ۇكىمەت وتىرىسىندا وقۋ-اعارتۋ ءمينيسترى عاني بەيسەمباەۆ ينكليۋزيۆتى جانە ارنايى ءبىلىم بەرۋدى دامىتۋ بويىنشا قابىلدانىپ جاتقان شارالارعا توقتالدى, دەپ حابارلايدى Egemen.kz.
ونىڭ ايتۋىنشا, ەلىمىزدە 496 ۇيىم جۇمىس ىستەيدى, سونداي-اق ارنايى قولداۋعا مۇقتاج بالالارعا ارنالعان 1071 كابينەت جابدىقتالعان. مەكتەپتەردىڭ 88%-دا جانە كوللەدجدەردىڭ 80%-دا ينكليۋزيۆتى وقىتۋ ءۇشىن جاعدايلار جاسالعان.
مەكتەپتەردە «پەداگوگ-اسسيستەنت» لاۋازىمى ەنگىزىلدى, بۇل ماماندار سانىن ءبىر جىلدا 1-دەن 2,5 مىڭعا دەيىن ارتتىرۋعا مۇمكىندىك بەردى. ەندى بۇل لاۋازىمنىڭ اشىلۋى مەكتەپكە دەيىنگى ۇيىمداردا دا قاراستىرىلىپ جاتىر. ەرەكشە ءبىلىم بەرۋ قاجەتتىلىكتەرى بار بالالارمەن بارلىعى 9 مىڭنان استام ارنايى پەداگوگ جۇمىس ىستەيدى.
«كەلەسى جىلدان باستاپ پەداگوگ-اسسيستەنتتەر كوللەدجدەردە دايىندالا باستايدى. تىرەك-قيمىل اپپاراتى بۇزىلعان بالالار ءۇشىن مەكتەپتە «جەكە كومەكشى» لاۋازىمى ەنگىزىلەدى. سونداي-اق «پەداگوگ» كاسىبي ستاندارتىنا ەرەكشە ءبىلىم بەرۋ قاجەتتىلىكتەرى بار بالالارمەن جۇمىس ىستەۋ بويىنشا جاڭا ماماندىقتار ەنگىزىلىپ جاتىر», دەيدى عاني بەيسەمباەۆ.