پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا دەنساۋلىق ساقتاۋ ءمينيسترى اقمارال ءالنازاروۆا ەلىمىزدە مۇگەدەكتىگى بار ادامداردى قولداۋ بويىنشا قابىلدانىپ جاتقان شارالار تۋرالى باياندادى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
مينيستر جىل سوڭىنا دەيىن التى وڭالتۋ ورتالىعىن, 2025 جىلى ءۇش ەرتە ارالاسۋ ورتالىعىن اشۋ جوسپارلانعانىن اتاپ ءوتتى.
ايتا كەتەيىك, سوڭعى 5 جىلدا ەرەسەك تۇرعىنداردىڭ مۇگەدەكتىك قۇرىلىمى وزگەرىسسىز قالعان. ءبىرىنشى ورىندا قان اينالىمى جۇيەسىنىڭ اۋرۋلارى, ەكىنشى ورىندا – قاتەرلى ىسىكتەر, ءۇشىنشى ورىندا – پسيحيكالىق اۋرۋلار تۇر.
«سوزىلمالى ينفەكتسيالىق ەمەس اۋرۋلاردىڭ اسقىنۋلارىن ەرتە دياگنوستيكالاۋ جانە الدىن الۋ ماقساتىندا جىل سايىن مساك دەڭگەيىندە 3,4 ملن ەرەسەك ادام قان اينالىمى جۇيەسىنىڭ اۋرۋلارىنا, قانت ديابەتىنە, ونكولوگياعا اۋرۋلاردى ەرتە انىقتاۋ سكرينينگىمەن قامتىلادى. بۇل پاتسيەنتتەر ديناميكالىق باقىلاۋمەن جانە تەگىن امبۋلاتوريالىق ءدارى-دارمەكتەرمەن قامتاماسىز ەتىلەدى», دەدى اقمارال ءالنازاروۆا.مالىمەتتەرگە سۇيەنسەك, ەلىمىزدە جۇرەك-قان تامىرلارى اۋرۋلارى بار ناۋقاستارعا كومەك كورسەتۋ ءۇشىن 83 ينسۋلت جانە 48 كوروناروگرافيا ورتالىعى جۇمىس ىستەيدى. ەرەسەكتەرگە مەديتسينالىق وڭالتۋ جەتى بەيىن بويىنشا كورسەتىلەدى: كارديولوگيا, كارديوحيرۋرگيا, نەۆروپاتولوگيا, نەيروحيرۋرگيا, تراۆماتولوگيا, ورتوپەديا جانە 2024 جىلدان باستاپ قاتەرلى ىسىكتەر.
سوڭعى 3 جىلدا 772 دەنساۋلىق ساقتاۋ ۇيىمدارىندا وڭالتۋعا بەيىندەلگەن توسەك قورىنىڭ سانى 2 ەسە ارتىپ, 8 مىڭعا دەيىن جەتكىزىلگەن.سونىمەن قاتار قىزمەت كورسەتۋشىلەرگە قويىلاتىن تالاپتاردى ارتتىرۋ ءۇشىن وڭالتۋ كومەگىن كورسەتۋ جانە جاراقتاندىرۋدىڭ ەڭ تومەنگى ستاندارت تالاپتارى قايتا قارالعان.ءمينيستردىڭ ايتۋىنشا, 2025 جىلدان باستاپ سوزىلمالى جۇقپالى ەمەس اۋرۋلاردىڭ اسقىنۋلارىن ەرتە انىقتاۋ جانە الدىن الۋ بويىنشا العاشقى مەديتسينالىق-سانيتارلىق كومەكتىڭ ساپاسىن باعالاۋدىڭ جاڭا مودەلى ەنگىزىلىپ جاتىر, بۇل مۇگەدەكتىكتى ازايتۋعا مۇمكىندىك بەرەدى.