ىنتىماعى مەن ىرىسى جاراسقان تەكەلى قالاسىندا تۇراتىن سان الۋان ۇلت وكىلدەرى رەسپۋبليكالىق رەفەرەندۋمعا بەلسەندى قاتىسىپ, «بولاشاق ءۇشىن داۋىس بەرەمىز!» دەپ ۇران تاستادى, دەپ حابارلايدى Egemen.kz.
قازاق, ورىس, نەمىس, تاتار, وزبەك, كارىس ۇلتىنىڭ وكىلدەرى №452 داۋىس بەرۋ ۋچاسكەسىنە ۇلتتىق كيىمدەرىمەن كەلىپ, تاتۋلىق پەن بىرلىكتىڭ, وتانشىلدىقتىڭ ونەگەلى ۇلگىسىن كورسەتتى.
«قازاقستان – ءبىزدىڭ وتانىمىز! ەلىمىزدەگى جەتىستىكتەرگە, جاڭا باستامالارعا ىلعي قۋانىپ, بارىنشا قولداپ وتىرامىز. دوستىق, بىرلىك, تاتۋلىق – باعا جەتپەس بايلىعىمىز. سوندىقتان دا بۇگىنگىدەي اسا ماڭىزدى تاڭداۋ كەزىندە رەفەرەندۋمعا ءارتۇرلى ۇلت وكىلدەرى ءبىر كىسىدەي قاتىسىپ, ىنتىماعىمىزدى پاش ەتسەك, كەيىنگى بۋىنعا ۇلگى كورسەتسەك دەپ كەلدىك», دەدى كارىس ەتنومادەني ورتالىعىنىڭ مۇشەسى تاتيانا كيم.