باياناۋىلدى ءورت تۇمشالاپ تۇر

ماماندار ەكپىندى جەل ءورتتى ءسوندىرۋ جۇمىسىن قي­ىن­داتقانىن ايتادى. تو­تەنشە جاعدايلار مينيسترلىگىنىڭ ءباس­پا­سوز قىزمەتىنىڭ حابارلاۋىنشا, 6 قازان كۇنى قاراعاندى وبلىسى قارقارالى اۋدانى قوياندى اۋىلىنىڭ ماڭىندا قۇرعاق ءشوپ جانعان. ءورت ورنىنا ورمان شارۋاشىلىعىنىڭ, توتەنشە جاعدايلار كۇشتەرى مەن قۇرالدارى, ەرىكتى ورتكە قارسى قۇرىلىمدار دەرەۋ جىبەرىلگەن.

«كۇندىز دالا ءورتى پاۆلودار وبلى­سىنىڭ شەكاراسىنان «باياناۋىل» مەم­لەكەتتىك ۇلتتىق تابيعي پاركىنىڭ ور­مان­سىز اۋماعىنا اۋىسقان. ءورت ورنىنا «قازاۆياقۇتقارۋ» تىكۇشاقتارى باردى. تىكۇشاقتار سۋدى شالقاركول كولىنەن الىپ, ءورت وشاقتارىنا 6 رەت, جالپى كولەمى 18 توننا سۋ توككەن. سونداي-اق اەروۆيزۋالدى بارلاۋ بارىسىندا جەلتاۋ اۋىلىنىڭ تۇرعىندارىن الدىن الا ەۆاكۋاتسيالاۋ تۋرالى شەشىم قابىلداندى. قاۋىپسىز جەرگە 18 ادام (8-ءى بالا) ەۆاكۋاتسيالاندى. توتەنشە جاعدايلار مينيسترلىگى كوماندالىق ور­تا­­لىعىندا شتاب جۇمىس ىستەپ تۇر. ءورت ورنىندا قاراعاندى, پاۆلودار وبلىستارى توتەنشە جاعدايلار دەپارتامەنتتەرىنىڭ, جاو, ەترم كۇشتەرى, جەكە قۇرامنان 183 ادام, 56 تەحنيكا, 4 تىكۇشاق جۇمىل­دى­رىلدى. ءورتتىڭ الدىن الا اۋدانى 3000 گەك­تاردان استى», دەپ مالىمدەدى تجم.

پاۆلودار وبلىسىنىڭ اكىمى اسايىن بايحانوۆ ءتىلسىز جاۋدىڭ وقشاۋلانعانىن جەتكىزدى. ءورتتىڭ زارداپتارىن جويۋ جۇمىستارى جالعاسىپ جاتىر. وڭىردە قۇرباندار مەن زارداپ شەككەندەر جوق. ءورت شالعان جەردىڭ اۋماعى شامامەن 10 مىڭ گەكتارعا جەتىپ قالعان. جاعداي قالىڭ وسكەن ءشوپتىڭ, سەكۋندىنا 12–15 مەتر بولاتىن ەكپىندى جەلدىڭ سالدارىنان كۇردەلەنگەن.

ء«ورت وشاقتارىن جويۋ ورنىندا وڭىرلىك جەدەل شتاب وتىرىسىن وتكىزدىم. ءتىلسىز جاۋمەن كۇرەسۋگە بارلىق قاجەتتى كۇشتەر تارتىلدى: 310 ادام, 51 ارنايى تەحنيكا, 2 تىكۇشاق, 3 ۇشقىشسىز باسقارىلاتىن اپپارات جۇمىس ىستەپ جاتىر. مۇنداي دالا ورتتەرىنىڭ نەگىزگى سەبەبىنىڭ ءبىرى – ءشوپ شابۋ كەزىندە قول­دا­نىلاتىن تەحنيكالارداعى ۇشقىن سوندىرگىش قۇرىلعىلاردىڭ ىستە­مەۋىنەن. سوندىقتان بارلىق شارۋا قوجالى­عىنان مىندەتتى تۇردە ۇشقىن سوندىرگىش قۇرىلعىلار بولۋعا ءتيىس قولدانىستاعى تەحنيكالاردى تەكسەرۋدى, سونداي-اق ءوز شا­رۋا­شىلىقتارى مەن ۇيلەرىنىڭ, اسىرەسە ءشوپ قورى ساقتالاتىن ورىنداردىڭ اينالاسىن ۋاقىتىندا جىرتۋدى سۇرايمىن», دەدى ا.بايحانوۆ.

توتەنشە جاعدايلار ءمينيسترى شىڭعىس ءارىنوۆ كەشە پاۆلودار, قا­را­عاندى وبلىستارىنىڭ شەكارا­سىنداعى دالا ورتىنە قاتىستى سوڭعى مالىمەتتەرمەن ءبولىستى. ءمينيستردىڭ ايتۋىنشا, ءورتتىڭ جالپى اۋماعى 45 مىڭ گەكتارعا جەتكەن.

«مينيسترلىكتىڭ بۇكىل شتابى جۇ­مىلدىرىلدى. سونداي-اق پاۆلودار وبلى­سىندا جەدەل شتاب قۇرىلدى. مينيستر­لىكتەن, سونىمەن قاتار اباي وبلى­سىنان, باسقا دا وڭىرلەردەن قوسىمشا كومەك تارتىلدى. قازىرگى ۋاقىتتا دالا ءورتى تو­لىعىمەن وقشاۋلاندى, جاعداي با­قى­لاۋدا», دەدى ش.ءارىنوۆ ۇكىمەت وتىرىسى الدىندا.

ورتكە قورعانىس مينيسترلىگىنىڭ ۇشقىشتارى دا جۇمىلدىرىلىپ, ولار تىكۇشاق ارقىلى ءبىر تاۋلىكتە 36 توننا سۋ توككەن.

پاۆلودار وبلىسى,

باياناۋىل اۋدانى,

كۇركەلى اۋىلدىق وكرۋگى