بولاشاق تالانتتى جارقىن جۇلدىزداردىڭ اتتارى اتالادى. كاسىپقوي بوكسشى, بەك نۇرماعانبەتتى دە تۇركىستان وبلىستىق سپورت مەكتەبى ماقتان تۇتادى. ماسەلەن, تەك بوكستان الەم چەمپيونى, وليمپيادا ويىندارىنىڭ جۇلدەگەرى, حالىقارالىق سايىستاردىڭ 25, ەل چەمپيوناتتارىنىڭ 20 جەڭىمپازى شىققان.
جالپى, دەرەككوزگە سۇيەنسەك, تۇركىستان قالاسىندا 220 مىڭنان استام ادام تۇرسا, ولاردىڭ 20 پايىزى تۇراقتى سپورتپەن شۇعىلدانادى. بۇل رەتتە سپورت ورىندارىنا زارۋلىكتىڭ جوعارى ەكەنى بايقالادى. مەملەكەت بيۋدجەتىنەن قارجىلاندىرىلاتىن مەكتەپتە حالىقتىڭ بارلىق توبى بوس ۋاقىتىن ءتيىمدى وتكىزە الماق.
اتاپ وتكەن ابزال, ۇلت دەنساۋلىعىنىڭ ساپاسىن ارتتىرۋ مەن سپورت سالاسىنىڭ وركەندەۋىنە ۇلەس قوسۋ – «سامۇرىق-قازىنا» قورىنىڭ الەۋمەتتىك ساياساتى مەن قايىرىمدىلىق قىزمەتىنىڭ باستى باعىتتارىنىڭ ءبىرى. وعان دالەل, بۇقارالىق سپورت ينفراقۇرىلىمىن دامىتۋدا, قور دەمەۋشىلىگىمەن, بيىل قازان ايىندا قىزىلوردا وبلىسىندا سىرداريانىڭ سول جاعالاۋىندا ۇستەل تەننيسىنىڭ ورتالىعى سالىندى. شىعىس قازاقستان وبلىسىنداعى قاتونقاراعاي, زايسان اۋداندارىندا تۇساۋى كەسىلگەن سپورت الاڭدارى «سامۇرىق-قازىنا» قورىنىڭ قولداۋىمەن سوڭعى ءۇش جىلدا ەلىمىز بويىنشا بوي كوتەرگەن ءتيىستى نىسانداردىڭ سانىن 30-عا جۋىقتاتىپ وتىر. قور بۇقارالىق سپورتتى دامىتۋ, بالالارعا سپورت ينفراقۇرىلىمىن قولجەتىمدى ەتۋ باعىتىندا اۋىلداردا سپورت الاڭدارىنان بولەك, ەل بويىنشا 10 دەنە شىنىقتىرۋ-ساۋىقتىرۋ كەشەنى مەن كوپسالالى سپورت كەشەنىن ىسكە قوستى.
قور تاراپىنان ەرەكشە بالالاردى وڭالتۋ مەن ءبىلىم الۋى ءۇشىن جاعداي جاساۋدان بولەك, ولاردى بەيىمدەلگەن سپورت تۇرلەرىنە باۋلۋ ماسەلەسى قولعا الىنعان. قازىرگى تاڭدا 23 قالا مەن ەلدى مەكەندە ءتۇرلى سپورت تۇرلەرى بويىنشا 1100 ەرەكشە بالاعا ارنالعان 89 سەكتسيا تەگىن جۇمىس ىستەپ تۇر. قاتىسۋشىلاردىڭ بىرقاتارى رەسپۋبليكالىق قانا ەمەس, حالىقارالىق سايىستاردىڭ جۇلدەگەرى اتانۋدا.
تۇركىستان وبلىسىندا «Samruk-Kazyna Trust» قورىنىڭ قارجىلاندىرۋىمەن دەنساۋلىق ساقتاۋ, بۇقارالىق سپورت پەن ينكليۋزيانى دامىتۋ, ءبىلىم بەرۋ, الەۋمەتتىك كاسىپكەرلىك جانە حالىقتىڭ الەۋمەتتىك وسال توپتارىن قورعاۋ باعىتتارىندا 2020-2024 جىلدار ارالىعىندا 1,5 ملرد تەڭگەگە 18 جوبا ماقۇلداندى. ونىڭ ىشىندە وڭالتۋ ورتالىقتارى, «مەكتەپكە جول» اكتسياسى اياسىندا الەۋمەتتىك وسال توپتاعى وقۋشىلارعا مەكتەپ قۇرالدارىن الىپ بەرۋ, مەكتەپىشىلىك سانيتارلىق توراپتار ورناتۋ جانە اۋىلدىق مەديتسينا نىساندارىنا جاڭا جەدەل جاردەم كولىكتەرىن تابىستاۋ سياقتى قادامدار بار. مىسالى, قور قولداۋىمەن كەنتاۋ قالاسىندا العاش رەت بەيىمدەلگەن سپورت بويىنشا بوچچا سەكتسياسى اشىلدى. ناتيجەسىندە, ەلىمىزدەگى قور ليفت ورناتىپ بەرىپ, كوپتەن بەرى شەشىمىن تاپپاي كەلە جاتقان تۇيتكىلدى تارقاتقان جالعىز ارناۋلى كاسىپتىك كوللەدجدەگى تىرەك-قيمىل جۇيەسى بۇزىلعان I, II جانە III توپتاعى ەرەكشە بالالار وزدەرىنە ىڭعايلى پاراوليمپيادالىق سپورت تۇرىمەن اينالىسا الادى.