كەشە ورتالىق رەفەرەندۋم كوميسسياسىندا ورك توراعاسى نۇرلان ءابدىروۆ تمد بايقاۋشىلار ميسسياسىنىڭ باسشىسى, تاۋەلسىز مەملەكەتتەر دوستاستىعى باس حاتشىسىنىڭ ءبىرىنشى ورىنباسارى لەونيد انفيموۆپەن كەزدەستى.
كەزدەسۋگە ورتالىق رەفەرەندۋم كوميسسياسىنىڭ حاتشىسى مۇحتار ەرمان مەن تمد بايقاۋشىلار ميسسياسى شتابىنىڭ باسشىسى ولەگ كۋلەبا قاتىستى.
ن.ءابدىروۆ ميسسيانىڭ باسشىلىعىنا 6 قازانعا بەلگىلەنگەن رەسپۋبليكالىق رەفەرەندۋمدى ازىرلەۋ مەن وتكىزۋ بارىسىن تانىستىرىپ, ناۋقاننىڭ نەگىزگى كەزەڭدەرى, سونداي-اق حالىقارالىق بايقاۋشىلاردى اككرەديتتەۋ قورىتىندىلارى تۋرالى حاباردار ەتتى.
ورك توراعاسى تمد اتقارۋشى كوميتەتىنە ەلىمىزدەگى ەلەكتورالدى ناۋقانداردى بايقاۋعا تۇراقتى تۇردە قاتىسىپ كەلگەنى ءۇشىن العىس ءبىلدىرىپ, حالىقارالىق بايقاۋشىلاردىڭ قاتىسۋى جۇرتشىلىقتىڭ الداعى پلەبيستسيتكە دەگەن سەنىمىن ارتتىراتىنىن اتاپ ءوتتى. وسى ورايدا الداعى رەفەرەندۋمعا تمد ميسسياسىنان 74 بايقاۋشى قاتىساتىنىن ايتا كەتەيىك.
ورتالىق رەفەرەندۋم كوميسسياسى داۋىس بەرۋگە دايىندىق پەن ونى وتكىزۋ جونىندە قورىتىندى ءىس-شارالار وتكىزدى. اۋماقتىق كوميسسيالار ەلەكتورالدى راسىمدەرىنىڭ اشىقتىعى مەن رەفەرەندۋم زاڭناماسىنىڭ ساقتالۋىن قامتاماسىز ەتۋگە دايىن.
ءوز كەزەگىندە لەونيد انفيموۆ رەفەرەندۋمداعى تمد-دان بايقاۋشىلار ميسسياسىنىڭ قىزمەتى تۋرالى ايتىپ, ولاردىڭ ءتيىمدى قىزمەتىنە جاسالعان جاعدايلار ءۇشىن العىسىن ايتتى. ول ميسسيا رەفەرەندۋم وتكىزىلۋىن جالپىعا بىردەي تانىلعان دەموكراتيالىق قاعيداتتار مەن ۇلتتىق زاڭناماعا سايكەستىگىن باعالايتىنىن اتادى. ميسسيا داۋىس بەرۋ كۇنىنەن كەيىنگى كۇنى تمد ەلدەرىنىڭ بارلىق ۇيلەستىرۋشىسىمەن كەلىسىلگەن مالىمدەمەسىندە باعاسىن جاريالايدى.
كەزدەسۋدەن كەيىن ميسسيا باسشىسى بريفينگ وتكىزدى.