توتەنشە جاعدايلار مينيسترلىگى 6 قازاندا قاراعاندى وبلىسىندا قارقارالى اۋدانىنداعى دالا ءورتىن ءسوندىرۋ بارىسىندا قىزمەتتىك مىندەتىن اتقارۋ كەزىندە №24 ءورت ءسوندىرۋ ءبولىمىنىڭ اعا ءورت ءسوندىرۋشى-قۇتقارۋشىسى قازا تاپقانىن حابارلادى, دەپ جازادى Egemen.kz.
1991 جىلى تۋعان سەرجانت حالي حايرات ازاماتتىق قورعاۋ ورگاندارىندا 2014 جىلدان باستاپ جۇمىس ىستەگەن.
مينيسترلىك وقيعانىڭ ءمان-جايىن انىقتاۋ ءىسى مەن سوتقا دەيىنگى تەرگەۋ باستالعانىن ءمالىم ەتتى. ۆەدومستۆونىڭ اپاتتار مەديتسيناسى ورتالىعىنىڭ پسيحولوگتارى قايتىس بولعان قىزمەتكەردىڭ تۋىستارىنا قاجەتتى پسيحولوگيالىق كومەك كورسەتىپ جاتىر.
«قازاقستان رەسپۋبليكاسى توتەنشە جاعدايلار مينيسترلىگى ءورت ءسوندىرۋشىنىڭ تۋىستارى مەن جاقىندارىنا كوڭىل ايتادى. تجم قازا تاپقان ءورت ءسوندىرۋشىنىڭ وتباسىنا جان-جاقتى كومەك پەن قولداۋ كورسەتەدى», دەلىنگەن تجم حابارلاماسىندا.