ماڭعىستاۋ وڭىرىندە اسكەريلەر ءداستۇرلى وقۋ-جاتتىعۋىن وتكىزدى. اسكەري-تەڭىز كۇشتەرىنىڭ جيىن-جورىعىندا تەڭىز جاياۋ اسكەرلەرى دەسانتتىق-شابۋىلداۋ باتالونىنىڭ جەكە قۇرامى كاسپي تەڭىزىنىڭ جابدىقتالماعان جاعالاۋىنا دەسانت ءتۇسىرۋ مەن پلاتسدارمدى باسىپ الۋ وپەراتسيالارىن ءساتتى ورىندادى.
وقۋ-جاتتىعۋ شارتتى قارسىلاستىڭ دەسانتقا قارسى قورعانىسىن بۇزىپ وتۋدەن باستالدى. اتىستى قولداۋ كەمەلەرىنىڭ تىكەلەي ارتيللەريالىق سوققىلارى تاپسىرمانى ورىنداۋدى ەداۋىر جەڭىلدەتتى. «قايسار» قايىعىمەن جەتكەن دەسانتشىلار بىردەن جاعالاۋدى باسىپ الۋعا كىرىستى.
ۇرىس بارىسىندا شابۋىلداۋ توپتارى قارسىلاستىڭ اتىس نۇكتەلەرىن جويىپ, العى شەپكە ورنىعىپ الدى. بۇل تاكتيكالىق تەڭىز دەسانتىنىڭ نەگىزگى كۇشتەرىن ءتۇسىرۋدى قامتاماسىز ەتۋگە مۇمكىندىك بەردى. جاتتىعۋ بارىسىندا اسكەري قىزمەتشىلەر ۇيلەسىمدى ارەكەت ەتتى. جوعارى ۇيىمشىلدىق جۇكتەلگەن تاپسىرمالاردى ءمىنسىز ورىنداۋعا سەپ بولدى.
Mي-8 كولىكتىك-شابۋىلداۋ تىكۇشاقتارى دەسانتتىق توپتاردى شارتتى قارسىلاستىڭ تىلىنا جەتكىزۋ ارقىلى اۋەدەن قولداۋ كورسەتتى. جاۋىنگەرلىك تىكۇشاقتار جۇبى قونۋدى قامتاماسىز ەتۋ مەن جەردەگى نىسانداردى جويۋدا ماڭىزدى ءرول اتقاردى.
– جازعى كەزەڭدەگى جوسپارلانعان ءىس-شارالار تولىعىمەن اياقتالدى. ەندى جەكە قۇرام باتالوندىق-تاكتيكالىق وقۋ-جاتتىعۋلارعا جانە قارۋلى كۇشتەر باس شتابى كوميسسياسىنىڭ قورىتىندى تەكسەرۋىنە دايىندالىپ جاتىر, – دەدى اسكەري-تەڭىز بازاسىنىڭ كومانديرى 2-دارەجەلى كاپيتان باۋىرجان مۇرات ۇلى.
جۇزدەن اسا اسكەري قىزمەتشى قاتىسقان مانەۆرلەرگە زىمىران-ارتيللەريالىق كەمەلەر مەن قايىقتاردى, سونداي-اق كولىكتىك جانە جاۋىنگەرلىك تىكۇشاقتاردى قوسا العاندا, وننان اسا اسكەري جانە ارنايى تەحنيكا جۇمىلدىرىلدى. اسكەري قىزمەتشىلەردىڭ جاۋىنگەرلىك دايىندىعىنىڭ ماڭىزدى بولىگىنە اينالعان وقۋ-جاتتىعۋ تەڭىز جاياۋ اسكەرلەرىنىڭ ناقتى ۇرىس جاعدايىنداعى تاپسىرمالاردى ورىنداۋعا دايىندىعىن دالەلدەدى.