اقمولا وبلىسىندا ەكىنشى توقساننان باستاپ تاعى ەكى جاڭا جايلى مەكتەپ جۇمىسىن باستايدى. جايلى مەكتەپ 1200 ورىنعا ەسەپتەلگەن. رەسپۋبليكا كۇنى قارساڭىندا اقمولا وبلىسىنىڭ اكىمى مارات احمەتجانوۆ پەن قر پارلامەنتى ءماجىلىسىنىڭ دەپۋتاتى اينا ءمىسىرالىموۆا قابانباي باتىر اۋىلىنداعى مەكتەپ-ليتسەيدى ارالاپ كوردى, دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
وقۋشىلار ءۇشىن جاڭا موديفيكاتسياداعى كابينەتتەر, سپورت زالدارى, STEM-زەرتحانا, كەڭ اسحانا, كىتاپحانا, سپورت الاڭى جانە باسقا دا مۇمكىندىكتەر قاراستىرىلعان.
«كەلەسى توقساندا بۇل مەكتەپتە 800-دەن استام وقۋشى ءبىلىم الا باستايدى. ايتا كەتۋ كەرەك, مەكتەپ تەك قابانباي باتىر اۋىلى تۇرعىندارىنىڭ عانا ەمەس, جاقىن ماڭداعى ەلدى مەكەندەردەگى بالالاردىڭ دا ءبىلىم الۋىنا قىزىعۋشىلىق تانىتىپ وتىرعان ورتالىققا اينالدى», دەدى مەكتەپ-ليتسەيدىڭ ديرەكتورى رۇستەم جاحين.
ءوڭىر اكىمى جاڭا وقۋ جىلىندا وبلىستا 8 مەكتەپ اشىلعانىن, ولاردىڭ 6-ۋى ورىن جەتىسپەۋشىلىگى ماسەلەسىن شەشۋ جانە وقۋشىلارعا قولايلى جاعداي جاساۋ ماقساتىندا ۇلتتىق جوبا اياسىندا سالىنعانىن اتاپ ءوتتى.
«مەملەكەت باسشىسىنىڭ باستاماسىمەن ءبىزدىڭ ءوڭىر اۋىلدارىندا جايلى مەكتەپتەر اشىلىپ جاتىر, ولاردىڭ جاعدايى قالالىق مەكتەپتەردەن ەش كەم ەمەس. ءبىر اۋىسىمدا وقىتۋ قوسىمشا ءبىلىم بەرۋ جۇيەسىنىڭ ءتيىمدى جۇمىسىن ۇيىمداستىرۋعا مۇمكىندىك بەرەدى. ءبىزدىڭ ەلىمىزدىڭ بولاشاعى – ءبىلىمدى جانە جان-جاقتى دامىعان بالالاردىڭ قولىندا», دەدى مارات احمەتجانوۆ.
ايتا كەتەيىك, تاعى ءبىر جايلى مەكتەپ قاراجار اۋىلىندا اشىلدى.