Esil University-دە «سەيىتقاسىموۆ وقۋلارى – 2024» حالىقارالىق عىلىمي-تاجىريبەلىك كونفەرەنتسياسى ءوتتى. اتالعان وقۋ ورداسىنىڭ العاشقى رەكتورى عابدىعاپار ساعيت ۇلىنىڭ عىلىمي مۇراسىن دارىپتەۋگە ارنالعان جيىن بيىل ۋنيۆەرسيتەتتىڭ 25 جىلدىعىنا وراي ۇيىمداستىرىلدى.
سالتاناتتى ءىس-شارانى Esil University رەكتورى اياپبەرگەن تاۋباەۆ اشىپ, بۇل كونفەرەنتسيا ەكونوميكا سالاسىنىڭ دامۋ قارقىنىن تالقىلاۋعا تاماشا مۇمكىندىك ەكەنىن اتاپ ءوتتى. كەلەلى كەڭەسكە جوعارى وقۋ ورىندارىنىڭ وكىلدەرى, قوعام قايراتكەرلەرى, سونداي-اق يندونەزيا, مالايزيا, ماجارستان, رەسەي جانە وزبەكستاننان كەلگەن شەتەلدىك قوناقتار قاتىسىپ, قارجى-ەكونوميكا تاقىرىبىندا پىكىر الماستى.
عىلىمي جيىن بارىسىندا ۇلتتىق بانكتىڭ تۇڭعىش توراعاسى عالىم باينازاروۆ «اقشا-كرەديت جۇيەسىنىڭ قازىرگى ماسەلەلەرى» تاقىرىبىندا بايانداما جاساپ, ەلىمىزدىڭ تۇراقتى ەكونوميكالىق ءوسۋىن قامتاماسىز ەتۋ ماقساتىندا اقشا-كرەديت ساياساتىن جاھاندىق وزگەرىستەرگە بەيىمدەۋ قاجەتتىگىنە باسا نازار اۋداردى. سونداي-اق كونفەرەنتسيا اياسىندا زاڭ عىلىمدارىنىڭ دوكتورى, Esil University قۇقىق كافەدراسىنىڭ پروفەسسورى الپىسباي ءجۇسىپوۆ «زاماناۋي ءبىلىم بەرۋدەگى قۇقىقتىق يننوۆاتسيالار» تاقىرىبىندا ءسوز سويلەپ, تسيفرلىق ترانسفورماتسيا جاعدايىندا وقىتۋ جۇيەسىن جاڭعىرتۋدىڭ ماڭىزدىلىعىنا ەرەكشە نازار اۋداردى.
ايتا كەتەيىك, «سەيىتقاسىموۆ وقۋلارى» حالىقارالىق عىلىمي-پراكتيكالىق كونفەرەنتسياسى جىل سايىن ءداستۇرلى تۇردە ۇيىمداستىرىلادى. بيىل بەسىنشى مارتە وتكەن جيىندا 202 بايانداما ۇسىنىلسا, شەتەلدەن كەلگەن عالىمداردىڭ حالىقارالىق ىنتىماقتاستىق پەن تاجىريبە الماسۋعا باعىتتالعان 30 عىلىمي ەڭبەگى تالقىلاندى.