ءبىلىم جولى – ىزدەنگەنگە ۇزاق جول. كەزىندە تاريحىمىزداعى تالاي تۇلعا, عۇلامالار ءىلىم ىزدەپ ءارىسى امەريكا, بەرىسى باعدات اسقان. قازىر دە سول ءۇردىس ۇزىلمەگەن سياقتى, ويتكەنى «شەتەلدەردە وقىپ ءجۇر تالاي قازاق بالاسى».
ءبىلىم قۋعان سونداي كوپتىڭ ءبىرىن تۇركيادان تاپتىق. نۇريلا شوتباي – تۇركيانىڭ دەنيزلى قالاسىنداعى پامۋككالە ۋنيۆەرسيتەتى «اعىلشىن فيلولوگياسى» ماماندىعىنىڭ 3-كۋرس ستۋدەنتى. شەتەلدىك جوعارى وقۋ ورنىنا مەملەكەتتىك باعدارلاماسىز, ءوز كۇشىمەن تولىق گرانتقا تۇسكەنىنە ەلدەگى العان ءبىلىمىنىڭ, ساناسىنا ساۋلە قۇيىپ, ءىلىم ءنارىن سىڭىرگەن ۇستازدارىنىڭ ەڭبەگى ۇشان-تەڭىز ەكەنىن ايتادى.
«جامبىل وبلىسى قورداي اۋلىنىڭ №1 دىنمۇحاممەد قوناەۆ اتىنداعى مەكتەپ-گيمنازياسىندا ءارىپ تانىدىم. العاشقى ۇستازىم – اينۇر قالىقوۆا. اۋەلدە گيمنازيانىڭ قاراپايىم سىنىبىندا وقىدىم. ەكى سىنىپتى قاتارىنان ۇزدىك بىتىرگەن سوڭ, گيمنازيا سىنىبىنا اۋىستىردى. گيمنازيا سىنىبىندا وقىتقان اقنۇر مايشىبەكوۆا دا, قولىما ءبىرىنشى بولىپ قالام ۇستاتقان اينۇر مۇعالىم دە كاسىبي, مىقتى ماماندار. نەگىزى بىلىمدەگى ىرگەتاس سانالاتىن باستاۋىش سىنىپتا جاقسى وقىساڭ, كەيىنگى ءبىلىم الۋعا وڭ اسەرىن تيگىزەتىنىن كوبى ايتىپ جاتادى عوي. 5-سىنىپتاعى جەتەكشىم ءامينا ابدۋاليقىزى ءارى قاراي جەتىلۋىمە جاعداي جاسادى. سول كىسى بۇلاقتىڭ كوزىن اشقانداي, باعىتىمدى ايقىنداپ بەردى. ەرىنبەي-جالىقپاي قازاق تىلىنەن تالداۋ جاساتىپ, شىعارما, ەسسە جازۋدىڭ قىر-سىرىن ساباقتا عانا ەمەس, 45 مينۋتتان بولەك ۋاقىتتا دا ۇيرەتكەنى جادىمدا جاڭعىرادى», دەيدى نۇريلا كەيىپكەرىمىز.
ادەتتە, مەكتەپتەگى قاي مۇعالىم قاتال ءارى تالاپشىل بولسا, وقۋشىلاردىڭ باسىم بولىگى سول پەداگوگتىڭ ءپانىن بار زەيىنىن سالىپ وقيدى عوي ءارى بولاشاعى دا سول نازارى اۋعان ساباققا بايلانىستى بولاتىنداي. قازىر تۇركيادا اعىلشىن ءتىلى مەن ادەبيەتى ماماندىعىندا وقىپ جۇرگەن نۇريلانىڭ دا مەكتەپتەگى اعىلشىن ءتىلى مۇعالىمى ەڭ قاتال ءارى ەڭ تالاپ قويعىش ۇستازداردىڭ ءبىرى بولعان ەكەن. ونىڭ كوڭىلىنەن شىعامىن دەپ ۇزدىك وقۋ, ىزدەنىپ وقۋ اقىر سوڭىندا ەشكىمگە سالماق سالماي شەتەلدىك ۋنيۆەرسيتەتتىڭ گرانتىن يەلەنۋگە يتەرمەلەدى.
«مەكتەپتە اعىلشىننان بەرگەن زاۋرەش توعايقىزى ءار ساباعىندا كىتاپتىڭ بۇكىل تاقىرىبىن ءوتىپ, جاتتىعۋلارىن جاساتاتىن. توقساندىق باقىلاۋدا اڭگىمەلەسۋدەن (speaking) كوپ تاپسىرما بەرەتىن. سول كەزدە تىم كوپ بەرەتىنى ۇنامايتىن, بالالىق قوي, بىراق سونىڭ ناتيجەسىندە سويلەپ ۇيرەندىك. سلايدتاردى پلاكاتقا سىزىپ, كادىمگىدەي جوبا قورعاتاتىن. اعىلشىن تىلىنەن بۇكىل ءبىلىم بايقاۋلارىنا قاتىستىراتىن, وقۋشىلاردى قىزىقتىراتىن. ءبىر كەز ەلىمىزدىڭ بارلىق قالاسىنان وقۋشىلار باق سىناعان وليمپياداعا اۋلىمىزدان ءبىزدىڭ مەكتەپتىڭ وقۋشىلارىن عانا قاتىستىردى. بايقاۋعا شەتەلدىكتەر ادىلقازى بولدى, قاتەلەسپەسەم, جارتىلاي فينالعا دەيىن جەتتىك. باستىسى, بىزدە سەنىم پايدا بولدى. قازىر اقپارات اشىق قوي, سوڭعى سىنىپتا سەنىممەن شەتەلدىك جوعارى وقۋ ورىندارىنا تۇسۋگە تالاپ ەتەتىن IELTS تەسىن تاپسىردىم. سودان العان حالىقارالىق سەرتيفيكاتىمدى اتتەستاتىممەن قوسا تاپسىرىپ, گرانتقا ءتۇستىم. ۋنيۆەرسيتەتتە تالاپ كۇشتى. ساباقتان قالساڭ, ەمتيحانعا كىرە الماي قالاسىڭ. ءبىر ءپاننىڭ ەمتيحانىنان وتە الماساڭ, قايتا تاپسىرا سالمايسىڭ, كەلەسى كۋرستا سول ءپاندى قايتا وقيسىڭ. ابىرويمەن وقۋىما ەلىمىزدە العان ءبىلىمىمنىڭ, مەكتەپتەگى مۇعالىمدەرىمنىڭ ۇلەسى وتە زور. مەرەكە قارساڭىندا ماعان ساباق بەرگەن بارلىق ۇستازىما شەكسىز العىسىمدى بىلدىرەمىن», دەيدى نۇريلا.