“قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا قازاقستان رەسپۋبليكاسى تۇڭعىش پرەزيدەنتىنىڭ – ەلباسىنىڭ قىزمەتىن قامتاماسىز ەتۋ سالاسىندا زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى” كونستيتۋتسيالىق زاڭ ۋاقتىلى ءارى دەر كەزىندە قابىلداندى دەپ ويلايمىن.
قازاقستاننىڭ قازىرگى ەكونوميكالىق قۋاتى مەن الەۋمەتتىك جەتىستىكتەرىنە دۇنيە جۇزىندەگى مەملەكەتتەردىڭ بارلىعى دا قىزىعا قاراپ وتىر. تاۋەلسىزدىك العان جىلداردان بەرى قارايعى 20 جىلعا جۋىق ۋاقىتتا پرەزيدەنت نۇرسۇلتان نازارباەۆتىڭ كورەگەندىك, سارا ساياساتىنىڭ ارقاسىندا ەلىمىز مولشىلىق پەن تىنىشتىقتا ءومىر ءسۇرىپ كەلەدى. اتالارىمىز ەركىندىك ءۇشىن تالاي عاسىر الىسىپ وتسە, سول تاۋەلسىزدىكتىڭ جەمىسىن حالقىمىز كورىپ جاتىر.
بۇرىنعى بايلانىسىپ, قالىپتاسىپ قالعان ەكونوميكالىق قاتىناستاردىڭ بارلىعى بىردەن ۇزىلگەن, ونىڭ ۇستىنە جوسپارلى ەكونوميكانىڭ ورنىنا نارىقتىق ەكونوميكا كەلگەن 90-شى جىلداردىڭ اۋىرلىعىن ايتىپ جەتكىزۋ كوپ اڭگىمە. قايدا بارساڭ دا تۇيىققا تىرەلگەن ۋاقىت ەدى. مىنە, سونداي كەزدە تىعىرىقتان جول تاپقان, الىستى كوزدەپ جول باستاعان پرەزيدەنت نۇرسۇلتان نازارباەۆتىڭ ارقاسىندا مەملەكەتىمىزدىڭ جۇگى اۋماي, كوشىن دۇرىستاپ كەتتى. بۇرىنعى كەڭەس وداعى قۇرامىنداعى رەسپۋبليكالاردىڭ كوبىندە وسى قيىنشىلىققا توتەپ بەرمەگەندىكتەن, ۇرىس-جانجالدار, كۇن قۇرعاتپاعان ەرەۋىلدەر بولىپ جاتتى. سولاردىڭ ءبىرازى ءالى دە تىنشىعان جوق.
90-شى جىلدارداعى قيىندىقتار مەنىڭ دە ءالى كۇنگە كوز الدىمدا. ءبىراق قانشا قينالساق تا, كۇننەن-كۇنگە جاعدايدىڭ تۇزەلىپ كەلە جاتقاندىعىن سەزەتىنبىز. 2000 جىلى ەكونوميكامىز كادىمگىدەي ەڭسە تۇزەپ, ەلدىڭ تۇرمىسى جاقسارا باستاعانىن دا بىلەمىن.
مەن تاۋەلسىزدىك العان جىلدان باستاپ ەلباسى ساياساتىن قولداپ كەلە جاتقان ازاماتتىڭ ءبىرىمىن. جىل سايىن توتىداي تارانىپ, قۇلپىرىپ ءوسۋ ۇستىندەگى ەلوردا دامىعان دۇنيە ءجۇزى ەلدەرىنىڭ نازارىن وزىنە اۋدارا باستادى. استانا الماتىدان سارىارقا توسىنە كوشىرىلەدى دەگەندە ءبىراز جۇرتتىڭ بۇل ۇدەرىسكە كۇمانمەن قاراعانىن دا بىلەمىز. وسىنداي ساتتە ۇتىمدى دا باتىل شەشىم جاساعان پرەزيدەنت نۇرسۇلتان نازارباەۆتىڭ ەرىك-جىگەرىنىڭ مىقتىلىعىنا ءارى الىستى كورە بىلەتىنىنە تاڭقالماسقا بولمايدى. اينالاسى ونشاقتى جىلدىڭ ىشىندە ەرەكشە ۇلگىدەگى اسەم قالا بوي تۇزەدى.
بارلىق انالار سەكىلدى مەن دە بالالارىمنىڭ بولاشاعىن كوبىرەك ويلايمىن. جاس ۇرپاققا الدىمەن بەيبىتشىلىك كەرەك. ب ۇلىنشىلىگى توقتاماي جاتقان قىرعىزستانداعى بالالار قانداي دەڭگەيدە ءبىلىم الا الادى؟ نۇرسۇلتان نازارباەۆتىڭ ەلىمىزدە جۇرگىزىپ وتىرعان ۇلت ساياساتى ءبارىمىزدىڭ دە كوڭىلىمىزگە قونادى. ورىسى, قازاعى بار – ءبارىمىز سىيلاستىقپەن ءومىر ءسۇرىپ جاتىرمىز. پرەزيدەنتىمىزدىڭ “الدىمەن – ەكونوميكا, سوسىن – ساياسات” دەگەن ۇستانىمى ءوزىنىڭ ءومىرشەڭدىگىن دالەلدەپ بەردى. قازىر ەڭبەك ەتسەڭ – قارنىڭ توق. ادامدارعا جۇمىس بولۋى ءارى ەكونوميكانى ودان ءارى نىعايتۋ ءۇشىن ينۆەستيتسيالىق جوبالار جۇزەگە اسىپ جاتىر. ەڭبەكاقى مەن الەۋمەتتىك تولەمدەر ۋاقتىلى تولەنەدى. مۇنان ارتىق ادامدارعا نە كەرەك؟
نۇرسۇلتان ءابىش ۇلىنا دەگەن ەلدىڭ ىقىلاسى ەرەكشە. ۇلتىنا قاراماي كىمنەن سۇراساڭ دا “پرەزيدەنتىمىز – ەلباسىمىز امان بولسىن. ەلىمىز تىنىش بولسىن”, دەگەندى ايتادى. پارلامەنت مۇنداي زاڭدى قاراماي تۇرعاندا-اق حالىق پرەزيدەنت نۇرسۇلتان نازارباەۆتى ەلباسى دەپ اتادى. ونىڭ مىقتى ساياساتكەر عانا ەمەس, ۇلت كوشباسشىسى ەكەنى الدەقاشان-اق شىنايى مويىندالعان. مىنا زاڭ ەلدىڭ سول ىقىلاسىن رەسمي بەكىتتى. بۇل پرەزيدەنت نازارباەۆقا –ۋاقىتتىڭ, حالىقتىڭ بەرگەن ءادىل باعاسى.
قازاقستاندىقتاردىڭ مىندەتى پرەزيدەنتتىڭ جولداۋلارىن, ساياساتىن جۇزەگە اسىرۋعا قولدان كەلگەنشە ۇلەس قوسۋ بولىپ تابىلادى.
عاينيجامال بەردالينوۆا, “تازا بۇلاق” قوعامدىق قورىنىڭ ءتورايىمى.
قوستاناي.
حالىق مويىنداعان اقيقات
پرەزيدەنتىمىز نۇرسۇلتان نازارباەۆ مەملەكەتىمىزدى الەمدەگى دامىعان ەلدەردىڭ قاتارىنا قوسۋ ءۇشىن ايانباي ەڭبەك ەتىپ, كورەگەن باسشىعا ءتان بىلىمدارلىقپەن, بىلىكتىلىكپەن حالقىن ەڭ قيىن كەزەڭدەردەن ءوزى باس بولىپ, امان-ەسەن الىپ شىعىپ كەلەدى.
ەلباسى ۇدايى نازاردا ۇستاپ وتىرعان مەملەكەتتىك ساياساتتىڭ ءناتيجەسىندە قازاقستاندا تۇراتىن ءاربىر ەتنوس ءوزىنىڭ تاريحى مەن رۋحاني قۇندىلىقتارىن, سالت-داستۇرلەرىن ساقتاۋ مەن ونى دامىتۋدا تەڭ قۇقىقتارعا يە بولعان. ول ەلىمىزدەگى دىنارالىق جانە ەتنوسارالىق كەلىسىمگە ۇلاسىپ, ءتىپتى حالىقتار دوستىعىنىڭ حالىقارالىق عاجايىپ ۇلگىسىنە اينالۋدا.
ەلىمىزدىڭ ءبىراۋىزدى بىرلىگى مەن باياندى تىرلىگى جولىنداعى بۇل يگى ىستە جامبىل وبلىسىنداعى ماحمۇت قاشعاري اتىنداعى ۇيعىر ەتنومادەني بىرلەستىگىنىڭ دە ۇلەسى مول. جۋىردا ءبىز وبلىس ورتالىعىندا “ەتنوسارالىق جانە كونفەسسياارالىق كەلىسىم – ساياسي تۇراقتىلىق پەن گۇلدەنۋدىڭ نەگىزى” اتتى رەسپۋبليكالىق عىلىمي-پراكتيكالىق كونفەرەنتسيا وتكىزدىك. ءبىز وندا جۇمىسىمىزدى قازاقستان ەتنوستارىنىڭ رۋحاني-مادەني جانە ازاماتتىق بىرلىگىن ەسكەرە وتىرىپ, قازاق حالقىنىڭ مادەنيەتى مەن مەملەكەتتىك تىلىنە باسىمدىق بەرە وتىرىپ جۇرگىزدىك.
ەلباسىمىز بىزگە ءاربىر ءىستى باستاۋ مەن ونى تياناقتى اياقتاۋ ءۇلگىسىن جانە اتقارىلاتىن كەز كەلگەن وڭدى ىسكە ساياسي تۇراقتىلىق, ءوزارا سەنىمدىلىك پەن توزىمدىلىك كەپىل بولا الاتىندىعىن ءوزىنىڭ سىندارلى ساياساتىمەن كورسەتۋدە. سوندىقتان ءبىز قازاقستاندى, قازاق حالقىن جانە ەلباسىن ماقتان تۇتامىز.
قازاقستاننىڭ تۇڭعىش پرەزيدەنتى نۇرسۇلتان نازارباەۆ – ءبىزدىڭ شىن مانىندەگى كوشباسشىمىز. ال پارلامەنت سەناتىنىڭ ءتوراعاسى ق.توقاەۆتىڭ, پارلامەنت ءماجىلىسىنىڭ توراعاسى و.مۇحامەدجانوۆتىڭ جانە پرەمەر-مينيستر ك.ءماسىموۆتىڭ قولدارى قويىلعان زاڭدارعا كەلسەك, ول حالىق مويىنداعان سول اقيقاتتى قاعاز جۇزىندە بەكىتۋ دەپ بىلەمىز.
ماحاببات تۇرديەۆا, جامبىل وبلىسى بويىنشا ماحمۇت قاشعاري اتىنداعى ۇيعىر ەتنومادەني بىرلەستىگىنىڭ ءتورايىمى.
جامبىل وبلىسى.