سەناتتا ينكليۋزيا جونىندەگى كەڭەستىڭ كەزەكتى وتىرىسى ءوتتى. وندا دەپۋتاتتار, مەملەكەتتىك ورگانداردىڭ وكىلدەرى, ساراپشىلار ەرەكشە قاجەتتىلىگى بار ازاماتتاردىڭ ساپالى ءبىلىم الۋ مۇمكىندىگىن كەڭەيتۋ, ىسكە اسىرۋ جولدارىن تالقىلادى. وتىرىسقا بىرقاتار مينيسترلىك پەن حالىقارالىق ۇيىمداردىڭ باسشىلارى قاتىستى.
وتىرىستى اشقان ماۋلەن اشىمباەۆ ءلاززات قالتاەۆانى سەنات توراعاسىنىڭ كەڭەسشىسى بولىپ تاعايىندالۋىمەن قۇتتىقتادى. سونداي-اق ول ءلاززات قالتاەۆا پالاتا جانىنداعى ينكليۋزيا جونىندەگى كەڭەستىڭ توراعاسى بولىپ قالا بەرەتىنىن اتاپ ءوتتى. سەنات توراعاسى ارىپتەسىنە سەناتور رەتىندە زاڭ شىعارۋ سالاسىندا اتقارعان ەسەلى ەڭبەگى ءۇشىن مەملەكەت باسشىسىنىڭ العىسحاتىن سالتاناتتى تۇردە تاپسىردى.
ءىس-شارا بارىسىندا پالاتا سپيكەرى بارشاعا تەڭ مۇمكىندىك جاسالعان ينكليۋزيۆتى قوعام قالىپتاستىرۋ پرەزيدەنت قولعا العان رەفورمالاردىڭ ماڭىزدى باسىمدىقتارىنىڭ ءبىرى ەكەنىن ايتتى. كەيىنگى جىلدارى وسى باعىتتا جۇيەلى جۇمىس جۇرگىزىلىپ كەلەدى. سونىڭ ناتيجەسىندە كوپتەگەن سالادا وڭ ءۇردىس بايقالىپ وتىر.
سونداي-اق م.اشىمباەۆ قازىرگى تاڭدا قازاقستاندا 725 مىڭعا جۋىق مۇگەدەكتىگى بار ادام تۇراتىنىنا, ونىڭ 232 مىڭى ەرەكشە ءبىلىم بەرۋدى قاجەت ەتەتىنىنە نازار اۋداردى. سەنات توراعاسى ولاردىڭ ءبارى لايىقتى ءبىلىم الۋعا قۇقىلى ەكەنىن تىلگە تيەك ەتىپ, اتالعان ماسەلەدە ءالى دە بولسا ءتۇيىنى تارقاتىلماعان تۇيتكىلدەر بارىن ەسكە سالدى. بۇل, ەڭ الدىمەن, كاسىپتىك جانە جوعارى ءبىلىم الۋعا قاتىستى بولىپ وتىر.
«وكىنىشكە قاراي, كەيىنگى جىلدارى ەرەكشە ءبىلىم بەرۋ قاجەتتىلىگى بار بالالار سانى ارتىپ وتىر. سوندىقتان بارلىق بالاعا ساپالى ءبىلىم الۋدىڭ قولجەتىمدىلىگىن قامتاماسىز ەتۋدى جەتىلدىرۋ كەرەك. ەرەكشە قاجەتتىلىگى بار ادامداردى وقىتۋ ورتا بىلىممەن شەكتەلمەۋگە ءتيىس. ولاردىڭ لايىقتى جۇمىس تاۋىپ, قوعامنىڭ تولىققاندى مۇشەسى بولۋى ءۇشىن كاسىبي جانە جوعارى ءبىلىم الۋىنا دا جاعداي جاسالۋى قاجەت. قازىر جوعارى وقۋ ورىندارىندا ءبىلىم الىپ جۇرگەن مۇمكىندىگى شەكتەۋلى ازاماتتار سانى از. بۇل اتالعان ساناتتاعى ادامداردىڭ ساپالى ءبىلىم الۋىنا كەدەرگى كەلتىرەتىن قيىندىقتار بار ەكەنىن كورسەتەدى. دەمەك, ولاردىڭ ءارى قاراي جۇمىسقا ورنالاسىپ, قوعامنان ءوز ورنىن تابۋىنا تەرىس اسەر ەتەتىن ماسەلەلەر جوق ەمەس», دەدى م.اشىمباەۆ.
سەنات توراعاسى ساپالى ءبىلىم الۋعا جانە مۇگەدەكتىگى بار ادامداردىڭ قابىلەتتەرىن دامىتۋعا تۇساۋ بولىپ وتىرعان تاعى ءبىر وزەكتى ماسەلەگە توقتالدى. بۇل – ەڭبەك نارىعىنىڭ وسى ساناتتاعى ازاماتتاردىڭ قاجەتتىلىكتەرىنە بەيىمدەلمەۋى.
ەلىمىزدە 2012 جىلدان بەرى مەملەكەتتىك ءبىلىم گرانتتارىن ءبولۋ كەزىندە 1 پايىزى مۇمكىندىگى شەكتەۋلى جاندارعا قاراستىرىلىپ كەلەدى. الايدا پالاتا سپيكەرىنىڭ ايتۋىنشا, بۇل شارا جەتكىلىكسىز. ينكليۋزيۆتى ءبىلىم بەرۋگە قاتىستى پروبلەمالاردى شەشۋ كەشەندى ءتاسىلدى قاجەت ەتەدى. سوندىقتان بۇل رەتتە زاماناۋي ءبىلىم بەرۋ باعدارلامالارى, وقىتۋدىڭ ءتيىمدى ادىستەرى, ەرەكشە ءبىلىم بەرۋ قاجەتتىلىگى بار بالالارمەن جۇمىس ىستەي الاتىن بىلىكتى پەداگوگتەر دايارلاۋ سياقتى ماسەلەلەرگە باسا ءمان بەرگەن ءجون.
«بۇگىندە ەلىمىزدەگى ءاربىر ەكىنشى پەداگوگ ەرەكشە قاجەتتىلىگى بار بالالارعا ارنالعان جەكە وقۋ جوسپارلارىن ازىرلەۋدە قيىندىقتارعا تاپ بولادى. بۇل – مۇعالىمدەرىمىزدىڭ ايتارلىقتاي بولىگى ينكليۋزيۆتى ورتادا جۇمىس ىستەۋگە دايىن ەمەس دەگەن ءسوز. جالپى, ءبىز ەرەكشە ءبىلىم بەرۋدى قاجەت ەتەتىن بالالاردىڭ بارلىق كەزەڭدە, ياعني بالاباقشا, مەكتەپ, كوللەدج جانە جوعارى وقۋ ورنىندا ساپالى ءبىلىم الۋى ءۇشىن ءتيىستى جاعداي جاساۋىمىز كەرەك», دەدى سەنات توراعاسى.
كەڭەس وتىرىسىندا دەپۋتاتتارمەن بىرگە وقۋ-اعارتۋ ءمينيسترى عاني بەيسەمباەۆ, عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اسقاربەك ەرتاەۆ, دەنساۋلىق ساقتاۋ ۆيتسە-ءمينيسترى تيمۋر سۇلتانعازيەۆ, الەۋمەتتىك يننوۆاتورلار قاۋىمداستىعىنىڭ پرەزيدەنتى ەمين اسكەروۆ, «شىراق» مۇگەدەكتىگى بار ايەلدەر قاۋىمداستىعىنىڭ ديرەكتورى تاتيانا باكلاجانسكايا, «قايرات يماناليەۆ اتىنداعى مۇگەدەكتىگى بار ادامداردىڭ قۇقىقتارى جونىندەگى كوميسسيا» قوعامدىق بىرلەستىگىنىڭ توراعاسى گۇلميرا بوراشەۆا, «تەڭ مۇمكىندىكتەر الەمى» قوعامدىق قورىنىڭ ديرەكتورى نۇرگۇل ۇلجەكوۆا جانە تاعى باسقا قاتىسۋشىلار ءسوز سويلەپ, ەرەكشە قاجەتتىلىگى بار ادامداردىڭ ساپالى ءبىلىم الۋ مۇمكىندىكتەرىن كەڭەيتۋگە قاتىستى تىڭ باستامالارىن ۇسىندى.
وتىرىس سوڭىندا كەڭەس بارلىق ۇسىنىستى جان-جاقتى زەردەلەپ, مۇددەلى تاراپتاردىڭ بىرلەسىپ جۇمىس ىستەۋى ءۇشىن ءتيىستى مەملەكەتتىك ورگاندارعا جولدايتىنى ايتىلدى.