«Aqyl Battle Cup» رەسپۋبليكالىق زياتكەرلىك سايىسىنىڭ جەڭىمپازدارى بەلگىلى بولدى. ەلوردادا وتكەن قورىتىندى كەزەڭدە 20 وڭىردەن جولداما العان 20 كوماندا باق سىنادى. بىلىمدىلەر بايگەسىنە 14-35 جاس ارالىعىنداعىلار قاتىستى.
بۇعان دەيىن قاتىسۋشىلار ونلاين فورماتتا «Aqyl Battle» ءموبيلدى قوسىمشاسى ارقىلى, كۋيز فورماتىندا ىرىكتەۋ كەزەڭدەرىنەن ءوتتى. زياتكەرلىك سايىس مادەنيەت جانە اقپارات مينيسترلىگىنىڭ قولداۋىمەن ء«تىل تاعدىرى – ەل تاعدىرى» جوباسى اياسىندا ۇيىمداستىرىلعان. ماقسات – جاستاردىڭ بىلىمگە دەگەن قۇشتارلىعىن ارتتىرىپ, شىعارماشىلىق پەن زياتكەرلىك دامۋعا جول اشۋ.
– ءبىلىم دوداسىنا بيىل العاش رەت وزبەكستاننىڭ ەڭ تانىمال «Zakovat» زياتكەرلىك ۇيىمىنان «زيالى جاستار» كومانداسى دا قاتىسىپ, قازاق تىلىندە ءبىلىمىن سىناپ جاتىر. «Zakovat» – 25 جىلدىق تاريحى بار ورتالىق ازيادا تانىمال زياتكەرلىك ويىننىڭ ءبىرى. ولار جۇلدەگە تالاسپايدى, تەك قوناق رەتىندە قاتىسىپ, تاجىريبە الماسادى. بولاشاقتا وسى زياتكەرلىك ۇيىممەن سەرىكتەسىپ جۇمىس ىستەگىمىز كەلەدى. باستى ماقساتىمىز – زياتكەرلىك ويىن ارقىلى تۇركى حالىقتارىنىڭ جاستارىن بىرىكتىرۋ, قازاق ءتىلىن, ءبىلىمدى دارىپتەۋ. وسىلايشا, بولاشاقتا سايىستى حالىقارالىق دەڭگەيدە شىعارۋدى جوسپارلاپ وتىرمىز, – دەيدى جوبا جەتەكشىسى ءبيبىنۇر شەرباەۆا.
زياتكەرلىك ءتۋرنيردىڭ جالپى جۇلدە قورى – 3 600 000 تەڭگە. 1-ورىنعا – 1 200 000 تەڭگە, 2-ورىنعا – 900 000 تەڭگە, 3-ورىنعا – 600 000 تەڭگە, 4-ورىنعا 300 000 تەڭگە تابىستالادى. سونىمەن قاتار باسقا كوماندالارعا قارجىلاي ىنتالاندىرۋ سىيلىقتارى قاراستىرىلعان.
– جوبا – جاستارعا ماڭىزدى ءارى ەرەكشە جارىس. ويتكەنى بىلىمگە قۇشتارلىق – ۇدايى ىزدەنىس پەن جاڭاشىلدىققا جانى قۇمار ادامداردىڭ بويىندا بولاتىن اسىل قاسيەت. بۇل كەمەلدىككە جەتەلەيدى. دانا اباي ون سەگىزىنشى قاراسوزىندە «تەگىندە, ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزباق» دەگەن ەكەن. كوميتەت اتىنان ۇيىمداستىرۋشىلارعا, كەلگەن قوناقتارعا العىس بىلدىرەمىن, – دەدى مادەنيەت جانە اقپارات مينيسترلىگى جاستار جانە وتباسى ىستەرى كوميتەتى توراعاسىنىڭ ورىنباسارى ءبىرجان ءالىمجانوۆ.
بۇعان دەيىن 20-22 مامىر ارالىعىندا زياتكەرلىك سايىستىڭ 1-كەزەڭىندە «Aqyl Battle» ءموبيلدى قوسىمشاسى ارقىلى ەلىمىزدىڭ بارلىق وڭىرىنەن 1 500-دەن اسا جاس قاتىسىپ, 135 كوماندا ىرىكتەلدى. زياتكەرلىك سايىستىڭ 2-كەزەڭى 7-20 ماۋسىم ارالىعىندا توتەنشە جاعداي بولعان وڭىرلەردە ونلاين «Google meet» پلاتفورماسى نەگىزىندە, ال قالعان وبلىستاردا كۋيز فورماتىندا تۋرنيرلەر ءوتىپ, 135 كوماندادان 20-سى تاڭدالعان. ياعني مەملەكەتتىك ماڭىزى بار قالالار مەن ءار وبلىستان 1 كوماندادان جانە «كرەاتيۆتى كوماندا» بايقاۋىنىڭ جەڭىمپازدارى فينالعا جولداما الدى.
– مەن – تاريح ءپانىنىڭ مۇعالىمىمىن, جاساندى ينتەللەكت ساراپشىسىمىن. ىرىكتەۋ كەزەڭدەرىنەن مۇدىرمەي ءوتىپ, اقتىق كەزەڭگە جەتكەنىمە قۋانىشتىمىن. ويتكەنى بۇل – مەنىڭ رەسپۋبليكالىق دەڭگەيدەگى العاشقى تاجىريبەم. الداعى ۋاقىتتا وقۋشىلارىمدى دا الىپ كەلۋدى جوسپارلاپ وتىرمىن. توپتا ۇشەۋمىز. كوماندا اتى – «قىزىلجار». سايىسقا دايىندىق وتە جوعارى دەڭگەيدە بولدى. بولاشاقتا وسىنداي تۋرنيرلەردى ءوڭىرىمىزدىڭ ءار اۋدانىندا دامىتۋعا ءوز ۇلەسىمدى قوسقىم كەلەدى, – دەيدى ق.جولتاي ۇلى.
ءبىلىم دوداسىنا باس جۇلدەنى شىعىس قازاقستان وبلىسىنىڭ كومانداسى جەڭىپ الدى. ءبىرىنشى ورىن – قىزىلوردا وبلىسىنىڭ ويىنشىلارىنا, ەكىنشى ورىن اقمولالىقتارعا بۇيىردى. ال قولا كۋبوككە تارتىستا اتىراۋ وبلىسىنىڭ زياتكەرلەرى وزا شاپتى.