«پەداگوگ-شەبەر» سانات مۇساتاي ەلىمىزدە ناقتى پاندەردى وقىتۋدا كوش باسىندا تۇرعان, جارتى عاسىردان استام تاريحى بار و.جاۋتىكوۆ اتىنداعى رەسپۋبليكالىق فيزيكا-ماتەماتيكا مەكتەبىندە فيزيكا پانىنەن ساباق بەرەدى. فيزيكا بويىنشا وليمپيادالىق رەزەرۆ كومانداسىنىڭ جاتتىقتىرۋشىسى.
سانات ساعات ۇلى ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇلەگى, ق.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىندە فيزيكا ماگيسترى دارەجەسىن العان. «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى», 5-ءشى جانە 6-شى حالىقارالىق ماتەماتيكا, فيزيكا جانە ينفورماتيكا مۇعالىمدەرى كونكۋرسىنىڭ جاتتىقتىرۋشىلار ليگاسىنىڭ التىن مەدال يەگەرى. رفمم وليمپيادالىق رەزەرۆ بويىنشا 2020 جىل ترەنەرى جانە 2023 جىل مۇعالىمى. بىلىكتى ۇستازدىڭ ماراپتتار قورجىنى مۇنىمەن تاۋسىلماق ەمەس. بۇل – ءوز ىسىنە شىنايى بەرىلگەن ناعىز مامان ەڭبەگىنىڭ جەمىسى.
«فيزيكا-ماتەماتيكا مەكتەبىندە وقۋ – وتە ۇلكەن جاۋاپكەرشىلىك. مۇندا وقۋشىلارعا قويىلاتىن تالاپ تا جوعارى. دەگەنمەن وقۋشىلاردىڭ بارلىعى دەرلىك وليمپياداعا قاتىسا بەرمەيدى. ويتكەنى, ءبىرى عىلىمي جوبالارمەن اينالىسسا, ەندى ءبىرى روبوتوتەحنيكاعا, باعدارلامالاۋعا قىزىعادى. سوندىقتان مەكتەپ مۇعالىمدەرى ءار بالانىڭ قابىلەتىنە قاراي باعىت-باعدار بەرىپ وتىرۋعا تىرىسادى, سونىڭ ىشىندە وليمپياداعا قاتىسۋدىڭ ورنى بولەك», دەيدى تاجىريبەلى ۇستاز.
سانات ساعات ۇلى بالا كەزدەن فيزيكاعا قىزىعىپ وسكەنىن ايتادى. ال سالانى تاڭداۋىنا ينجەنەر-ەلەكتريك بولىپ جۇمىس ىستەگەن اكەسى ساعاتتىڭ ىقپالى زور بولدى. ء«بىلىم جانە ەڭبەك», «يۋننىي تەحنيك», «مودەليست كونسترۋكتور», «راديو» جۋرنالدارىن كوپ وقيتىن اكە ءىسىنىڭ بالاعا ۇلگى بولعانى انىق. ويىن بالاسى كوبىنە تابيعاتتى, ونداعى قۇبىلىستاردى تۇسىنۋگە تىرىستى. ال مەكتەپتە, جوعارى وقۋ ورىندارىندا العان ءبىلىمى سانات ساعات ۇلىنىڭ فيزيكا عىلىمىن تەرەڭ تانۋىنا جول اشتى. بىلىكتى ۇستازدارى كورسەتكەن ءبىلىم جولى اداستىرمادى. بۇگىندە ءوزى دە وسى جولدا ءبىلىمدى ۇرپاق تاربيەلەۋ ىسىنە بەلسەنە اتسالىسىپ كەلەدى. «فيزيكا كۇندەلىكتى ومىردە نەمەسە تابيعاتتا كەزدەسەتىن قانداي دا ءبىر ماسەلەنى قوزعايدى دەسەك, ونى تەرەڭىرەك ءارى دۇرىس ءتۇسىنۋ ءۇشىن وقۋشىلارىما تاقىرىپتىق ەسەپتەردى كوبىرەك شىعارتۋعا, تاجىريبەدە كورسەتۋگە تىرىسامىن», دەيدى ول.
سانات ساعات ۇلىنىڭ وقۋشىلارى جىل سايىن فيزيكا پانىنەن رەسپۋبليكالىق, حالىقارالىق وليمپيادالاردىڭ جەڭىمپاز, جۇلدەگەرى اتانىپ ءجۇر. ولاردىڭ قاتارىندا حالىقارالىق فيزيكا وليمپياداسىندا (IPhO) رفمم وقۋشىلارى نۇريسلام تۇرسىنبەك 2013 جىلى كۇمىس مەدال يەلەنسە, كەلەر جىلى التىن مەدال ەنشىلەگەن, ال مارعۇلان نۇرساعاتوۆ 2024 جىلى كۇمىس مەدال يەگەرى اتاندى. بيىل قاڭتار ايىندا وتكەن حالىقارالىق جاۋتىكوۆ وليمپياداسىندا 16 ەلدەن قاتىسقان 670 وقۋشىنىڭ 194-ءى فيزيكا ءپانى بويىنشا سايىسقا تۇسسە, سونىڭ ىشىندە رفمم وقۋشىلارى فيزيكا ءپانى بويىنشا 1 التىن, 1 كۇمىس, 6 قولا مەدالعا يە بولدى. وسى جىلعى رەسپۋبليكالىق وقۋشىلار وليمپياداسىنىڭ اقتىق كەزەڭىنە فيزيكادان 10 وقۋشى جولداما الىپ, ونىڭ بەسەۋى التىن, بىرەۋى كۇمىس, تورتەۋى قولا مەدال جانە بىرەۋى ماقتاۋ قاعازىنا قول جەتكىزدى. رفمم وقۋشىلارى وليمپيادادا ەڭ كوپ مەدال الىپ, مەكتەپ رەسپۋبليكا بويىنشا 1-ورىندى ەنشىلەدى.
سانات ساعات ۇلىنىڭ ايتۋىنشا, وليمپياداعا دايىندالاتىندارعا جوعارعى كۋرس فيزيكاسىن مەڭگەرۋگە تۋرا كەلەدى. «وقۋشىلارىمىز فيزيكامەن بىرگە, جوعارى كۋرس ماتەماتيكاسىنىڭ كەيبىر تاراۋلارىن دا قوسا وقيدى. جوعارى دايىندىقتان وتكەن ولاردىڭ پاندىك ءبىلىمى عىلىمي جوبالارعا قاتىساتىن وقۋشىلارمەن, ءتىپتى ۋنيۆەرسيتەت ستۋدەنتتەرىمەن سالىستىرعاندا الدەقايدا وزىق دەپ ماقتانۋعا بولادى. حالىقارالىق وليمپيادالاردا جوعارى كورسەتكىشكە يە بولىپ جۇرگەن وقۋشىلارىمىز – مەكتەپتىڭ دە, ۇستازداردىڭ دا مارتەبەسى», دەيدى سانات ساعات ۇلى.
ساپالى ءبىلىم بەرۋدە زاماناۋي تەحنيكا مەن تەحنولوگيالاردى قولدانۋ اياسىن كەڭەيتۋ, مۇعالىمدەرگە ءوز ءپانىن وقىتۋدا ەركىندىك, شىعارماشىلىق ادىستەردى قولدانۋعا مۇمكىندىك بەرۋ دە ۋاقىت تالابىنان تۋىنداپ وتىر. ۇستازداردىڭ ايلىق مولشەرىن كوبەيتۋ – دارىندى, ءبىلىمدى جاستاردىڭ مۇعالىم ماماندىعىن تاڭداۋىنا جانە ويى وزىق, زاماناۋي تەحنولوگيالاردى مەڭگەرگەن جاس ۇستازداردىڭ كوبەيۋىنە ىقپال ەتەرى انىق.
الماتى