وسى ايدىڭ ءبىرىنشى كۇنى Spectrum حالىقارالىق مەكتەبىندە «اتوم دانىشپانى» زياتكەرلىك ويىنىنىڭ قورىتىندىسى بويىنشا ەلوردانىڭ ۇزدىك جاس فيزيگى انىقتالدى. وعان سالا ماماندارى مەن ءتيىستى ۆەدومستۆو وكىلدەرى دە قاتىستى.
«قازاقستاندىق اتوم ەلەكتر ستانسالارى» جشس جوعارى سىنىپ وقۋشىلارى اراسىندا قىزىقتى عىلىمي ويىن ۇيىمداستىردى. ونداعى ماقسات عىلىمنىڭ بولاشاعى زور سالاسى – يادرولىق فيزيكا مەن اتوم ەنەرگەتيكاسى تۋرالى جاستاردى حاباردار ەتۋ. سونداي-اق عىلىم مەن ءبىلىم, تەحنيكا مەن زاماناۋي تەحنولوگياعا دەگەن قىزىعۋشىلىقتى ارتتىرۋ ماقساتىمەن «XXI عاسىر كوشباسشىسى» تەلەشوۋى فورماتىمەن «اتوم دانىشپانى» ينتەللەكتۋالدى ويىنىن ۇسىندى. «جۇيرىكتەن جۇيرىك وزار جارىسقاندا» دەمەكشى, وسى باعىتتا سىنعا ءتۇسىپ ىرىكتەلگەن ەلوردانىڭ ەڭ زەردەلى 6 وقۋشىسى ءوز ءبىلىمىن ساراپقا سالدى.
«اتوم دانىشپانى» ينتەللەكتۋالدى ويىنىنىڭ ءساتتى وتكەنىنە قۋانىشتىمىز. قاتىسۋشىلاردىڭ دايىندىق دەڭگەيى تاڭعالدىرادى. بۇل جاستار اراسىندا اتوم ەنەرگەتيكاسىنا دەگەن قىزىعۋشىلىقتىڭ ارتىپ كەلە جاتقانىن اڭعارتسا كەرەك. بۇعان قاراپ, سالانىڭ بولاشاعى سەنىمدى قولدا ەكەنىنە كوز جەتكىزدىك», دەدى قازىلار القاسىنىڭ مۇشەسى, «قازاقستان اتوم ەلەكتر ستانسالارى» جشس باس ديرەكتورى تيمۋر جانتيكين.
ەنەرگەتيكا مينيسترلىگى «اتوم ەنەرگەتيكاسى جانە ونەركاسىپ» دەپارتامەنتىنىڭ ديرەكتورى عۇمار سەرعازيننىڭ ايتۋىنشا, مۇنداي ءىس-شارا وسكەلەڭ ۇرپاقتىڭ عىلىمعا دەگەن قىزىعۋشىلىعىن ارتتىرىپ, وسى سالانىڭ دامۋىنا زور سەپتىگىن تيگىزەدى. سوندىقتان بۇل ينتەللەكتۋالدى ويىندى جىل سايىن ءداستۇرلى تۇردە وتكىزۋدى جوسپارلاعان.
«ورەنى ءوسىرىپ, وي-ءورىسىڭدى كەڭەيتەتىن ينتەللەكتۋالدى ويىنعا قاتىسۋ ماعان ۇلكەن تاجىريبە بولدى. مەن بۇگىن يادرولىق ەنەرگيا تەك رادياتسياعا عانا ەمەس, ەلىمىزدىڭ جالپى بولاشاق دامۋىنا دا تىكەلەي قاتىسى بار ەكەنىنە كوز جەتكىزدىم. بۇل مەنى وسى سالانى تەرەڭىرەك زەرتتەۋگە شابىتتاندىردى», دەدى ويىنعا قاتىسۋشى جانەل ناۋفيلوۆا.
ءىس-شارا سوڭىندا قاتىسۋشىلار ويىن سەرىكتەسى «قازاتومونەركاسىپ» ۇاك» اق باعالى سىيلىقتارىمەن ماراپاتتالدى. باس جۇلدەنى «زەردە» مەكتەبىنىڭ 9-سىنىپ وقۋشىسى بەلقوجا اسپەت جەڭىپ الىپ, «اتوم دانىشپانى» اتاندى. جاس اتوم دانىشپانىنا «يادرولىق فيزيكا ينستيتۋتى» رمك تاراپىنان استانا فيليالىندا عىلىمي تاعىلىمدامادان وتۋگە ارنايى جولداما بەرىلدى. ودان بولەك, بارلىق قاتىسۋشىلار كۋرچاتوۆ قالاسىنداعى «ۇلتتىق يادرولىق ورتالىققا» بارىپ ينجەنەرلەر جۇمىسىمەن تانىسادى.
ءبىلىم بايگەسىنىڭ باس جۇلدەگەرى فيزيكا عىلىمىنا, ونىڭ قۇدىرەتتى تارماعىنىڭ ءبىرى – اتوم ەنەرگەتيكاسىنا دەن قويعانىنا بىرنەشە جىل وتكەنىن ايتتى. «بولاشاقتىڭ سەنىمدى ەنەرگيا كوزى, سارقىلماس قۋات كۇشى – اتوم ەنەرگەتيكاسى. ەلىمىزدە ۋران قورى مول. سونى بىلىكتىلىكپەن ەڭ بيىك دەڭگەيىنە دەيىن يگەرىپ, حالىق قاجەتىنە ءتيىمدى جاراتۋدى ءبىلۋىمىز كەرەك», دەدى جاس فيزيكتەردىڭ ەڭ بىلگىرى.
«قاەس» جشس ەلدە اەس سالۋ بويىنشا جۇمىستى ۇيىمداستىرۋ مەن ونى جوبالاۋ الدىنداعى, سونداي-اق جوبالاۋ قۇجاتتاماسىن ازىرلەۋدى قامتاماسىز ەتۋ ماقساتىندا قۇرىلعان. بۇلارمەن بىرگە, اتوم ونەركاسىبى مەن اتوم ەنەرگەتيكاسى نىساندارى ارحيتەكتۋراسىن دامىتۋ, ولارعا ينجەنەرلىك زەرتتەۋلەردى ازىرلەۋ, سالادا تەحنيكالىق كەڭەس بەرۋ, اتوم ەنەرگياسىن بەيبىت ماقساتتا پايدالانۋداعى عىلىمي تۇجىرىمدار مەن تاجىريبەلىك ازىرلەمەلەر دايىندايدى.