بۇرىنعىلار «اسىق ويناعان ازار, دوپ ويناعان توزار» دەۋشى ەدى. قازىر اسىق اتىپ, ابىرويعا بولەنىپ, دوپ قۋالاپ, دۇنيەنى دوپشا ءۇيىرىپ جۇرگەندەر كوپ. سونىڭ ءبىر ايقىن كۋاسى – «Respublica» پارتياسى مەرەكەگە وراي «Qazaqstan» جەڭىل اتلەتيكا سپورت كەشەنىندە اسىق اتۋدان العاش رەت اشىق تۋرنير ۇيىمداستىردى. ءتۋرنيردىڭ فينالدىق كەزەڭىنە 17 وبلىس, 3 مەگاپوليستەگى ىرىكتەۋ جارىسىنىڭ قورىتىندىسىنا ساي, 21 جاستان اسقان 2 مىڭعا جۋىق قاتىسۋشىنىڭ اراسىنان 1-2 ورىن العان 40 سپورتشى عانا جولداما الدى.
قازىر ەلىمىزدە 90 مىڭعا جۋىق ويىنشى اسىق اتىپ, ۇلتتىق ويىنىمىزدى ۇلىقتاپ ءجۇر. 800-گە جۋىق جاتتىقتىرۋشى بار. تورەشىلەردىڭ دە قاتارى ارتىپ, كاسىبي بىلىكتىلىگى كوتەرىلىپ كەلەدى. سايىستار دا جۇيەلى ۇيىمداستىرىلىپ ءجۇر.
«مۇنداي تۋرنير ۇيىمداستىرۋدى جارتى جىل بۇرىن قولعا الىپ, وڭىرلەردە ىرىكتەۋ جارىستارىن باستاپ كەتتىك. اسىق اتۋ كوپشىلىكتىڭ ويىندا اۋىل بالالارىنىڭ كۇندەلىكتى ويىنى رەتىندە قالىپ قويعان. ونى ۇلتتىق, بۇقارالىق دەڭگەيگە كوتەرۋ ماقساتىندا قوماقتى جۇلدە تىگىپ, كوپشىلىك قىزىعۋشىلىعىن ارتتىرساق دەپ شەشتىك. ىرىكتەۋ كەزەڭدەرىندە دە جۇلدەگەرلەر اقشالاي سىياقىمەن ماراپاتتالدى. الداعى جىلدارى داستۇرگە اينالدىرساق دەگەن ويىمىز بار. تەك 21 جاستان اسقاندارعا عانا ەمەس, جاسوسپىرىمدەر ساناتىن دا قوسۋ جوسپاردا بار. سەبەبى, جاس بۋىندى قازىردەن ۇلكەن دودالارعا دايىنداي بەرۋىمىز كەرەك. جارىس بارىسىنا توقتالاتىن بولساق, باسەكەلەستىك وتە جوعارى بولدى. 4-5 جىل بويى ەل چەمپيونى اتانعان, IV دۇنيەجۇزىلىك كوشپەلىلەر ويىنىنا قاتىسقانداردىڭ ءوزى جەڭىلىسكە ۇشىرادى. ءبارى ءادىل بولسىن دەپ ارنايى كامەرا دا قويدىردىق. جاڭا ەسىمدەردى شىعارىپ, ولارعا مۇمكىندىك بەرۋ – اسىق اتۋ ويىنىنىڭ ابىرويى», دەدى «كوشپەلىلەردىڭ اسىق سپورتى» حالىقارالىق فەدەراتسياسىنىڭ پرەزيدەنتى ولجاس قۇسپەكوۆ.
سپورتتىق ءىس-شارانىڭ اشىلۋ سالتاناتىندا «Respublica» پارتياسى فراكتسياسىنىڭ جەتەكشىسى ايداربەك قوجانازاروۆ پارتيا اتىنان اسىق اتۋ فەدەراتسياسىنىڭ دامۋىنا 5 ملن تەڭگە كولەمىندە قارجىلاي كومەك بەرىلگەنىن, پارتيا مۇشەلەرى اسىق اتۋ عانا ەمەس, توعىزقۇمالاق ۇلتتىق سپورتىنىڭ دامۋىنا ۇلەس قوسىپ جاتقانىن جەتكىزدى.
تۋرنير تارتىسقا تولى بولدى. قۇرالايدى كوزگە اتقان مەرگەندەر سوڭعى ساتكە دەيىن جەڭىسكە ۇمتىلدى. سونداي ويىننىڭ ءبىرى شيرەك فينالدا شىمكەنت قالاسىنىڭ سپورتشىسى, قىرعىزداردىڭ ۇلتتىق ويىنى – «وردو» ويىنىنان IV دۇنيەجۇزىلىك كوشپەلىلەر ويىنىنىڭ كۇمىس جۇلدەگەرى انۋاربەك نۇرجىگىت پەن الماتى قالاسىنىڭ ۇزدىگى تاۋباي جۇمابەكتىڭ اراسىندا بولدى. جەڭىمپاز تەك قوسىمشا اتىس بارىسىندا عانا انىقتالدى. 4:5 ەسەبىمەن جەڭىلۋدىڭ الدىندا تۇرعان انۋاربەك نۇرجىگىت دەر كەزىندە جيناقتالىپ, 6:5 ەسەبىمەن باسىم ءتۇستى.
انۋاربەك نۇرجىگىت العاشقى ويىندا «الاش ساقاسى» ءتۋرنيرىنىڭ كۇمىس جۇلدەگەرى عارىشبەك ق ۇلىبەكتەن 2:1 ەسەبىمەن باسىم تۇسسە, ەكىنشى جۇپتا العاشقى ءىرى دوداعا قاتىسىپ جاتقان جەتىسۋ وبلىسىنىڭ سپورتشىسى قاستاي ماناس سوڭعى ساتكە دەيىن نۇرلان جومارتقا (پاۆلودار وبلىسى) قارسىلىق كورسەتتى. الما-كەزەك باسىمدىقپەن وتكەن كەزدەسۋ 2:1 ەسەبىمەن نۇرلاننىڭ پايداسىنا شەشىلدى.
ءۇشىنشى ورىنعا تالاستا تاجىريبەلى عارىشبەك ق ۇلىبەك جەتىسۋ وبلىسىنىڭ وكىلىن ەكى ويىندا دا مەرزىمىنەن بۇرىن ۇتىپ, قولا جۇلدەگە يە بولدى. ال فينالدىق باسەكەدە انۋاربەك نۇرجىگىت اسىق اتۋدان IV دۇنيەجۇزىلىك كوشپەلىلەر ويىنىنىڭ چەمپيونى نۇرلان جومارتقا ەكى ويىندا دا مۇمكىندىك قالدىرمادى.
«وتە قۋانىشتىمىن. تۋرنيردەگى ەڭ شەشۋشى تۇس – شيرەك فينالدا ءوربىپ, الماتى قالاسىنىڭ سپورتشىسىنان باسىم ءتۇستىم. سول جەڭىس جىگەر بەردى. فينالدا باق سىناسقان نۇرلان جومارتپەن بىلتىر شىمكەنتتەگى باسەكەنىڭ شەشۋشى ويىندارىندا دا جولىمىز ءتۇيىسىپ, جەڭگەن ەدىم. بارشا قولداعان جاقىندارىما, باپكەرىمە العىسىمدى ايتامىن», دەدى اشىق ءتۋرنيردىڭ چەمپيونى انۋاربەك نۇرجىگىت.
مىڭنان وزا شاپقان انۋاربەك نۇرجىگىت JAC تەمىر تۇلپارىن تىزگىندەسە, كۇمىس جۇلدەگەر نۇرلان جومارت 1 000 000 تەڭگە سىياقى الدى. ال قولا جۇلدەگەر عارىشبەك ق ۇلىبەك 500 000 تەڭگە سىياقىنى يەلەندى. جەڭىسكە دەگەن جىگەرى ءۇشىن جەتىسۋ وبلىسىنىڭ وكىلى قاستاي ماناسقا ارنايى كۋبوك تابىس ەتىلدى.
جالپى, كوشپەلىلەردىڭ اسىق سپورتى حالىقارالىق فەدەراتسياسى قۇرىلعان جارتى جىلدىڭ ىشىندە 14 ەلدە تۇراقتى اسىق ويناۋ فەدەراتسياسى تىركەلدى. اسىق ويناۋ سپورتى كوشپەلىلەر ويىنىنىڭ تۇراقتى ءتۇرى بولىپ بەكىتىلدى. ناتيجەسىندە, بيىل ۇلتتىق قۇرامامىز قىرعىزستان كومانداسىن 2:1 ەسەبىمەن جەڭىپ, توپ جاردى. ەندى ەكى جىلدا ءبىر رەت الەم چەمپيوناتى وتكىزىلىپ تۇراتىن بولدى. العاشقىسى بيىل ەلوردا تورىندەگى «Aspan» سپورت كەشەنىندە ۇيىمداستىرىلىپ, وعان 14 ەلدىڭ وكىلى قاتىستى.