دانالىقتى ءبىر اياعا سىيعىزۋ بەكەر. ول ءار بەتتە, ءار قۇبىلىستا, ءار زاماندا وزىنشە قىلاڭ بەرەدى. ساعديدىڭ تىلىمەن ايتساق, «اقىلدى ادامعا جاپىراق تا ۇستاز».
ون ءۇش بالانىڭ كەنجەسى ميگەل رۋيس مەكسيكانىڭ كونە اۋىلىنداعى تولتەك ءداستۇرىن ۇستاعان ەمشىنىڭ وتباسىندا دۇنيەگە كەلەدى. ايتا كەتەيىك, بۇل تولتەك – كونە ءۇندىس جۇرتىنان شىققان يۋتو-اتستەكتىڭ ءبىر جۇرناعى. كەيىننەن كولىك اپاتىنا ۇشىراپ, اجال اۋزىنان امان قالعان ول جاراتىلىس تۋرالى ويدىڭ تۇڭعيىعىنا باتىپ, اقيقاتتى ىزدەيدى. اناسىنىڭ كومەگىمەن ەجەلگى بابالار سالتىنا ءتۇسىپ, تولتەكتەر دانالىعى ارقىلى فيزيكالىق عالام مەن اقىل-ويدىڭ ۆيرتۋال الەمىن تەرەڭ تۇسىنۋگە زەيىن قويادى.
اڭگىمەمىزگە ارقاۋ بولماعى, ميگەل ءرۋيستىڭ ء«تورت كەلىسىم» كىتابىنىڭ ءبىر پاراسى. ناقتىراق ايتساق, ەكىنشى كەلىسىم – «ەشتەڭەنى وزىڭىزگە قاتىستى دەپ قابىلداماڭىز» ءبولىمى. تالاپتى ەردىڭ اقىلىنا سالماق سالار بۇل تاراۋدا رۋحاني ۇستاز ەلەۋلى ۇستىندى تارقاتادى. «وزگە جۇرت نە ىستەسە دە, نە ايتسا دا, نە ويلاپ, نە سەزىنسە دە, ونى وزىڭىزگە قاتىستى دەپ قابىلداماڭىز. ەگەر سىزگە كەرەمەت جان ەكەنسىز دەسە, ونى ءسىز ءۇشىن ايتپاعانى. ءتىپتى بىرەۋ قارۋىن كەزەنىپ, باسىڭىزدان اتىپ جىبەرسە دە, ونىڭ سىزگە ەش قاتىسى جوق». ياعني اينالاداعى ءاربىر ادام وزىنشە نۇرلى, وزىنشە دەرتتى. ەگەر سىزگە كۇلسە, ءوز الەمىنىڭ ساۋلەسىنەن حابار بەرگەنى, ەگەر جىلاسا, ءوز ىشىندەگى ۇدەرىستى جەتكىزگەنى. ەگەر ءسىزدى تىلدەسە, ول دا سىزگە قاتىستى ەمەس دەگەندى ايتادى تولتەكتەردىڭ ۇرپاعى. «قايدا بارساڭىز دا, جالعان ايتاتىن ادام تابىلادى, سونى تەرەڭىرەك تۇسىنگەن سايىن ءسىز دە وزىڭىزگە جالعان ايتىپ جۇرگەنىڭىزدى بايقايسىز. جۇرتتان شىندىقتى ايتادى دەپ كۇتپەڭىز, ويتكەنى ولار ەڭ الدىمەن وزىنە جالعان ايتادى. ءسىز وزىڭىزگە سەنۋىڭىز كەرەك, ال ەستىگەنىڭىزگە سەنۋ-سەنبەۋ ءوز ەركىڭىزدە. باسقا ادامداردى قانداي بولسا, سول قالپىندا كورىپ, وزىمىزگە ەش قاتىسى جوق دەپ قابىلداساق, ولار بىزگە سوزىمەن دە, ىسىمەن دە زيانىن تيگىزە المايدى» دەيدى كىتاپتا.
تولتەكتەر دانالىعىنىڭ بىلگىرى, ەكىنشى كەلىسىم ارقىلى اركىمدى ءوز ءومىرىن سۇرۋگە ۇندەيدى. راسىندا, ادامدا وزىنە قاتىسى جوقتى قابىلدامايتىن ادەت قالىپتاسسا, كوپتەگەن جاعىمسىز جاعدايلاردان قۇتىلارى داۋسىز.