«سامۇرىق-قازىنا» بيزنەس وكىلدەرىن سەرىكتەستىككە شاقىرادى

«سامۇرىق-قازىنا» اق مەن «قازاقستان حالقىنا» قق بىرلەسە ۇيىمداستىرعان القالى جيىن ماقساتى – مەملەكەت پەن بيزنەس جانە ۇكىمەتتىك ەمەس ۇيىمدار اراسىندا ۇلتتىق قايىرىمدىلىق ۇلگىسىن وركەندەتۋ, تاجىريبە مەن اقپارات الماسۋ. بۇل رەتتە پانەلدىك سەسسيانىڭ ءبىرى الەۋمەتتىك جوبالاردى جۇزەگە اسىرۋداعى كورپوراتيۆتىك سەرىكتەستىك كەلەشەگىنە ارنالدى.

ماسەلەن, قوردىڭ بىرىڭعاي قايىرىم­دى­لىق وپەراتورى «Samruk Kazyna Trust» كق ەلىمىزدە جۇمىس ىستەيتىن شەتەلدىك الپاۋىت كومپانيامەن ىنتىماقتاستىعى اياسىندا 180 ەرەكشە جان AI-مامان, No Code ازىرلەۋشى, UI/UX + Web-شەبەر سىندى ءۇش باعىت بويىنشا وقىپ جاتىر. جوبا بارىسىندا كاسىبي, الەۋمەتتىك داعدىلاردى دامىتۋ ارقىلى مۇگەدەكتىگى بار ادامداردى جۇمىسقا ورنالاستىرۋعا جاردەمدەسۋ ماقسات ەتىلگەن.

ۇكىمەتتىك ەمەس ۇيىمدارمەن تىعىز بايلانىس ورناتقان قايىرىمدىلىق وپەراتورىنىڭ قىزمەتى اشىق ءارى قولجەتىمدى, سەنىمدى بولۋىنا كۇش سالىنىپ كەلەدى.

«كورپوراتيۆتىك الەۋمەتتىك جاۋاپكەر­شىلىك قور جۇمىسىنىڭ ماڭىزدى بولىگى بولىپ سانالادى. ءبىز كورپوراتيۆتىك قايىرىم­دى­لىققا كاسىبي باسقارۋدى قاجەت ەتەتىن جەكە باعىت رەتىندە قارايمىز. سوندىقتان, وزدەرىڭىز بىلەتىندەي, «Samruk Kazyna Trust» قورى قۇرىلدى. 2024 جىلى قايىرىمدىلىق جانە الەۋمەتتىك جوبالارعا 35,6 ملرد تەڭگە باعىتتالدى. ناتيجەسىندە, جارتى ميلليوننان استام ادام كومەك السا, ولاردىڭ 30 مىڭى – بالا», دەپ اتاپ ءوتتى «سامۇرىق-قازىنا» اق باسقارما توراعاسى نۇرلان جاقىپوۆ.

«سامۇرىق-قازىنا» ۇلتتىق ءال-اۋقات قورى 81 ميلليارد دوللاردان استام اكتيۆ­تەر­دى باسقارادى, الەمدەگى توپ 30 ەگەمەن قوردىڭ قاتارىنا كىرەدى. قور توبىنداعى كومپانيالار ەكونوميكانىڭ سان سالاسىندا ۇسىنىلعان. قوردىڭ باستى ماقساتى – قارا­ماعىنداعى اكتيۆتەردىڭ قۇنىن ارتتىرۋ. تۇتاستاي العاندا, قور ءوز قىزمەتىندە ۇكىمەتكە 2,9 تريلليون تەڭگەگە جۋىق ديۆيدەند پەن باسقا دا تولەمدەردى تولەپ, قايىرىمدىلىق ماقساتتارعا قارجى ءبولىپ, رەسپۋبليكالىق بيۋدجەتتى قولداۋعا, الەۋمەتتىك ينفراقۇرىلىمدى دامىتۋعا ەلەۋلى ۇلەس قوسىپ وتىر.

«Samruk-Kazyna Trust» قورىنىڭ قايىرىمدىلىق قىزمەتىنە سەنىم جوعارى

بيىل كوكتەمدە ورىن العان تاسقىن سالدارىمەن كۇرەسكە «سامۇرىق-قازىنا» قورىنىڭ ەنشىلەس كاسىپورىندارىنىڭ شەتەلدىك سەرىكتەستەرى بىرىڭعاي قايىرىمدىلىق وپەراتورى «Samruk-Kazyna Trust» قورىنا 2 ملرد تەڭگەدەن استام قاراجات اۋداردى.

«بۇل – قور قىزمەتىنىڭ اشىقتىعى مەن بيزنەس تاراپىنان جوعارى سەنىم بەلگىسى. سەنىمدى سەرىكتەستىك پەن يگى ىستەرگە اتسالىسۋعا بەرىلگەن مۇمكىندىك ءۇشىن العىسىمدى بىلدىرەمىن», دەدى قايىرىمدىلىققا قاراجات اۋدارعان «ازيا گاز قۇبىرى» جشس باس ديرەكتورىنىڭ بيزنەستى قولداۋ جونىندەگى ورىنباسارى لي سيانتسزيۋي. كاسىپورىن بيىل ماۋسىم ايىندا قور ارقىلى سۋ تاس­قىنىمەن كۇرەسكە 1 ملرد تەڭگە ءبولدى. سونى­مەن بىرگە قوردىڭ قايىرىمدىلىق وپەراتورىنا قاراجات جىبەرگەن ORANO كور­پوراتسياسىنىڭ ەنشىلەس كاسىپورنى «كاتكو» بك» جشس باس ديرەكتورى پاسكال باستيەن دە الداعى ۋاقىتتاعى سەرىكتەستىككە اتسالىسۋعا مۇددەلى ەكەندەرىن جەتكىزدى.

جينالعان قاراجاتقا تاسقىننان زارداپ شەككەن اتىراۋ جانە باتىس قازاق­ستان وب­لىستارىندا زاماناۋي دەنەشى­نىقتىرۋ-ساۋىقتىرۋ كەشەندەرى سالىنادى. بۇل كەشەندەر بۇقارالىق سپورت قولجەتىمدىلىگىن قامتا­ماسىز ەتىپ قانا قويماي, الەۋمەتتىك ينفرا­قۇ­رىلىمدى قالپىنا كەلتىرۋگە ىقپال ەتەتىن قوعامدىق ءومىر ورتالىعىنا اينالادى.

«قازاقستان حالقىنا» قوعامدىق قورىنا جىل سايىن قوردىڭ تازا تابىسىنىڭ كەمىندە 7%-ى اۋدارىلىپ وتىر. 2023 جىلدىڭ قورى­تىن­­دىسىندا بۇل سوما 67 ملرد تەڭگەنى قۇرا­دى.

قوردىڭ الەۋمەتتىك ساياساتىنىڭ باستى ماقساتى – ينكليۋزيا, ياعني تەڭ قوعامدى دامىتۋ, مەديتسينا مەن ءبىلىم, اۋىلدىق جەرلەردى دامىتۋ سىندى باعىتتاردىڭ باسىن قوساتىن كەشەندى كوزقاراستى ۇستانۋ. وسى ورايدا مۇگەدەكتىگى بار ادامدار مەن حالىقتىڭ الەۋمەتتىك وسال توپتارىن قولداۋداعى ىلكىمدى قادامداردىڭ كەيبىرىنە توقتالساق, سوڭعى ءۇش جىلدا 42 وڭالتۋ ورتالىعى ىسكە قوسىلىپ, جىل سايىن 20 مىڭنان استام بالاعا كومەك بەرىلەدى. ءتيىستى ورتالىقتاردى ءارى قاراي دا قولدانىسقا بەرۋ وڭىرلەردەگى وڭالتۋ قىزمەتىن ودان ءارى قولجەتىمدى ەتە تۇسپەك.

ەرەكشە بالالاردى وڭالتۋ مەن ءبىلىم الۋىنا جاعداي جاساۋدان بولەك, ولاردى بەيىمدەلگەن سپورت تۇرلەرىنە باۋلۋ ماسەلەسى قولعا الىنعان. قازىرگى تاڭدا 23 قالا مەن ەلدى مەكەندە ءتۇرلى سپورت تۇرلەرى بويىنشا 1 100 ەرەكشە بالاعا ارنالعان 89 سەكتسيا تەگىن جۇمىس ىستەپ تۇر. قاتىسۋشىلاردىڭ بىر­قاتارى رەسپۋبليكالىق قانا ەمەس, حالىق­­ارالىق سايىستاردىڭ جۇلدەگەرى اتاندى.

جىل سايىن قور قولداۋىمەن «سالاماتتى قازاقستان» پويىزى اياسىندا شالعاي­­­دا­عى اۋىل­­­داردا 100 مىڭ ادامعا تەگىن مەدي­تسي­نالىق-قۇقىقتىق كومەك كورسەتىلەدى. بۇدان بولەك, الماتىداعى ۇلتتىق پەديات­ريا ورتالىعى قان تازالايتىن زاماناۋي مەدي­تسينالىق قۇرالمەن جابدىقتالعان. اۋىلدىق اۋرۋحا­نا­لارعا 23 جەدەل جاردەم كولىگى تابىستالعان. تاياۋدا ۇلتتىق تراۆماتولوگيا جانە ورتوپەديا عىلىمي ورتالىعىنا زاماناۋي يننو­ۆاتسيالىق جابدىقتار بەرىلدى. اۋىر سىرقات­قا شالدىققان 1 319 بالانى شەتەلدە ەمدەتۋگە مۇم­كىندىك جاسالدى.

بۇقارالىق سپورت ينفراقۇرىلىمىن دامىتۋ ماقساتىندا قور دەمەۋشىلىگىمەن, قىزىلوردا وبلىسىندا سىرداريانىڭ سول جاعالاۋىندا ۇستەل تەننيسى ورتالىعى سالىندى. شىعىس قازاقستان وبلىسىنداعى قاتونقاراعاي, زايسان اۋداندارىندا تۇساۋى كەسىلگەن سپورت الاڭدارى «سامۇرىق-قازىنا» قورىنىڭ قولداۋىمەن سوڭعى ءۇش جىلدا ەلىمىز بويىنشا بوي كوتەرگەن ءتيىستى نىسانداردىڭ سانى 30-عا جۋىقتادى. قور بۇقارالىق سپورتتى دامىتۋ, بالالارعا سپورت ينفراقۇرىلىمىن قولجەتىمدى ەتۋ باعىتىندا سپورت الاڭدارىنان بولەك, ەل كولەمىندە 10 دەنەشىنىقتىرۋ-ساۋىقتىرۋ كەشەنى مەن كوپفۋنكتسيونالدى سپورت كەشەنىن ىسكە قوستى.

قور قولداۋىمەن بيىل التىنشى مارتە جولعا شىققان «تۋعان ەلگە ساياحات» جازعى بالالار پويىزىندا سۋ تاسقىنىنان زارداپ شەككەن وڭىرلەردەن قاتىسقان 200 بالانى قوسقاندا, بارلىعى 400 جەتكىنشەك 2 كەزەڭدە ەل ايماقتارىنداعى تانىمال مادەني-تاريحي ورىندارىن ارالادى. سونى­مەن بىرگە ساياحاتقا قاتىسۋشىلار «تازا قازاق­ستان» جالپىۇلتتىق اكتسياسىنا ءۇن قوسىپ, ساپار بويى ەكولوگيالىق ءومىر سالتىن قالىپ­تاس­تىردى.

وڭىرلەردەگى جاستار ومىرىنە تىڭ سەرپىن, جاڭاشا لەپ بەرۋ ماقساتىندا قور وتكەن جىلى اقتوبەدەگى كىتاپحانانى ادام تانىماستاي ەتىپ وزگەرتكەن بولسا, بۇگىندە ەلىمىزدىڭ باتىسى مەن تەرىسكەيىندە ەكى بىردەي شىعارماشىلىق كەڭىستىكتى قولداۋدى ءجون دەپ تاپتى. سونىمەن قاتار قور مۇنى­مەن شەكتەلمەي, سەمەيدە تۇڭعىش رەت كوزى ناشار كورەتىن جانە زاعيپ ازاماتتارعا ارناپ كىتاپحانا قۇرىلىسىنا كومەك جاساپ جاتىر. ەكى قاباتتى, 805 شارشى مەتردەن تۇراتىن قازىرگى زامانعى ەڭسەلى عيماراتتا ارنايى باعدارلامالار ورناتىلىپ, ەرەكشە جاندار برايل قارپىندە جازۋ مەن وقۋدى مەڭگەرمەك.

تاعى ءبىر ءتاسىل – كراۋدفاندينگ

ءىرى كومپانيالار قوعامداعى كراۋدفاندينگ باستامالارىنا قوسىلىپ, جارنا جاساۋ ارقىلى قوعام مەن بيزنەس ۇندەستىگىنە قادام جاساي الادى. تابىستى ىنتىماقتاستىقتىڭ جارقىن مىسالدارىنىڭ ءبىرى – 1 ماۋسىمدا قوردىڭ ۇيىمداستىرۋمەن وتكەن «Samruk Charity Marathon» قايىرىمدىلىق مارافونى.

مارافون بارىسىندا قوردىڭ بىرىڭعاي قايىرىمدىلىق وپەراتورى «Samruk-Kazyna Trust» قورىنا 1 000-عا تارتا ازامات پەن 30-دان استام كومپانيادان 126,7 ملن تەڭگە ءتۇستى. بۇل قاراجاتقا استانانىڭ 5 مەكتەبىندە ينكليۋ­زيانى قولداۋ كابينەتتەرى اشىلدى. ناتيجەسىندە, 150-دەن استام ەرەكشە بالانىڭ قاتارلاستارىمەن بىرگە مەكتەپتە ءبىلىم الۋى­نا مۇمكىندىك قامتاماسىز ەتىلدى.

وسىلايشا, بيزنەس وكىلدەرى شاعىن قارا­جاتپەن-اق قايىرىمدىلىق باستامالاردى قولداي الادى. كاسىپكەرلەر قوعاممەن باي­لا­نىسىن جاقسارتىپ, الەۋمەتتىك جاۋاپ­كەر­شىلىگىن نىعايتا تۇسەدى. ءارى بۇل قادام قوعام­دا قايى­رىمدىلىق مادەنيەتىن دامىتۋ­عا ىق­پال ەتەدى.

جاقسىلىققا جانى قۇشتار بالا ماراپاتتالدى

ۇلتتىق قايىرىمدىلىق كونفەرەنتسياسىندا قور ءالنازار ادىسبەك ەسىمدى بالانى ماراپاتتادى. ول قايىرىمدىلىق مارافونىنا بەلسەنە قاتىسىپ, الەۋمەتتىك جوبالاردى ىسكە اسىرۋعا ءوز ۇلەسىن قوسقان بۇگىنگىنىڭ باتىرى.

«Samruk Charity Marathon» شاراسىندا ايرىقشا قايسارلىقپەن جۇگىرىپ وتكەن ءالنازار بۇگىندە ەلورداداعى №97 مەكتەپتەگى ينكليۋزيانى قولداۋ كابينەتىندە ءبىلىم الىپ جاتىر.

سونىمەن قاتار سۋ تاسقىنى سالدارى­مەن كۇرەسكە اتسالىسىپ, قور ارقىلى قارجى بولگەن «ازيا گاز قۇبىرى» جشس, ORANO («كاتكو» بك), CGN كومپانيالارى مارا­­پات­قا يە بولدى.

الدابەرگەن كەمپىرباي