شىعىس قازاقستان وبلىسىندا ورتا ازيادا تەڭدەسى جوق كوپىر قۇرىلىسى اياقتالىپ, حالىق يگىلىگىنە سالتاناتتى تۇردە تاپسىرىلعانىنا ەل بولىپ قۋانىپ جاتىرمىز.
ەرتەرەكتە, بالا كەزىمىزدە اكەلەرىمىزدىڭ «جاز جايلاۋدا بالىقشىدان وسكەمەن, سەمەيگە جول تارتقاندا (بالىق جەتكىزۋ) ەرتىس وزەنىنەن سالمەن وتەتىن ەدىك. جەل سوقسا, سال وزەندى كەسىپ وتۋگە جاراماي, تۇرالاپ قالاتىنبىز. قارلى, بوراندى قىستا جانىمىزدى شۇبەرەككە ءتۇيىپ, ات شانامەن مۇز ۇستىنەن وتەتىن ەدىك» دەگەنىن تالاي ەستىپ وستىك. ارعى جاعا مەن بەرگى جاعانىڭ اراسى 6 شاقىرىم بولاتىن وتكەلگە پاروم ءتۇسىپ, كولىكتەردى تاسىمالداپ جۇرگەنىنىڭ وزىنە 50 جىلدان استام ۋاقىت ءوتىپتى. پارومعا ۇلگەرمەي, سىيماي قالاتىن ساتتەردەگى سارىلا كۇتۋدىڭ ءوزى ءبىر توبە اڭگىمە-ەستەلىك.
قىستىڭ بوراندى, كوكتەمنىڭ جىلىمىق كۇندەرىندە مۇز جارىلىپ, ۇستىمەن ءوتىپ بارا جاتىپ, قىزىل سۋ جينالعان جەردىڭ جۇقالتاڭ جەرىندە سۋعا كەتكەن قانشاما جەرلەستەرىمىز, كولىك قۇرالدارى بولدى. الماتىدان اۋىلىمىزعا كەلگەندە تاياق تاستام جەردەگى ۇيىمىزگە جەتە الماي, ات شاناعا جارماسىپ, جاياۋ ەرتىستەن وتكەن كەزدەرىمىز جادىمىزدا.
وسى عاسىر قۇرىلىسىنىڭ باسى-قاسىندا ءجۇرىپ, بولىنگەن قاراجاتتى شاشاۋ شىعارماي, ەرەن ەڭبەك سىڭىرگەن بارلىق ازاماتقا العىسىمىز شەكسىز. اسىرەسە, ەلدىڭ تىلەك-ارمانىن ەستىپ, وسىناۋ يگىلىكتى ىسكە ۇيىتقى بولعان مەملەكەت باسشىسى قاسىم-جومارت توقاەۆقا ريزالىعىمىزدى جەتكىزەمىز.
اسحات ساليەۆ,
ينجەنەر-قۇرىلىسشى
استانا