اتىراۋ قالاسىندا سالىنىپ جاتقان تۇرعىن ۇيلەر از ەمەس. مۇنايلى شاھار اكىمى شاكىر كەيكيننىڭ ايتۋىنشا, الەۋمەتتىك تۇرمىسى تومەن توپ ساناتىنداعى تۇرعىندارعا پاتەر كەزەكپەن بەرىلىپ كەلەدى. سونداي كەزەكتەگى 130 وتباسىنا جاڭا باسپاناعا يە بولۋ باقىتى بۇيىردى.
«كەزەكتە تۇرعاندارعا پاتەر بەرۋ كەزىندە الەۋمەتتىك تۇرمىسى تومەن توپ, از قامتىلعان وتباسىلار مەن جالعىزباستى انالارعا باسىمدىق تانىتتىق. الداعى ۋاقىتتا دا تۇرعىنداردى جاڭا باسپانامەن قامتۋ جالعاسادى. قازىر «سامال» جانە «بەرەكە» شاعىن اۋدانىندا تۇرعىن ءۇي قۇرىلىسى ءجۇرىپ جاتىر. قۇرىلىس جۇمىستارى جىل سوڭىنا دەيىن اياقتالادى. سول كەزدە تاعى ءبىر توپ تۇرعىنعا جاڭا باسپانا كىلتىن تابىستاۋدى جوسپارلاپ وتىرمىز», دەدى ش.كەيكين.
جاڭا باسپاناعا يە بولعانداردىڭ اراسىندا كوپبالالى, ەرەكشە بالا تاربيەلەپ وتىرعان وتباسىلار, تولىق ەمەس وتباسىلار, اتا-اناسىنان ايىرىلعاندار بار. ولار «مودەرن» تۇرعىن ءۇي كەشەنىنەن 2, 3 بولمەلى پاتەرگە قونىستانادى. جاڭا قونىسقا كوشىپ, قۋانعانداردىڭ ءبىرى – امىرە جانگەرەەۆ. ءبىرىنشى توپتاعى مۇگەدەك 16 جىلدان بەرى تۇرعىن ءۇي كەزەگىندە تۇر ەكەن.
«وسى كۇندى ۇزاق جىلدار بويى زارىعىپ كۇتتىم. تۇرۋعا جايلى باسپاناڭ بولعانعا نە جەتسىن. قۋانىشىمدا شەك جوق. پاتەردىڭ ءىشى كەڭ, جارىق, ءومىر سۇرۋگە قولايلى ەكەن», دەدى ءا.جانگەرەەۆ.
اتىراۋ وبلىسى