ورتالىق مەملەكەتتىك مۋزەيدە ر.سۇلەيمەنوۆ اتىنداعى شىعىستانۋ ينستيتۋتىمەن بىرلەسكەن «شەتەلدىڭ ارحيۆ قورلارىنداعى ەۋرازيا تاريحى» اتتى كورمە اشىلدى, دەپ جازادى Egemen.kz.
«قازاقستان جانە ورتالىق ازيانىڭ تاريحي-مادەني مۇراسى شەتەلدىڭ ارحيۆتىك قورلارى جيناقتارىندا» عىلىمي جوباسىنا وراي وتكەن كورمەدە شەتەلدىڭ ارحيۆتەرى مەن قورلارىنان الىنعان قازاق تاريحىنا قاتىستى تاريحي جادىگەرلەردىڭ كوشىرمەلەرى قويىلدى.
كورمەنىڭ اشىلۋىندا ورتالىق مەملەكەتتىك مۋزەي ديرەكتورىنىڭ عىلىمي جۇمىستار جونىندەگى ورىنباسارى عاليا تەمىرتون ينستيتۋت عالىمدارمەن بىرلەسكەن جۇمىستىڭ ماڭىزىنا توقتالىپ, مۋزەي ماماندارىنىڭ عىلىمي قاۋىمداستىقپەن, شەتەلدەردەن كەلگەن عالىمدارمەن تىعىز بايلانىس ورناتۋى تىڭ تاقىرىپتاردىڭ اشىلۋىنا, ونىڭ جۇرتشىلىققا كەڭىنەن تانىستىرىلۋىنا ىقپال ەتەتىنىن اتاپ ءوتتى. ونىڭ ايتۋىنشا, قازاق تاريحىنا قاتىستى عىلىمي دەرەكتەر ارنايى باسىلىمداردا عانا ەمەس, زاماناۋي كورمەلەردە كورىنىس تاۋىپ, وسكەلەڭ ۇرپاقتىڭ جادىندا جاڭعىرىپ وتىرۋى ءتيىس.
ر. سۇلەيمەنوۆ اتىنداعى شىعىستانۋ ينستيتۋتى جانىنداعى تاريحي ماتەريالداردى زەرتتەۋ بويىنشا رەسپۋبليكالىق اقپاراتتىق ورتالىقتىڭ ديرەكتورى, تاريح عىلىمدارىنىڭ دوكتورى, پروفەسسور, ۇعا كوررەسپوندەنت-مۇشەسى مەرۋەرت ابۋسەيىتوۆا بۇل زەرتتەۋلەردىڭ ينستيتۋت عالىمدارىنىڭ ۇزاق جىلعى جۇمىسىنىڭ نەگىزى ەكەنىن اتاپ ءوتتى. بۇگىندە رەسەي, قىتاي, ەۋروپا ەلدەرى مۋزەيلەرى مەن ارحيۆتەرىن زەرتتەگەن عالىمدار قازاق تاريحىنىڭ ءتۇرلى كەزەڭدەرىنە قاتىستى قۇندى دەرەكتەردىڭ كوشىرمەسىن ەلگە اكەلدى. ونداعى ماقسات كونە جانە ورتاعاسىرلىق دەرەككوزدەرگە سۇيەنە وتىرىپ, قازاق مەملەكەتتىلىگى تاريحىنىڭ شىنايى دەرەكتەرىنە كوز جەتكىزۋ.
كورمە اياسىندا « ۇلى دالا تاريحى مەن مادەنيەتى بويىنشا كارتالار (ەرتە زامان, ورتا عاسىرلار, جاڭا زامان) كاتالوگىنىڭ» تۇساۋكەسەرى ءوتتى. كاتالوگقا ەۋرازياداعى گەوساياسات, مادەني ترانسفورماتسيالار جانە حالىقتار بايلانىسىنداعى وزگەرىستەردى كورسەتەتىن كارتالار ەنگەن. كاتالوگ ۇلى دالا تاريحى جانە مادەنيەتىمەن اينالىساتىن عالىمدار, تاريحشىلار جانە جالپى جۇرتشىلىق ءۇشىن قۇندى دەرەككوز بولاتىنى انىق.
كورمەدە بەرن مۋزەيىندە ساقتالىپ كەلگەن 1868-1889 جىلدارى قازاقستان مەن ورتالىق ازيا ەلدەرىنە ءتورت مارتە ساياحاتتاعان ديپلومات ءارى ساياحاتشى انري موزەردىڭ قورىنان الىنعان ءحىح عاسىرعا تيەسىلى كومكەرمەلى تۇسكىلەم, جۇزىكتەر, ايبالتا, تاعى دا باسقا كوپتەگەن جادىگەرلەر ەرەكشە نازار اۋدارتادى. مۇنىمەن قوسا قىتاي, فرانتسيا, ۇلىبريتانيا, شۆەيتساريا, يتاليا, دانيا, شۆەتسيا جانە ۆەنگرياداعى قورلاردان الىنعان ارحيۆتىك قۇجاتتار جانە مينياتيۋرالار, كارتينالار, فوتوسۋرەتتەر مەن بۇيىمداردان تۇراتىن ۆيزۋالدى ارتەفاكتىلەرمەن تانىسۋعا بولادى. ەكسپوناتتار قازاقتاردىڭ ەۋرازيانىڭ باسقا دا حالىقتارىمەن تاريحي ديپلوماتيالىق بايلانىستارىن ايعاقتايدى.
كورمە 16 قازانعا دەيىن جالعاسادى.